హైడ్రా మరో కీలక నిర్ణయం.. కొత్త ఏడాది నుంచి అమలు

గ్రేటర్ హైదరాబాద్ నగర పరిధిలోని చెరువులు, కుంటలు, ప్రభుత్వ స్థలాల పరిరక్షణ కోసం 'హైడ్రా' అనే ప్రత్యేక వ్యవస్థను ఏర్పాటు చేసిన సంగతి తెలిసిందే. చెరువులు, కుంటల ఎఫ్‌టీఎల్, బఫర్ జోన్లు ఆక్రమించి నిర్మించిన అక్రమ నిర్మాణాలను హైడ్రా అధికారులు బుల్డోజర్లతో నేలమట్టం చేస్తున్నారు. ఇప్పటికే దాదాపు 300కు పైగా అక్రమ కట్టడాలను హైడ్రా అధికారులు కూల్చివేతలు చేపట్టారు. టాలీవుడ్ సినీ హీరో నాగార్జునకు చెందిన ఎన్ కన్వెన్షన్ కూల్చివేతతో హైడ్రా పేరు దేశవ్యాప్తంగా మార్మోగింది. ప్రస్తుతం కూల్చివేతలపై హైడ్రా సైలెంట్ అయింది. చెరువులు, కుంటల బఫర్ జోన్లు, ఎఫ్‌టీల పరిధి నిర్ధారించిన తర్వాత కూల్చివేతలు చేపట్టనుంది.

ఈ క్రమంలో హైడ్రా మరో కీలక నిర్ణయం తీసుకుంది. ఆక్రమణలపై ప్రజల నుంచి ఫిర్యాదులు తీసుకోవాలని హైడ్రా కమిషనర్ ఏవీ రంగనాథ్ నిర్ణయం తీసుకున్నారు. ప్రతి సోమవారం బుద్ధభవన్‌లో ప్రజల నుంచి ఫిర్యాదులు స్వీకరించనున్నారు. కొత్త ఏడాది నుంచి ఈ కార్యక్రమం మెుదలు కానుంది. చెరువులు, నాలాలు, పార్కుల ఆక్రమణలపై ప్రజల నుంచి హైడ్రా అధికారులు ఫిర్యాదులు స్వీకరించనున్నారు. వచ్చే ఫిర్యాదుల ఆధారంగా ఆక్రమణలపై హైడ్రా చర్యలు తీసుకుంటుందని కమిషనర్ ఏవీ రంగనాథ్ వెల్లడించారు.

ఇక హైడ్రా కూల్చివేతలపై కమిషనర్ ఏవీ రంగనాథ్ ఇటీవల కీలక ప్రకటన చేశారు. ఇప్పటికే ఎఫ్టీఎల్ పరిధిలో నివాసం ఉంటున్న వారి ఇళ్లను కూల్చే ప్రసక్తే లేదని స్పష్టం చేశారు. ఇప్పటి వరకు హైడ్రా కఠిన చర్యలు తీసుకోవడంతోనే ఎఫ్‌టీఎల్, బఫర్‌జోన్లపై ప్రజల్లో చర్చ జరిగి అవగాహన పెరిగిందన్నారు. ఇప్పటివరకు ఎఫ్టీఎల్ పరిధిలో ఆక్రమణలు జరిగాయని.. ఇకపై వాటి పరిధిలో కొత్త నిర్మాణాలు జరగకుండా చూడటమే తమ ఉద్దేశమన్నారు. ఎఫ్‌టీఎల్‌ పరిధిలో ఉన్న నిర్మాణాలు పూర్తిగా కూల్చేసి చెరువులను పరిరక్షించడం హైడ్రా ఉద్దేశం కాదని స్పష్టం చేశారు.

ప్రజా ఉద్యమంగా చెరువుల పునరుద్ధరణ కార్యక్రమం చేపట్టనున్నట్లు హైడ్రా కమిషనర్ రంగనాథ్ స్పష్టం చేసారు. తప్పుడు అనుమతులు ఇచ్చినవి, అనుమతులు రద్దు చేసిన ఇళ్లను మాత్రమే తాము ఇప్పటి వరకు కూల్చివేశామన్నారు. పేదలవైనా, పెద్దలవైనా అనుమతులు లేకుంటే ఎటువంటి పక్షపాతం లేకుండా కూల్చివేశామని అన్నారు. గ్రేటర్ వ్యాప్తంగా చెరువుల ఆక్రమణలపై ఇప్పటికే 4 వేలకుపైగా ఫిర్యాదులు అందాయని చెప్పారు.