సీఎం రేవంత్ రెడ్డికి ప్రభాస్ పెద్దమ్మ స్పెషల్ గిఫ్ట్

తెలంగాణ సీఎం రేవంత్ రెడ్డికి.. డార్లింగ్ ప్రభాస్ పెద్దమ్మ, కృష్ణంరాజు భార్య శ్యామలా దేవి స్పెషల్ గిఫ్ట్ అందించారు. హైదరాబాదులోని గచ్చిబౌలి స్టేడియంలో ఆదివారం రోజున (ఆగస్టు 18న) ఆంధ్రప్రదేశ్, తెలంగాణ క్షత్రియ సేవా సమితి ఆధ్వర్యంలో.. సీఎం రేవంత్ రెడ్డి‌కి అభినందన సభ జరిగిన విషయం తెలిసిందే. ఈ వేడుకలో పాల్గొన్న శ్యామలా దేవి.. సీఎం రేవంత్ రెడ్డికి స్వయంగా గిఫ్ట్ ఇచ్చారు. తాపేశ్వరం సురుచి బాహుబలి కాజాను సీఎం రేవంత్ రెడ్డికి అందజేసి.. అందర్నీ ఆశ్చర్యానికి గురి చేశారు. ఇందుకు సంబంధించిన ఫోటో తాజాగా సోషల్ మీడియాలో వైరల్ అవుతోంది. కాగా.. ఈ ఫొటోపై నెటిజన్లు రకరకాలుగా స్పందిస్తున్నారు. రాజుల మనసులా ఆమె ఇచ్చిన బహుమతి కూడా పెద్దదని కొందరు.. బాహుబలి రేంజ్ బహుమతి అట్లుంటది మరీ అని ప్రభాస్ ఫ్యాన్స్ కామెంట్లు చేస్తున్నారు.

ఆ తర్వాత.. ప్రసంగించిన సీఎం రేవంత్ రెడ్డి.. కృష్ణంరాజు, ప్రభాస్‌పై ప్రశంసలు కురిపించటం కూడా వైరల్ అయ్యింది. కృష్ణంరాజు లేకుండా తెలుగు సినిమా గురించి మాట్లాడుకోవటం కుదరదని చెప్పుకొచ్చారు. క్షత్రియ సామాజిక వర్గానికే చెందిన ప్రభాస్.. తెలుగు సినిమా ఖ్యాతిని విశ్వవ్యాప్తం చేశారని రేవంత్ రెడ్డి ప్రశంసించారు. ఇక.. తెలుగు సినిమా హాలీవుడ్‌ను ఢీకొట్టే సత్తా ఉందని నిరూపించిన బాహుబలిని ప్రభాస్ లేకుండా ఊహించలేమని రేవంత్ రెడ్డి చెప్పుకొచ్చారు. అంతేకాకుండా.. వివాదాస్పద డైరెక్టర్ రామ్ గోపాల్ వర్మ కూడా తనకు మంచి మిత్రుడంటూ రేవంత్ రెడ్డి తెలిపారు.

విజయానికి, నమ్మకానికి క్షత్రియులు మారుపేరంటూ రేవంత్ రెడ్డి కొనియాడారు. కష్టపడే గుణం వల్లే క్షత్రియులు ఏ రంగంలో అయినా విజయాన్ని సాధిస్తున్నారని చెప్పుకొచ్చారు. ఏ రంగంలో అడుగు పెట్టినా.. నిబద్ధతతో కష్టపడేతత్వంతో రాణిస్తారని వివరించారు. మరోవైపు.. రాజులను చట్ట సభల్లోకి తీసుకోవాలనే ఆలోచన ఉందని రేవంత్ రెడ్డి మనసులో మాట తెలిపారు. మొదట పార్టీలో అవకాశం కల్పిస్తామని.. ఆ తర్వాత ఎమ్మెల్యేగా ఛాన్స్ ఇస్తామని కీలక ప్రకటన చేశారు రేవంత్ రెడ్డి. హైదరాబాద్‌ అభివృద్ధిలో రాజుల పాత్ర చాలా ఉందని.. కొంపల్లిని పెద్ద నగరంగా మార్చింది రాజులేనని చెప్పుకొచ్చారు. అయితే.. హైదరాబాద్‌లో నిర్మించబోయే ఫోర్త్ సిటీ అయిన ఫ్యూచర్ సిటీ నిర్మాణంలో కూడా రాజులు భాగస్వామ్యం కావాలని రేవంత్ రెడ్డి విజ్ఞప్తి చేశారు.