ఆర్టీసీ బస్సుల్లో ఆ ఇబ్బందులకు చెక్..తెలంగాణ ఆర్టీసీ కీలక నిర్ణయం

ఆర్టీసీ బస్సులు ఎక్కే చాలా మంది ప్రయాణికులకు ఎదురయ్యే ప్రధాన సమస్య చిల్లర. 'టికెట్టుకు సరిపడా చిల్లర ఇచ్చి కండక్టర్‌కు సహకరించగలరు' అని అన్ని రకాల బస్సులో పెద్ద పెద్ద అక్షరాలతో రాసి పెట్టినా.. కొందరు ప్రయాణికులకు పెద్ద నోట్లు జేబులో పెట్టుకొని బస్సులు ఎక్కుతుంటారు. టికెట్ ఇచ్చిన తర్వాత పెద్ద నోట్లు ఇస్తుండటంతో చిల్లర తిరిగి ఇవ్వలేక కండక్టర్లు నానా ఇబ్బందులు పడుతుంటారు. ఈ చిల్లర విషయంలో కండక్టర్లకు, ప్రయాణికులకు మధ్య మాటా మాటా పెరిగి తీవ్ర స్థాయిలో గొడవలు జరిగిన ఘటనలు అనేకం. కొన్ని సార్లు ఆ గొడవలు పోలీస్ స్టేషన్ల వరకు వెళ్లాయి కూడా.

చిల్లర సమస్యతో విసిగిపోయిన చాలా మంది ప్రయాణికులు బస్సుల్లోనూ డిజిటల్ పేమెంట్లు పెడితే బాగుంటుందనే అభిప్రాయాన్ని వ్యక్తం చేస్తున్నారు. ఇప్పటికే తెలంగాణ ఆర్టీసీకి చెందిన సూపర్ లగ్జరీ, దూర ప్రాంతాలకు వెళ్లే నాన్‌స్టాప్ సర్వీసుల్లో ఈ డిజిటల్ చెల్లింపులను అధికారులు ప్రారంభించారు. హైదరాబాద్ సిటీ బస్సుల్లోనూ ప్రయోగత్మాకంగా డిజిటల్ పేమెంట్లకు అవకాశం కల్పించారు. ఈ మేరకు ఐటిమ్స్‌ (ఇంటెలిజెంట్‌ టికెట్‌ ఇష్యూ మిషన్‌)లో అధికారులు సాఫ్ట్‌వేర్‌ను సైతం అప్డేట్ చేశారు. ప్రయాణికులు గూగుల్‌ పే, ఫోన్‌పే, పేటీఎం, డెబిట్‌, క్రెడిట్‌కార్డులతో పాటు ఇతర డిజిటల్‌ చెల్లింపుల ద్వారా టికెట్లు పొందే అవకాశం కల్పించారు. ప్రస్తుతం హైదరాబాద్ వరకే అది కూడా కొన్ని బస్సుల్లోనే డిజిటల్ చెల్లింపులకు అవకాశం ఉండగా.. ఇక రాష్ట్రవ్యాప్తంగా అన్ని బస్సుల్లోనూ అవకాశం కల్పించనున్నారు.

రాష్ట్రంలోని అన్ని బస్సుల్లో ప్రయాణికులు, కండక్టర్లకు మధ్య త్వరలోనే చిల్లర సమస్యలకు చెక్ పడనున్నాయి. ఆర్టీసీ బస్సుల్లో ఆన్‌లైన్ పేమెంట్ల కోసం తెలంగాణ ఆర్టీసీ ఏర్పాట్లు సిద్ధం చేసింది. తొలుత హైదరాబాద్ లోని అన్ని బస్సుల్లోనూ డిజిటల్ పేమెంట్లు పరిశీలించనుంది. ఆపై రాష్ట్రమంతటా వినియోగంలోకి తీసుకొచ్చేందుకు ప్రయత్నాలు చేస్తున్నారు. ఇప్పటికే సంస్థ చేతికి 6 వేల ఆటోమేటిక్ ఫేర్ కలెక్షన్ మెషీన్లు అందాయి. ప్రస్తుతం దూరప్రాంత రూట్లలోనే ఉండగా, త్వరలో ఇవి పల్లెవెలుగు వంటి గ్రామీణ ప్రాంత బస్సుల్లోనూ ఉపయోగించనున్నట్లు అధికారులు తెలిపారు. ఈ డిజిటల్ పేమెంట్ విధానం అమల్లోకి వస్తే.. ప్రయాణికులకు, కండక్టర్లకు చిల్లర తిప్పలు తప్పనున్నాయి.