తెలంగాణ సెక్రటేరియట్‌లో వాస్తు మార్పులు..! బాహుబలి గేటు శాశ్వతంగా మూసివేత

తెలంగాణ కొత్త సెక్రటేరియట్‌ను అత్యాధునిక హంగులతో నిర్మించిన సంగతి తెలిసిందే. గత బీఆర్ఎస్ ప్రభుత్వం సెక్రటేరియట్‌ను నిర్మించి అందుబాటులోకి తీసుకొచ్చింది. అయితే తెలంగాణ సెక్రటేరియట్‌లో వాస్తు దోషం ఉందని గత కొంత కాలంగా ప్రచారం జరుగుతోంది. అందుకు అనుగుణంగా ప్రస్తుత సీఎం రేవంత్ రెడ్డి ఇప్పటికే పలు మార్పులు సూచించినట్లు తెలిసింది. అందులో భాగంగా సెక్రటేరియట్‌లో స్వల్ప మార్పులు చోటు చేసుకుంటున్నాయి.

సచివాలయం ప్రధాన గేట్లు, రోడ్లలో ప్రభుత్వం దాదాపు రూ.3కోట్లతో మార్పులు చేస్తోంది. తూర్పున ఉండే ప్రధాన గేటును (బాహుబలి గేటు) పూర్తిగా తొలగించింది. అక్కడ రేకులను ఏర్పాుటు చేసారు. ఈశాన్యం వైపు ఇనుప గ్రిల్స్ తొలగించి మరో గేటును అక్కడ ఏర్పాటు చేస్తున్నారు. నైరుతి, ఈశాన్య గేట్లను కలుపుతూ రోడ్డు నిర్మిస్తోంది. బాహుబలి గేటు నుంచి సచివాలయం లోపల ప్రధాన గేటుకు వెళ్లే మార్గంలో తెలంగాణ తల్లి విగ్రహం ఏర్పాటు చేయనుంది.

అందుకు సంబంధించిన పనులకు సీఎం రేవంత్ రెడ్డి ఇది వరకే శంకుస్థాపన చేశారు. డిసెంబర్ 9న సీఎం విగ్రహాన్ని ఆవిష్కరించనున్నారు. తెలంగాణ సంస్కృతి, చరిత్ర, వైభవం, పోరాట స్ఫూర్తి ఉట్టిపడేలా విగ్రహ రూపకల్పన చేయాలని జేఎన్‌టీయూ ఫైన్ ఆర్ట్స్‌ విభాగానికి బాధ్యతలు అప్పగించారు. బహుబలి గేటుకు ఎదురుగానే.. సెక్రటేరియట్ ఆవరణలో తెలంగాణ తల్లి విగ్రహం ఏర్పాుటు చేస్తుండటంతో.. బహుబలి గేటును పూర్తిగా మూసివేసినట్లు తెలిసింది.

తెలంగాణ సెక్రటేరియట్ విశేషాలుతెలంగాణ కొత్త సెక్రటేరియట్ మొత్తం 28 ఎకరాల్లో విస్తరించింది. ఆరు అంతస్తుల్లో ఈ భవనాన్ని విశాలంగా నిర్మించారు. ఆరో అంతస్తుల్లో సీఎం చాంబర్ ఏర్పాటు చేశారు. సచివాలయంలో మొత్తం 635 గదులు, 30 కాన్ఫరెన్స్ హాల్స్ ఏర్పాటు చేశారు. మహాద్వారం (దీన్నే మూసివేశారు) 29 అడగుల వెడల్పు, 24 అడుగుల ఎత్తు ఉంటుంది. దీన్ని బహూబలి గేటు అని పిలుస్తుంటారు. సెక్రటేరియట్‌ను తాజ్ మహల్, గుల్బర్గా వంటి కట్టడాల్లో ఉన్నట్టుగానే పెద్ద పెద్ద గుమ్మటాలు నిర్మించారు. మెుత్తం 34 గుమ్మటాలు సెక్రటేరియట్‌లో ఏర్పాటు చేశారు. 165 అడుగుల ఎత్తులో ప్రధాన ద్వారాన్ని నిర్మించారు. సుమారు రూ.617 కోట్లతో నిర్మించిన తెలంగాణ కొత్త సెక్రటేరియట్ 2023 ఏప్రిల్ 30న ప్రారంభించారు. అప్పటి ముఖ్యమంత్రి కేసీఆర్ సెక్రటేరియట్ ప్రారంభించగా.. ఆ తర్వాత కొన్ని నెలలకే వారి పార్టీ అధికారాన్ని కోల్పోయిన సంగతి తెలిసిందే.