కార్తీక పౌర్ణమి వేళ తీవ్ర విషాదం.. ఆగిపోయిన 12 ఏళ్ల చిన్నారి గుండె

కార్తీక పౌర్ణమి వేళ ఓ కుటుంబంలో అమావాస్య చీకట్లు అలుముకున్నాయి. ఆ ఇంట్లో తన నవ్వులతో వెలుగులు విరజిమ్మిన ఆ దివ్వె 12 ఏళ్లకే ఆరిపోయింది. పండుగ పూట ఎంతో సంతోషంగా గడపాలనుకున్న ఆ కుటుంబంలో తీరని విషాదం నిండింది. చెంగు చెంగునా ఎగురుతూ ఉత్సాహంగా ఉంటే ఆ చిన్నారి గుండె అర్ధాంతరంగా ఆగిపోయింది. గుండెలు పిండేసే ఈ ఘటన.. మంచిర్యాల జిల్లా చెన్నూరు పట్టణంలో జరిగింది.

పట్టణంలోని పద్మానగర్ కాలనీకి చెందిన శ్రీనివాస్- రమ దంపతులకు కూతురు నివృత్తితో పాటు ఓ కుమారుడు కూడా. నివృత్తి మొదటి సంతానం. చెన్నూర్ పట్టణంలోని స్థానిక పాఠశాలలో పాఠశాలలో నివృత్తి ఏడో తరగతి చదువుతోంది. అయితే.. ఈరోజు (నవంబర్ 15న) కార్తీక పౌర్ణమి కావడంతో పాఠశాలకు సెలవు‌ ఇచ్చారు. దీంతో.. నివృత్తి ఇంట్లోనే సరదాగా ఆడుకుంటూ ఉత్సాహంగా ఉంది. ఇంతలోనే ఏం జరిగిందో తెలియదు.. ఆడుకుంటూనే ఒక్కసారిగా కుప్పకూలిపోయింది.

నివృత్తి పడిపోవటం గమనించిన కుటుంబీకులు లేపేందుకు ప్రయత్నించగా.. ఫలితం కనిపించలేదు. దీంతో.. హుటాహుటిన నివృత్తిని స్థానిక ఆసుపత్రికి తరలించారు. కానీ.. అప్పటికే జరగరాని నష్టం జరిగిపోయింది. చిన్నారిని పరీక్షించిన వైద్యులు నివృత్తి అప్పటికే మృతి చెందినట్లుగా ప్రకటించారు. గుండెపోటు కారణంగానే నివృత్తి ప్రాణాలు వదిలినట్టు వైద్యులు ప్రాథమికంగా నిర్దారించారు.

ఈ విషయం తెలిసి ఆ తల్లిదండ్రులు గుండెలు అవిసేలా రోధించారు. ఎంతో అల్లారు ముద్దుగా పెంచుకున్న తన కుమార్తె.. ఉన్నత చదువులు చదివి తమకు పేరు ప్రతిష్టలు తీసుకొస్తుందని కలలు కన్న ఆ తల్లిదండ్రుల కళ్ల ముందే విగతజీవిగా మారటాన్ని జీర్ణించుకోలేకపోయారు. 12 ఏళ్లకే నిండు నూరేళ్లు నిండిపోయాయా అంటూ కన్నీళ్లు పెట్టుకున్నారు. ఆ తల్లిదండ్రులు, కుటుంబ సభ్యులు విలపిస్తుండటం అక్కడున్న వాళ్లందరి చేత కంటతడి పెట్టించింది. అతి చిన్న వయసులోనే ఆ చిన్నారి గుండెపోటుతో మృతి చెందటం ఆ కాలనీ మొత్తం విషాదాన్ని నింపింది. నివృతి మరణ వార్త తెలిసి.. తాను చదువుకుంటున్న పాఠశాల ఉపాధ్యాయులు, తోటి విద్యార్థులు కన్నీటితో‌ నివాళులర్పించారు.

బుధవారం (నవంబర్ 13న) రోజున కూడా జగిత్యాల జిల్లా మేడిపల్లి మండలం కమ్మరిపేట గ్రామానికి చెందిన 23 ఏళ్ల యువకుడు పెళ్లి బరాత్‌లో కుటుంబ సభ్యులతో కలిసి డ్యాన్య్ చేస్తూనే కుప్పకూలిపోయి ప్రాణాలు కోల్పోయాడు. కాగా.. ఈరోజు ఏకంగా 12 ఏళ్ల చిన్నారి గుండెపోటుతో మరణించటం తీవ్ర ఆందోళనకు గురి చేస్తోంది.