మీడియాపై దాడి ఘటనలో ,,,,మోహన్ బాబుపై మర్డర్ అటెంప్ట్ కేసు

మంచు మోహన్ బాబు ఫ్యామిలీ ఎపిసోడ్ రెండు తెలుగు రాష్ట్రాల్లో హాట్ టాఫిక్‌గా మారింది. ఇప్పటి వరకు నాలుగు గోడలకే పరిమితమైన కుటుంబ గొడవలు రచ్చకెక్కాయి. కుటుంబ వివాదం నేపథ్యంలో మంగళవారం జల్‌పల్లిలోని మోహన్‌బాబు నివాసానికి వెళ్లిన మీడియా ప్రతినిధులపై దాడి జరిగిన విషయం తెలిసిందే. మోహన్‌బాబుతో పాటు వచ్చిన బౌన్సర్లు, సహాయకులు.. గేటు లోపల ఉన్న మీడియా ప్రతినిధులను బయటకు తోసేశారు. కర్రలతో మీడియా ప్రతినిధులపై దాడిచేశారు.

ఓ ఛానల్‌ ప్రతినిధి చేతిలో నుంచి మైకు లాక్కున్న మోహన్ బాబు అతడి ముఖంపై కొట్టారు. బౌన్సర్లు నెట్టేయడంతో ఓ ఛానల్‌ కెమెరామన్‌ కింద పడ్డాడు. ఈ నేపథ్యంలో బాధితుల ఫిర్యాదు మేరకు మోహన్ బాబు పహడీ షరీప్ పోలీస్ స్టేషన్‌లో కేసు నమోదైంది. మీడియా ప్రతినిధిపై దాడి ఘటనలో ముందుగా ఆయనపై బీఎన్‌ఎస్‌ 118(1) సెక్షన్‌ కింద కేసు ఫైల్ చేశారు. తాజాగా లీగల్‌ ఒపీనియన్‌ తీసుకున్న పోలీసులు.. 109 సెక్షన్‌ కింద హత్యాయత్నం కేసు నమోదు చేశారు.

ఇక మోహన్‌బాబు కుటుంబానికి సంబంధించిన వివాదాల్లో అతి జోక్యం సరికాదని పోలీసులు, మీడియాను ఉద్దేశించి బుధవారం హైకోర్టు కీలక కామెంట్స్ చేసింది. వారి కుటుంబంలో మొదలైన సమస్యను వారే పరిష్కరించుకోవడానికి కొంత అవకాశం కల్పించాలని సూచించింది. అలా పరిష్కారం కాని పక్షంలో చట్టప్రకారం చర్యలు చేపట్టాలని పోలీసులను హైకోర్టు ఆదేశించింది. ఫిర్యాదు చేసినా.. రక్షణ కల్పించలేదని, పైగా విచారణకు హాజరుకావాలంటూ పోలీసులు ఇచ్చిన నోటీసులను సవాలు చేస్తూ మంచు మోహన్‌బాబు, విష్ణు బుధవారం దాఖలు చేసిన లంచ్ మోషన్ పిటిషన్‌కు హైకోర్టు ధర్మాసనం అత్యవసరంగా విచారణ చేపట్టింది.

వాదనలను విన్న జస్టిస్‌ బి.విజయ్‌సేన్‌రెడ్డి.. విచారణకు హాజరుకావాలంటూ మోహన్‌బాబు, విష్ణులకు పోలీసులు ఇచ్చిన నోటీసుల అమలును నిలిపివేస్తూ కీలక ఆదేశాలు జారీ చేశారు. తన ఇంటి వద్ద పోలీసు పికెట్‌ ఏర్పాటు చేయాలన్న మోహన్‌బాబు అభ్యర్థననూ న్యాయమూర్తి తిరస్కరించారు. అయితే ప్రతి రెండు గంటలకోసారి పరిస్థితులను పరిశీలిస్తుండాలని ఆదేశించారు. అనంతరం విచారణను ఈ నెల 24కు వాయిదా వేశారు.