జానీ మాస్టర్‌కు బిగ్ రిలీఫ్.. ఆ పిటిషన్ కొట్టేసిన సుప్రీం ధర్మాసనం

ప్రముఖ డ్యాన్స్ కొరియోగ్రాఫర్ జానీ మాస్టర్ లైంగిక వేధింపుల కేసులే అరెస్ట్ అయిన సంగతి తెలిసిందే. ఈ కేసులో ఆయన దాదాపు నెలరోజుల పాటు జైలు జీవితం గడిపారు. అక్టోబర్ 24న ఆయన బెయిల్‌పై బయటకు రాగా.. హైకోర్టు బెయిల్ మంజూరు చేయటాన్ని ఫిర్యాదుదారు తప్పుబట్టారు. ఈ మేరకు తెలంగాణ హైకోర్టు జానీ మాస్టర్‌కు ఇచ్చిన బెయిల్ పిటిషన్ రద్దు చేయాలంటూ బాధితురాలు సుప్రీం కోర్టును ఆశ్రయించారు. దీంతో శుక్రవారం సుప్రీంకోర్టులో ఈ పిటిషన్‌పై విచారణ జరిగింది. అయితే ఈ పిటిషన్ విషయంలో జానీ మాస్టర్‌కు ఊరట లభించింది. సుప్రీం కోర్టు ధర్మాసనం పిటిషను డిస్మిస్ చేసింది. తెలంగాణ హైకోర్టు బెయిల్ మంజూరు చేస్తూ ఇచ్చిన ఉత్తర్వుల్లో తాము జోక్యం చేసుకోలేమని సుప్రీం ధర్మాసనం స్పష్టం చేసింది. దీంతో జానీ మాస్టర్‌కు భారీ ఊరట లభించినట్లయింది.

కాగా జానీ మాస్టర్ తనపై లైంగిక దాడి చేశాడంటూ అతడి వద్ద గతంలో అసిస్టెంట్‌గా పని చేసిన లేడీ కొరియోగ్రాఫర్ పోలీస్ స్టేషన్‌లో ఫిర్యాదు చేసిన విషయం తెలిసిందే. 2017లో తనపై జానీ మాస్టర్ అత్యాచారం చేశాడని.. ఈ విషయం బయట ఎవరికైనా చెబితే చంపేస్తానని బెదిరించినట్లు పోలీసులకు ఇచ్చిన ఫిర్యాదులో పేర్కొన్నారు. షూటింగ్ కోసం వేరే ప్రాంతాలకు వెళ్లిన సందర్భంలోనూ తనపై లైంగిక దాడి చేసినట్లు ఆమె ఆరోపించారు. తాను మైనర్‌గా ఉన్నపుడే తనపై జానీ మాస్టర్ లైంగిక దాడికి పాల్పడ్డాడని.. పెళ్లి చేసుకోవాలని ఒత్తిడి చేసినట్లు ఫిర్యాదులో పేర్కొన్నారు. దీంతో జానీ మాస్టర్‌పై కేసు పోక్సో చట్టం కింద కేసు నమోదు చేసి అరెస్టు చేశారు. దాదాపు నెల రోజులు జైల్లో ఉన్న అతడు ఇటీవల బెయిల్‌పై రిలీజ్ అయ్యారు.

ఇక బెయిల్‌పై రిలీజ్ అయిన తర్వాత.. ఇటీవల జబర్దస్త్ రాకేష్ కేసీఆర్ మూవీ ప్రీ రిలీజ్ ఈవెంట్‌కు జానీ మాస్టర్ హాజరయ్యారు. అరెస్ట్, బెయిల్ ఇష్యూ తర్వాత.. స్టేజ్ మీద జానీ మాస్టర్ మాట్లాడటం, మీడియా ముందుకు రావడం ఇదే తొలి సారి. అయితే ఆయన ఏం మాట్లాడాతరనే దానిపై అంతా ఆసక్తిగా ఎదురు చూశారు. ఈ సందర్భంగా మాట్లాడిన జానీ మాస్టర్.. కాస్త ఎమోషనల్ అయ్యారు. 'రీసెంట్‌గా కొన్ని కొన్ని సంఘటనలు జరిగాయి.. ఇలా జరిగినప్పుడు బయటకు ఎవ్వరూ రారు.. తనను నమ్మిన ప్రతీ ఒక్కరికీ.. తనను ఇంట్లో బిడ్డలా అనుకుని ఆశీర్వదించిన ప్రతీ ఒక్కరికీ థాంక్స్. మీరు పెట్టుకున్న నమ్మకం ఎక్కడికి పోదు.. త్వరలోనే అన్నీ తెలుస్తాయ్' అని జానీ మాస్టర్ వెల్లడించారు.

కాగా, ఈ ఇష్యూ తర్వాత ఆయన నేషనల్ అవార్డు అయిన సంగతి తెలిసిందే. 2022 ఏడాదికి గానూ నేషనల్‌ ఫిల్మ్‌ అవార్డు ఫర్‌ బెస్ట్‌ కొరియోగ్రఫీకి జానీ మాస్టర్‌ ఎంపికయ్యారు. అవార్డు అందుకునేందుకు జానీ మాస్టర్‌కు ఆహ్వానం సైతం అందింది. అయితే పోక్సో చట్టం కింద ఆయనపై కేసు నమోదు కావటంతో నేషనల్‌ అవార్డును నిలిపివేస్తున్నట్లు అవార్డు కమిటీ ప్రకటించింది.