సుప్రీం ఆదేశాలు హైడ్రాకు వర్తించవని,,,హైడ్రా కమిషనర్ రంగనాథ్ కీలక వ్యాఖ్యలు

దేశంలో పెరిగిపోతున్న బుల్డోజర్ సంస్కృతిపై సర్వోన్నత న్యాయస్థానం జారీ చేసిన ఆదేశాలు ఇప్పుడు సర్వత్రా చర్చనీయాంశంగా మారాయి. అక్టోబర్ 1వ తేదీ వరకు దేశవ్యాప్తంగా బుల్డోజర్ కూల్చివేతలు ఆపేయలంటూ సూప్రీం కోర్టు ఉత్తర్వులు జారీ చేసింది. తదుపరి ఆదేశాలు వచ్చే వరకు బుల్డోజర్ కూల్చివేతలు ఆపేయాలని అన్ని రాష్ట్ర ప్రభుత్వాలను సుప్రీం కోర్టు ఆదేశించింది. అయితే.. సుప్రీం కోర్టు ఇచ్చిన ఈ ఆదేశాలపై హైడ్రా కమిషనర్ రంఘనాథ్ స్పందించారు. సుప్రీం కోర్టు ఇచ్చిన ఆదేశాలు.. తమకు వర్తించవంటూ సంచలన వ్యాఖ్యలు చేశారు.

ఉత్తర్‌ప్రదేశ్‌లోని నేరస్థులు, నిందితుల ఆస్తుల కూల్చివేతలకు మాత్రమే సుప్రీం కోర్టు జారీ చేసిన ఆదేశాలు వర్తిస్తాయని రంగనాథ్ చెప్పుకొచ్చారు. చెరువులు, నాలాలు, ప్రభుత్వ ఆస్తులను ఆక్రమించి నిర్మించిన కట్టడాలను మాత్రమే హైడ్రా కూల్చివేస్తుందని రంగనాథ్ స్పష్టం చేశారు. నేరస్థులు, నిందితులకు సంబంధించిన ఆస్తుల జోలికి.. హైడ్రా ఏమాత్రం వెళ్లడం లేదని రంగనాథ్‌ క్లారిటీ ఇచ్చారు. అయితే.. బహిరంగ స్థలాలు, రైల్వే ఆస్తులు, చెరువులు, కుంటలను అక్రమించి కట్టిన నిర్మాణాల తొలగింపు విషయంలో.. తమ ఆదేశాలు వర్తించవని పేర్కొన్న సుప్రీంకోర్టు ఆదేశాలను రంగనాథ్ ఉద్ఘాటించారు.

అయితే.. హైదరాబాద్‌లో చెరువు, కుంటలు, ప్రభుత్వ స్థలాలను అడ్డగోలుగా ఆక్రమించి.. నిర్మాణాలు చేపట్టిన కట్టడాలపైకి హైడ్రా బుల్డోజర్లు పంపిస్తున్న సంగతి తెలిసిందే. ఆక్రమించింది.. సామాన్యులైనా.. సెలెబ్రిటీ అయిన.. ఏ పార్టీ రాజకీయ నాయకుడైనా ఏమాత్రం బెదరకుండా.. బుల్డోజర్లను పంపి నిర్దాక్షిణ్యంగా నేలమట్టం చేస్తోంది. కాగా.. ఆక్రమణదారులను హడలెత్తిస్తోన్న హైడ్రా కూల్చివేతలపై ఇప్పటికే పలువురు సామాన్యులు, రాజకీయ నాయకులు తెలంగాణ హైకోర్టును ఆశ్రయించిన విషయం తెలిసిందే. హైడ్రాను రద్దు చేయాలని కొందరు.. తమ ఆస్తులను కూల్చకుండా ఆదేశాలు ఇవ్వాలని మరికొందరు హైకోర్టును ఆశ్రయించారు.

అయితే.. ఇప్పుడు దేశవ్యాప్తంగా ఈ బుల్డోజర్ల సంస్కృతిపై ఏకంగా సుప్రీం కోర్టే కలుగజేసుకుని.. సంచలన ఆదేశాలు ఇవ్వటం ఇప్పుడు సర్వత్రా చర్చనీయాంశంగా మారింది. ఈ ఆదేశాలు.. హైడ్రాకు కూడా వర్తిస్తాయని సంబురపడిపోతున్న వారిని ఉద్దేశించి.. కమిషనర్ రంగనాథ్ ఇచ్చిన స్టేట్ మెంట్ ఇప్పుడు వారి ఆనందంపై నీళ్లు చల్లినట్టయింది.