వారికే అవకాశం,,,ఎల్‌ఆర్‌ఎస్‌పై రేవంత్ సర్కార్ కీలక నిర్ణయం

ఎల్ఆర్ఎస్‌పై గతంలో అధికారంలో ఉన్న బీఆర్ఎస్ ప్రభుత్వం జారీ చేసిన జీవోకు సంబంధించి.. తాజాగా ప్రస్తుతం అధికారంలో ఉన్న కాంగ్రెస్ ప్రభుత్వం నియమ నిబంధనలు జారీ చేసింది. 2020 లో జారీ చేసిన జీవో 131, జీవో 135 ప్రకారం.. తెలంగాణ రాష్ట్రంలో అక్రమ లే అవుట్లు, ప్లాట్లను క్రమబద్ధీకరించేందుకు ప్రభుత్వం తాజాగా నియమ నిబంధనలు జారీ చేసింది. ఈ మేరకు పురపాలక, పట్టణాభివృద్ధి శాఖ ప్రధాన కార్యదర్శి స్పష్టం చేశారు. అయితే 2020 ఆగస్టు 26 వ తేదీ కంటే ముందు రిజిస్టర్‌ చేసుకున్న లే అవుట్లకు మాత్రమే ఈ ఎల్‌ఆర్‌ఎస్‌ వర్తిస్తుందని ఉత్తర్వుల్లో పేర్కొన్నారు.

అయితే ఎల్ఆర్ఎస్‌కు సంబంధించి 2020 అక్టోబరు 15 వ తేదీలోపు స్వీకరించిన దరఖాస్తులను మాత్రమే పరిగణనలోకి తీసుకుంటామని తెలంగాణ రాష్ట్ర పురపాలక, పట్టణాభివృద్ధిశాఖ ప్రధాన కార్యదర్శి వెల్లడించారు. అయితే ఈ ఎల్ఆర్ఎస్‌కు సంబంధించి నియమ నిబంధనలు 2020లోనే విడుదల చేసినప్పటికీ.. వాటికి సంబంధించిన దరఖాస్తుల పరిశీలన ఈ ఏడాది జనవరిలో ప్రారంభం అయినట్లు ప్రభుత్వం తెలిపింది. ఇప్పటి వరకు మొత్తం 4,28,832 దరఖాస్తులను ప్రాసెస్‌ చేసినట్లు స్పష్టం చేసింది.

ఇక ఎల్‌ఆర్‌ఎస్‌కు సంబంధించి.. 60,213 దరఖాస్తులకు ఆమోద ముద్ర పడగా.. వాటి ద్వారా ప్రభుత్వ ఖజానాకు.. రూ.96.60 కోట్ల ఆదాయం వచ్చినట్లు ప్రభుత్వం వెల్లడించింది. దాదాపు 75 శాతం ఎల్ఆర్ఎస్ దరఖాస్తులకు సంబంధించి.. దరఖాస్తుదారులు పూర్తి వివరాలు సమర్పించలేదని ప్రభుత్వం తెలిపింది. దరఖాస్తులకు తగిన పత్రాలు సమర్పించలేదని ఇప్పటికే ఎల్ఆర్ఎస్‌కు అప్లై చేసుకున్నవారికి ఇప్పటికే తెలియజేసినట్లు పేర్కొంది. అయితే ఆ సర్టిఫికేట్లను సదరు దరఖాస్తుదారులు ఇంకా అప్‌లోడ్‌ చేయకపోవడంతో.. వాటిని ఇప్పటివరకు ప్రాసెస్‌ చేయలేకపోయినట్లు పురపాలక, పట్టణాభివృద్ధి శాఖ ప్రధాన కార్యదర్శి స్పష్టం చేశారు.

అయితే డాక్యుమెంట్లు అప్‌లోడ్ చేసేందుకు దరఖాస్తుదారులకు అవకాశం కల్పించామని.. సేల్‌ డీడ్‌, ఈసీ, మార్కెట్‌ విలువ సర్టిఫికెట్‌, లే అవుట్‌ కాపీలను అప్‌లోడ్‌ చేయవచ్చని పురపాలకశాఖ తెలిపింది. దరఖాస్తుదారులు తమ ఫోన్ నంబర్‌, అడ్రస్ సహా ఇతర వివరాల ఆధారంగా లాగిన్ అయి.. మొబైల్‌ నెంబర్‌కు వచ్చిన ఓటీపీ ఆధారంగా దరఖాస్తులను ఎడిట్ చేసుకోవచ్చని పేర్కొంది. మున్సిపాలిటీలు, కార్పొరేషన్లు, నగరాభివృద్ధి సంస్థలు, జిల్లా కలెక్టర్‌ కార్యాలయాల్లో.. ఎల్ఆర్ఎస్ హెల్ప్‌ డెస్క్‌లు ఏర్పాటు చేసినట్లు తెలిపారు. ఎల్‌ఆర్‌ఎస్‌ దరఖాస్తుదారులకు ఎలాంటి సందేహాలు, సమస్యలు ఉన్నా హెల్ప్‌డెస్క్‌ల ద్వారా తీర్చుకోవచ్చని సూచించింది.