తెలంగాణలో కులగణన.. నెల రోజుల్లోనే ఆ ప్రక్రియ పూర్తి చేసేలా

తెలంగాణలో సంచలన నిర్ణయాలతో దూసుకుపోతున్న రేవంత్ రెడ్డి సర్కార్.. ఇప్పుడు మరో ప్రతిష్టాత్మక కార్యక్రమాన్ని అమలు చేసేందుకు సిద్ధమవుతోంది. అసెంబ్లీ ఎన్నికల్లో చెప్పినట్టుగా.. తెలంగాణలో కులగణన నిర్వహించేందుకు రేవంత్ రెడ్డి ప్రభుత్వం వడివడిగా అడుగులు వేస్తోంది. ఈ క్రమంలోనే.. కులగణన విధివిధానాలపై కసరత్తు షురూ చేసింది. మంగళవారం (అక్టోబర్ 08న) రోజున సచివాలయంలో మంత్రి పొన్నం ప్రభాకర్ నేతృత్వంలో.. నిర్వహించిన సమావేశంలో కీలక నిర్ణయాలు తీసుకున్నట్టు తెలుస్తోంది. ఈ సమావేశంలో బీసీ కమిషన్ ఛైర్మన్ నిరంజన్‌తో పాటు కమిషన్ సభ్యులు, ఉన్నతాధికారులు పాల్గొని.. పలు అంశాలపై చర్చించారు. బీసీ కులగణన విధివిధానాలను రూపొందించే ప్రక్రియను కేవలం నెల రోజుల్లోనే పూర్తి చేయాలని సమావేశంలో నిర్ణయం తీసుకున్నట్టు తెలుస్తోంది. ఇదే అంశంపై రెండు మూడు రోజుల్లోనే ప్రభుత్వం కీలక సమావేశం కూడా ఏర్పాటు చేయబోతున్నట్లు సమాచారం.

ఇప్పటికే.. ఈ కులగణన కోసం అసెంబ్లీ సమావేశాల్లో కూడా తీర్మానం జరగ్గా.. అందులో భాగంగానే బీసీ కమిషన్, ఎస్సీ కమిషన్‌ను ప్రభుత్వం ఏర్పాటు చేసింది. అయితే.. కులగణన పూర్తయిన తర్వాతే రాష్ట్రంలో స్థానిక సంస్థ ఎన్నికలు నిర్వహించాలని సీఎం రేవంత్ రెడ్డి భావిస్తున్నట్టు సమాచారం. సర్పంచ్ ఎన్నికలు రోజురోజుకు ఆలస్యమవుతున్న నేపథ్యంలో.. ఇప్పటికే ఉన్న రిజర్వేషన్ల ప్రకారమే ఎలక్షన్లు నిర్వహించాలని కూడా ఓ ఆలోచన చేస్తున్నట్టు తెలుస్తోంది.

ఒకవేళ కులగణన ప్రక్రియ వీలైనంత త్వరగా పూర్తయినట్టయితే.. కొత్త రిజర్వేషన్లతో ఎన్నికలకు వెళ్లాలని ప్రభుత్వం భావిస్తుండగా.. అది సాధ్యమయ్యే వాతావరణం కనిపించట్లేదు. కులగణన పూర్తయి.. కొత్త రిజర్వేషన్లతో ఎన్నికలకు వెళ్లాలంటే మాత్రం సర్పంచ్ ఎన్నికలు ఇంకా ఆసల్యం అయ్యే ఛాన్స్ ఉంది. ప్రభుత్వం అనుకుంటున్నట్టుగా 3 నెలల్లో కులగణన పూర్తి చేసినప్పటికీ.. ఎన్నికలు నిర్వహించేందుకు ఎంత కాదన్నా.. 6 నెలల సమయం పడుతుందని విశ్లేషకులు వివరిస్తున్నారు. మరి.. రేవంత్ రెడ్డి సర్కార్ దూకుడు చూస్తుంటే.. కులగణన పూర్తి చేసే ఎన్నికలకు వెళ్లాలని నిర్ణయించుకున్నట్టు తెలుస్తోంది. ఏం జరుగుతుందనే.. మరికొన్ని రోజులు వేచి చూడాల్సిందే..!