కేటీఆర్ ఆసక్తికర వ్యాఖ్యలు

నవంబర్ 29, డిసెంబర్ 9.. ఈ రెండు తేదీలు తెలంగాణ ప్రజల జీవితాలను మలుపు తిప్పిన రోజులు. నవంబర్ 29న కేసీఆర్ దీక్షకు దిగితే.. డిసెంబర్ 9న తెలంగాణ ప్రత్యేక రాష్ట్ర ఏర్పాటు ప్రక్రియను ప్రారంభిస్తున్నట్టు..అప్పటి కేంద్ర హోంమంత్రి చిదంబరం ప్రకటించారు. అటు డిసెంబర్ 9న సోనియాగాంధీ పుట్టినరోజు కూడా. ఈ నేపథ్యంలో.. ఈ రెండు తేదీలపై బీఆర్ఎస్ వర్కింగ్ ప్రెసిడెంట్ కేటీఆర్ ఆసక్తికర వ్యాఖ్యలు చేశారు.'మహోజ్వల ఉద్యమాన్ని మలుపు తిప్పిన రోజు .. స్వరాష్ట్ర కల సాకారానికి పునాది వేసిన రోజు.. కేసిఆర్ సచ్చుడో.. తెలంగాణ వచ్చుడో.. అని చావునోట్లో తలపెట్టిన సంకల్పానికి.. దేశ రాజకీయ వ్యవస్థ దిగివచ్చిన రోజు. తెలంగాణ చరిత్రలో నవంబర్ 29 లేకపోతే.. డిసెంబర్ 9 ప్రకటన లేదు. ఈ కీలక మలుపు లేకపోతే.. జూన్ 2 గెలుపు లేనే లేదు' అని కేటీఆర్ వ్యాఖ్యానించారు.

'దగాపడ్డ నేల విముక్తి కోసం.. ఉద్యమ సారథే ప్రాణత్యాగానికి సిద్ధమై.. తెలంగాణ రాష్ట్ర ఆవిర్భావానికి ఊపిరిపోసిన.. దీక్షా విజయ్ దివస్ సందర్భంగా.. యావత్ తెలంగాణ ప్రజలకు..లక్షలాది గులాబీ సైనికులందరికీ.. హృదయపూర్వక శుభాకాంక్షలు' అని కేటీఆర్ కామెంట్ చేశారు.'గాంధీ, నెహ్రూ సహా ఎంతో మంది స్వాతంత్ర్య సమరయోధులు కొట్లాడితే భారత దేశానికి స్వాంత్ర్యం వచ్చింది అనేది ఎంత నిజమో.. కేసిఆర్ నిరాహార దీక్షతో దిగివచ్చిన నాటి కాంగ్రెస్ ప్రభుత్వం.. తెలంగాణ ఏర్పాటు ప్రకటన డిసెంబర్ 9, 2009న చేయడం అంతే నిజం. నవంబర్ 29 దీక్షా దివస్ లేకపోతే.. డిసెంబర్ 9 విజయ్ దివస్ లేదు. ఇవి లేకుండా జూన్ 2 తెలంగాణ జన్మ దివస్ లేదు' అని హరీష్ రావు ట్వీట్ చేశారు.

ప్రత్యేక తెలంగాణ సాధన ఉద్యమాన్ని మలుపు తిప్పిన రోజు కేసీఆర్‌ ఆమరణ నిరాహార దీక్ష చేపట్టిన 2009 నవంబర్‌ 29వ తేదీ. కేసీఆర్‌ సచ్చుడో తెలంగాణ వచ్చుడో అని నినదించి.. 11 రోజుల ఆమరణ నిరాహార దీక్ష చేసి ఉద్యమాన్ని విజయ తీరాలకు మరల్చారు కేసీఆర్. స్వరాష్ట్ర ఉద్యమ చరిత్రగా నిలిచారు. కట్టలు తెగుతున్న ప్రజాగ్రహాన్నీ, ప్రజాసంఘాల పటుత్వాన్నీ రాజకీయ ప్రక్రియగా మరల్చి.. స్వరాష్ట్ర లక్ష్యం నెరవేర్చిన కేసీఆర్ సంకల్ప దీక్ష.. తెలంగాణ చరిత్రలో చిరస్థాయిగా నిలిచిపోతుందని బీఆర్ఎస్ నేతలు చెబుతున్నారు.