నా బిడ్డలారా.. నేను కోరుకునేది ఇదే.. తెలంగాణ తల్లి మాటలు

రేవంత్ రెడ్డి సర్కార్ ఏడాది పాలన పూర్తయిన నేపథ్యంలో నిర్వహించిన ప్రజా పాలన.. ప్రజా విజయోత్సవాల ముగింపు వేడుకలను నిన్న (డిసెంబర్ 09న) ఘనంగా జరిపారు. కాంగ్రెస్ అగ్రనేత సోనియా గాంధీ పుట్టిన రోజును పురస్కరించుకుని.. సచివాలయంలో తెలంగాణ తల్లి విగ్రహాన్ని రేవంత్ రెడ్డి సర్కార్ అట్టహాసంగా ఆవిష్కరించింది. తెలంగాణ సంస్కృతి ఉట్టిపడేలా.. బహుజనుల తల్లిగా తెలంగాణ తల్లి విగ్రహాన్ని ప్రభుత్వం రూపొందించిన విషయం తెలిసిందే. అయితే.. నిన్న ఆవిష్కరించారో లేదో.. తెలంగాణ బిడ్డలను ఉద్దేశించి ఈరోజు తెలంగాణ తల్లి మాట్లాడింది. అదేంటి.. తెలంగాణ తల్లి మాట్లాడటమేంటీ అనుకుంటున్నారా..? నిజమండీ బాబూ..!

"నేనూ మీ తెలంగాణ తల్లిని.. ఎన్నో ఆత్మ బలిదానాల మధ్య నన్ను తెచ్చుకున్న నా బిడ్డలారా.. మీ అందరికీ నేను తోడుగా.. తెలంగాణ ముఖ చిత్ర రూపంలో నేను ఎప్పుడు మీ వెన్నంటే ఉండి మీకు ధైర్యాన్ని ఇస్తాను. తెలంగాణ ఎప్పుడు సశ్యశామలంగా కోటి రతనాలతో పచ్చని తోరణంలా కళకళలాడుతూ ఉండాలని నేను కోరుకుంటున్నాను. నా దీవెనలు మీకు ఎప్పటికీ ఉంటాయి." అంటూ తెలంగాణ తల్లి.. తెలంగాణ ప్రజలకు తన దీవెనలు.. విత్ ఎక్స్‌ప్రెషన్స్ అందించింది. ఇంకా నమ్మశక్యం కావట్లేదా? అయితే.. కింది వీడియో చూసేయండి.

ఇప్పుడైనా నమ్ముతారా..! ప్రస్తుతం డిజిటల్ లోకాన్ని దున్నేస్తున్న ఆర్టిఫిషియల్‌ ఇంటెలిజెన్స్‌ కి ఏదీ మినహాయింపు కాదన్నట్టుగా పరిస్థితి మారిపోయింది. ఏఐ టెక్నాలజీని ఉపయోగించుకుని.. నెటిజన్లు రకరకాల ఆసక్తికర వీడియోలు సృష్టిస్తున్నారు. ఫొటోల్లోని బొమ్మలతో కూడా మాట్లాడించేస్తున్నారు. కాగా.. ఇటీవల ఏఐ టెక్నాలజీని ఉపయోగించుకుని.. పలు మీడియా సంస్థలు కృత్రిమ న్యూస్ రీడర్లతో వార్తలు కూడా చదివేంచేస్తున్నారు. ఈ క్రమంలోనే.. తెలంగాణ తల్లితో కూడా మాట్లాడించేశారు కొందరు నెటిజన్లు. అందుకు సంబంధించిన వీడియో సోషల్ మీడియాలో తెగ వైరల్ అవుతోంది.

ఈ వీడియోలో తెలంగాణ తల్లే నిజంగా మాట్లాడుతుందా అన్నట్టుగా.. వచ్చే మాటలకు అనుగుణంగా పెదాల కదలికలు, కనురెప్పలు వాల్చటం, మాటలకు అనుగుణంగా ముఖంలో హావాభావాలు అచ్చంగా తెలంగాణ తల్లే మాట్లాడినట్టుగా క్రియేట్ చేయటం అందరినీ ఆశ్చర్యానికి గురి చేస్తోంది. ఈ వీడియో చూసి.. చాలా మంది ఫిదా అయిపోతున్నారు. ఈ విడియోపై నెటిజన్లు రకరకాలుగా స్పందిస్తున్నారు. ఒకనోక సందర్భంలో మహానటి సావిత్రిని చూసిన భావన కలుగుతుందని పలువురు అభిప్రాయపడుతున్నారు. నిన్నటివరకు తెలంగాణ తల్లిని చూస్తుంటే.. తమ ఇళ్లలో ఉండే తల్లిని చూస్తున్నట్టే ఉందంటూ కొందరు రాజకీయ నేతలు చెప్తూ వస్తుండగా.. ఈరోజు ఏకంగా ఆ తల్లితో మాట్లాడించి.. నిజంగానే అందరికీ దగ్గర చేసే ప్రయత్నం చేశారు.