రాఖీ పండగ వేళ జైల్లో కవిత,,,,చెల్లిని గుర్తు చేసుకుంటా కేటీఆర్ భావోద్వేగ ట్వీట్

అన్నాచెళ్లెళ్ల మధ్య ప్రేమ, బంధానికి ప్రతీక రక్షా బంధన్ . ప్రతి ఏడాది శ్రావణ మాసం పౌర్ణమి నాడు రాఖీ పండగ జరుపుకుంటారు. ఈ సాంప్రదాయ పండుగ సోదర సోదరీమణుల మధ్య పవిత్ర బంధాన్ని మరింత బలపరుస్తుంది. సోదరీమణుల రక్షణ, సోదరుల పట్ల ప్రేమ, ఆప్యాయతలకు ప్రతీకగా ఈ పండగను ఘనంగా జరుపుకుంటారు. అటువంటి రాఖీ పండగ దేశవ్యాప్తంగా ఘనంగా జరుగుతోంది. అన్నాచెళ్లళ్ల మధ్య అనురాగాన్ని రెట్టింపు చేసే రాఖీ పండగ వేళ బీఆర్ఎస్ వర్కింగ్ ప్రెసిడెంట్ కేటీఆర్ తన సోదరి ఎమ్మెల్సీ కల్వకుంట్ల కవితను ఉద్దేశించి ట్విట్టర్ ఎక్స్‌లో ఎమోషనల్ ట్వీట్ చేశారు. ప్రతి ఏడాది కవిత.. తన అన్న కేటీఆర్‌కు రాఖీ కట్టేది. అయితే ఆసారి ఆమెకు రాఖీ కట్టే అవకాశం లేకుండా పోయింది. ఢిల్లీ లిక్కర్ స్కాం కేసులో అరెస్ట్ అయి ప్రస్తుతం కవిత తీహార్ జైలులో ఉన్నారు. దీంతో కేటీఆర్ తన చెల్లిని గుర్తు చేసుకుంటూ ఎమోషనల్ ట్వీట్ చేశారు. 'నువ్వు ఈ రోజు రాఖీ కట్టలేకపోవచ్చు. అయినప్పటికీ కష్టసుఖాల్లో ఎల్లప్పుడూ నీ వెన్నంటే ఉంటాను' అని భావోద్వేగ ట్వీట్ చేశారు. గతంలో కవిత తనకు రాఖీ కట్టిన ఫోటోను, ఆమెను అరెస్టు చేసే సమయంలో పక్కనే ఉన్న ఫోటోను షేర్ చేశారు.

దేశవ్యాప్తంగా సంచలనం సష్టించిన ఢిల్లీ లిక్కర్ స్కాం కేసులో కవితను ఈ ఏడాది మార్చి 15న ఈడీ అధికారులు అరెస్టు చేశారు. ఆ తర్వాత సీబీఐ కూడా ఆమెపై ఆరోపణలు మోపింది. ఈ కేసులో కవిత మెుత్తం 100 కోట్ల స్కాంకు పాల్పడినట్లు ఆరోపణలు ఉన్నాయి. దీంతో ఢిల్లీలోని రౌస్ అవెన్యూ కోర్టు ఆమెకు జ్యూడీషయల్ రిమాండ్ విధించారు. అప్పటి నుంచి ఆమె గత 5 నెలలకు పైగా ఢిల్లీ తిహార్ జైలులోనే ఉన్నారు.

కవిత అరెస్ట్ అక్రమమని కేటీఆర్, కేసీఆర్ పలుమార్లు ఆరోపించారు. రాజకీయ కక్షలో భాగంగానే ఆమెను అరెస్టు చేశారన్నారు. ఇక ఆమెను బెయిల్‌పై బయటకు తీసుకొచ్చేందుకు పలుమార్లు ప్రయత్నించినా.. ఉపయోగం లేకుండా పోయింది. ఇటీవల ఢిల్లీ వెళ్లిన కేటీఆర్ కవితతో ములాఖత్ అయ్యారు. దేశంలోనే లీడింగ్ లాయర్లతో మాట్లాడి ఆమెను బెయిల్‌పై బయటకు తీసుకొచ్చేందుకు ప్రయత్నిస్తున్నారు. కాగా, జైలులో కవిత ఆరోగ్యం క్షీణించినట్లు తెలిసింది. జైలుకు వెళ్లిన తర్వాత ఆమె దాదాపు 10 కేజీలకు పైగా బరువు తగ్గినట్లు ఇటీవల కేటీఆర్ వెల్లడించారు. తప్పుడు ఆరోపణలతో జైలు పాలైన కవిత త్వరలోనే బయటకు వస్తుందని బీఆర్ఎస్ శ్రేణులు ఆశాభావం వ్యక్తం చేస్తున్నారు.