ప్రేమ పేరుతో నమ్మించి మోసం.. యువతి కఠిన నిర్ణయం, ఎంత పని చేశావమ్మా

మంచిర్యాల బెల్లంపల్లి పట్టణంలో విషాదం చోటు చేసుకుంది. ప్రేమ పేరుతో యువకుడు మోసం చేయటంతో ఓ యువతి కఠిన నిర్ణయం తీసుకుంది. ఇంట్లో ఫ్యానుకు ఉరేసుకొని ఆత్మహత్యకు పాల్పడింది. పెళ్లి చేసుకోవాలని కోరగా.. యవకుడు కుల ప్రస్తావన తీసుకురావటంతో మనస్తాపం చెంది సూసైడ్ చేసుకుంది. దీంతో యువతి కుటుంబంలో తీవ్ర విషాదం అలుముకుంది. పోలీసులు తెలిపిన వివరాల ప్రకారం.. బెల్లంపల్లి హనుమాన్‌బస్తీకి చెందిన జంగపల్లి సాయిస్నేహిత (21), పట్టణంలోని మహ్మద్‌ఖాసీంబస్తీకి చెందిన శ్రీనాథ్‌ అనే యువకుడు గత కొన్నేళ్లుగా ప్రేమించుకుంటున్నారు.

అయితే తనను పెళ్లి చేసుకోవాలని యువతి గత కొంత కాలంగా ఒత్తడి చేస్తుంది. పెళ్లి చేసుకోవటం ఇష్టం లేని శ్రీనాథ్ కుల ప్రస్తావన తీసుకొస్తూ పెళ్లికి నిరాకరించాడు. ఈ క్రమంలో సోమవారం (డిసెంబర్ 2) సాయంత్రం స్నేహిత ఫోన్‌లో శ్రీనాథ్‌తో సుదీర్ఘంగా మాట్లాడింది. ఏం జరిగిందో తెలియదు.. అనంతరం ఇంట్లోని ఓ గదిలోకి వెళ్లి తలుపులు వేసుకుంది. ఇంట్లోనే ఉన్న స్నేహిత చెల్లి తలుపు తట్టినా ఆమె తీయలేదు. ఇంతలో అక్కడకు శ్రీనాథ్‌ చేరుకున్నాడు. ఇద్దరూ కలిసి బలవంతంగా తలుపులు తెరిచి చూడగా.. ఆమె ఫ్యానుకు వేలాడుతూ కనిపించింది. కొన ఊపిరితో కొట్టుమిట్టాడుతున్నట్టు గుర్తించిన శ్రీనాథ్‌ మెళ్లిగా అక్కడి నుంచి జారుకున్నాడు.

అనంతరం కుటుంబ సభ్యులు సాయి స్నేహితను తొలుత బెల్లంపల్లి ప్రభుత్వాసుపత్రికి, ఆ తర్వాత మంచిర్యాలలోని ప్రభుత్వాసుపత్రికి తరలించారు. అక్కడ చికిత్స పొందుతూ సోమవారం అర్ధరాత్రి ఆమె మృతి చెందింది. బాధితురాలి తండ్రి ఇచ్చిన ఫిర్యాదు మేరకు పోలీసులు కేసు నమోదు చేసుకున్నారు. పరారీలో ఉన్న శ్రీనాథ్ కోసం గాలిస్తున్నారు. ఈ ఘటనతో స్థానికంగా విషాదం అలుముకుంది. ప్రేమ పేరుతో యువతిని మోసం చేసిన శ్రీనాథ్‌పై కఠిన చర్యలు తీసుకోవాలని స్థానికుడు డిమాండ్ చేస్తున్నారు. కాగా, యువతి ఆత్మహత్యకు కారణమైన శ్రీనాథ్ ఓ విద్యార్థి విభాగం నాయకుడిగా తెలిసింది. ప్రేమ పేరుతో మోసం చేయటంతో పాటుగా.. యువతి చనిపోవటానికి కారణమైనందును అతడిని సస్పెండ్ చేస్తూ పార్టీ కీలక నేతలు ఆదేశాలు ఇచ్చినట్లు సమాచారం.