మన్నెగూడ రోడ్డు విస్తరణ పనులు.. అధికారులకు మంత్రి కోమటిరెడ్డి కీలక ఆదేశం

హైదరాబాద్ శివారు తెలంగాణ పోలీస్‌ అకాడమీ జంక్షన్‌ నుంచి వికారాబాద్‌ జిల్లా పూడూరు మండలం మన్నెగూడ వరకు రోడ్డు విస్తరణ పనులు చేపట్టిన విషయం తెలిసిందే. హైదరాబాద్‌ నుంచి కర్ణాటక రాష్ట్రంలోని బీజాపూర్‌ వరకు వెళ్లే జాతీయ రహదారి పొడవు 365 కి.మీ కాగా.. పోలీస్ అకాడమీ జంక్షన్ నుంచి మన్నెగూడ వరకు 46 కి.మీ సింగిల్‌ రోడ్డు ఉంటుంది. ఈ రహదారిలో ప్రమాదాలు ఎక్కువగా జరుగుతుండటంతో విస్తరణకు నిర్ణయం తీసుకున్నారు. ఈ రహదారి విస్తరణ పనులు చేపట్టేందుకు కేంద్ర మంత్రి గడ్కరీ మూడేళ్ల క్రితం శంకుస్థాపన చేసినా పనులు ఏ మాత్రం ముందుకు సాగడం లేదు. దీంతో ప్రమాదాలు జరుగుతూనే ఉన్నాయి.

ఈ నేపథ్యంలో రహదారి విస్తరణపై తెలంగాణ సర్కార్ ఫోకస్ పెట్టింది. సంవత్సరాలు గడుస్తున్నా మన్నెగూడ రోడ్డు పనులు ఎందుకు ప్రారంభించడం లేదని రోడ్లు, భవనాల శాఖ మంత్రి కోమటిరెడ్డి వెంకట్ రెడ్డి అధికారులపై ఆగ్రహం వ్యక్తం చేశారు. నేడు సెక్రటేరియట్‌లో అధికారులతో సమీక్ష నిర్వహించిన మంత్రి కోమటిరెడ్డి.. వచ్చేవారం మన్నెగూడ పనులు ప్రారంభించాలని ఆదేశించారు. మనం ప్రజల కోసం, రైతుల కోసం పనిచేస్తున్నాం.. కాంట్రాక్ట్ సంస్థల కోసం కాదని హితవు పలికారు. పనులు చేయని కాంట్రాక్టర్లను ఫోర్ క్లోజ్ చేయాలని ఆదేశించారు. జాతీయ రహదారుల భూసేకరణపై నిర్లక్ష్యం వహిస్తున్న అధికారులపైనా మంత్రి కోమటిరెడ్డి సీరియస్ అయ్యారు. రైతులకు అడ్వాన్సులు వెయ్యకుండా భూసేకరణ ఎలా చేస్తారని ప్రశ్నించారు.

కలెక్టర్లతో కలిసి వేగంగా భూసేకరణ చేయాలని ఆదేశించారు. పంటల సీజన్ మొదలైతే భూసేకరణ అసాధ్యమనే విషయాన్ని గుర్తుంచుకోవాలన్నారు. పనులు జరుగుతున్న రోడ్ల వద్దకు వచ్చి జరుగుతున్న పనుల తీరును ప్రత్యక్షంగా పర్యవేక్షిస్తానని చెప్పారు. నిర్లక్ష్యం చేస్తే సహించేది లేదని మంత్రి అధికారులను హెచ్చరించారు. ఖమ్మం జిల్లాలో 400 అర్బిట్రేషన్ కేసులు ఎందుకు పెండింగ్‌లో ఉన్నాయని అధికారులను ప్రశ్నించారు. అవార్డు ప్రకటించినా.. పనులు చేయకపోతే ఎలా అంటూ అధికారులపై మండిపడ్డారు. సీఎం రేవంత్ రెడ్డితో సమీక్ష నిర్వహించే నాటికి పనుల్లో కచ్చితంగా పురోగతి ఉండాలన్నారు.