తెలంగాణ పోలీస్‌ బ్యాడ్జి, లోగోలో మార్పులు.. కొత్త పేరుతో ఇకపై ఇలా.

తెలంగాణ పోలీస్‌ బ్యాడ్జిల్లో మార్పులు చోటు చేసుకున్నాయి. ఈ మేరకు రాష్ట్ర హోంశాఖ ప్రత్యేక ప్రధానకార్యదర్శి రవి గుప్తా ఉత్తర్వులు జారీ చేసింది. ఇప్పటివరకు పోలీస్ బాడ్జిలపై ఉన్న TSను TGగా మార్చారు. సివిల్, ఏఆర్, TSSP, SAR CPL, PTO విభాగాలకు సంబంధించి కానిస్టేబుల్‌ నుంచి నాన్‌కేడర్‌ ఎస్పీల వరకు ప్రస్తుతం ‘TSP’గా ఉన్న పీక్‌ క్యాప్‌ మోనోగ్రామ్‌ను ఇకపై ‘TGP’గా మార్చారు. అలాగే ఇప్పటివరకు ‘తెలంగాణ స్టేట్‌ పోలీస్‌’గా ఉన్న పోలీస్ లోగోను ‘తెలంగాణ పోలీస్‌’గా మార్పులు చేశారు. టీఎస్‌ఎస్‌పీ షోల్డర్‌బ్యాడ్జిని TGSPగా, TSP షోల్డర్‌బ్యాడ్జిని TGPగా, TSPC షోల్డర్‌ బ్యాడ్జిని టీజీపీఎస్‌గా మార్చారు.

తెలంగాణ రాష్ర్టాన్ని సూచించే అధికారిక సంక్షిప్త నామాన్ని ప్రభుత్వం ‘TG’గా మారుస్తూ గతంలోనే రేవంత్ సర్కార్ నిర్ణయం తీసుకుంది. ఈ మేరకు సీఎస్ శాంతి కుమారి ఉత్తర్వులు సైతం జారీ చేశారు. రాష్ట్రంలోని అన్ని ప్రభుత్వ శాఖలు, ప్రభుత్వరంగ సంస్థలు, ఏజెన్సీలు, స్వయం ప్రతిపత్తి సంస్థలు, అధికారిక హోదాలు సూచించే బోర్డుల్లో TG గా మార్పులు చేయాలని సూచించారు. ప్రభుత్వ జీవోలు, నోటిఫికేషన్లు, సర్క్యులర్లు, లెటర్‌ హెడ్స్‌, పాలసీ పేపర్లు, అధికారిక పత్రాల్లోనూ టీజీ వచ్చేలా చూడాలని ఆదేశించారు. ఈ మేరకు ఇప్పటికే తెలంగాణ ఆర్టీసీని TSRTC స్థానంలో TGSRTCగా మార్పులు చేశారు. కొత్త వాహనాల రిజిస్ట్రేషన్ కూడా టీఎస్ స్థానంలో టీజీగా చేస్తున్నారు. తాజాగా తెలంగాణ పోలీస్ బ్యాడ్జ్, లోగోను కూడా మార్చారు.

కాగా, తెలంగాణ ఆవిర్భావం కంటే ముందు TG అనే పేరు ఎక్కువగా వాడుకలో ఉండేది. ఉద్యమ కారులు నిరసనలు వ్యక్తం చేస్తేందుకు తమ వాహనాల నెంబర్ ప్లేట్లపై TG అనే రాసుకునేవారు. అయితే రాష్ట్ర ఆవిర్భావం, కేసీఆర్ ముఖ్యమంత్రి అయ్యాక రాష్ట్రాన్ని తెలంగాణ స్టేట్ (TS) పేరుతో పిలిచారు. దీంతో అప్పటి నుంచి టీఎస్‌ పేరు వ్యవహారికంలో ఉండేది. అయితే కాంగ్రెస్ అధికారంలోకి వచ్చిన తర్వాత.. అప్పటి ఉద్యమ సమయంలో ఉపయోగించిన టీజీనే వాడాలని డిసైడ్ అయింది. ఈ మేరకు పేరు మారుస్తూ ఉత్తర్వులు జారీ చేసింది.