శంషాబాద్ ఎయిర్‌పోర్టులో కొత్త టెర్మినల్‌.. జీఎంఆర్ గ్రూప్‌ ఈడీ కీలక అప్డేట్

దేశంలో ఉండే రద్దీ ఎయిర్‌పోర్టులలో హైదరాబాద్ శంషాబాద్ ఇంటర్నేషనల్ ఎయిర్‌పోర్టు ఒకటి. ఇక్కడి నుంచి అనేక జాతీయ, అంతర్జాతీయ విమానాలు రాకపోకలు సాగిస్తుంటాయి. ప్రయాణికుల రద్దీకి అనుగుణంగా మౌళిక వసతుల కల్పనపై ప్రభుత్వాలు దృష్టి పెడుతున్నాయి. విమానాల రాకపోకలు పెరుగుతున్న నేపథ్యంలో శంషాబాద్‌ ఎయిర్‌పోర్టులో రెండో టెర్మినల్‌నూ వినియోగించనున్నట్లు జీఎంఆర్‌ గ్రూప్‌ ఈడీ(సౌత్‌) ఎస్‌జీకే కిశోర్‌ వెల్లడించారు. దేశంలోనే అత్యంత వేగంగా వృద్ధి సాధిస్తున్న ఎయిర్‌పోర్టుగా శంషాబాద్‌ ఘనత సాధించిందని చెప్పారు.

బుధవారం కృత్రిమ మేధ (ఏఐ) ఆధారంగా పని చేసే ఎయిర్‌పోర్ట్‌ ప్రెడిక్టివ్‌ ఆపరేషన్‌ సెంటర్‌ను (ఏపీఓసీ) కేంద్ర పౌర విమానయాన శాఖ మంత్రి కింజరాపు రామ్మోహన్‌ నాయుడు‌తో కలిసి ఆయన ప్రారంభించారు. అనంతరం మాట్లాడిన కిశోర్.. శంషాబాద్ ఎయిర్‌పోర్టులో ప్రయాణికుల సంఖ్య ప్రస్తుతం ఏడాదికి 3 కోట్లుగా ఉందన్నారు. 4.5 కోట్లకు చేరుకోగానే రెండో టెర్మినల్‌ను అందుబాటులోకి తీసుకొస్తామని చెప్పారు. ప్రయాణికులకు మరింత నాణ్యమైన సేవలను అందించేందుకు ఏఐ సాయంతో డిజిటల్‌ ట్విన్‌ ప్లాట్‌ఫాం విధానాన్ని ఎయిర్‌పోర్టులో ప్రవేశపెట్టినట్లు చెప్పారు.

ఇటీవల కాలంలో విమానాలకు బెదిరింపు కాల్స్‌ ఎక్కువయ్యాయని.. ఈ నేపథ్యంలో ప్రయాణికుల భద్రతపై ప్రత్యేక దృష్టి కేంద్రీకరించినట్లు చెప్పారు. సైబర్‌ భద్రతకూ పకడ్బందీ చర్యలు చేపట్టినట్లు వివరించారు. కేంద్ర మంత్రి రామ్మోహన్ నాయుడు మాట్లాడుతూ.. హైదరాబాద్‌ విమానాశ్రయం అద్భుతమైన వృద్ధిని సాధించిందన్నారు. 2010 సంవత్సరంలో 65 లక్షల మంది ప్రయాణికులు, 220 రోజువారీ విమాన సర్వీసుల నడిచేవని.. ప్రస్తుతం ఏడాదికి 3 కోట్ల మంది ప్రయాణికులు, 550 రోజువారీ విమాన సర్వీసుల స్థాయికి ఎదిగిందని పేర్కొన్నారు. దేశీయ విమానయాన రంగంలో కూడా అద్భుతమైన పురోగతి ఏర్పడుతున్నదని అన్నారు. వరంగల్ ఎయిర్‌పోర్టును త్వరితగతిన పూర్తి చేస్తామన్నారు. వచ్చే 5 ఏళ్లలో దేశవ్యాప్తంగా 50 కొత్త విమానాశ్రయాలు నిర్మించడమే మా లక్ష్యమని రామ్మోహన్ నాయుడు స్పష్టం చేశారు. హవాయి చెప్పల్ సే హవాయి సఫర్ అనే నినాదంతో భారత విమానయాన మంత్రిత్వ శాఖ పనిచేస్తుందని ఆయన వెల్లడించారు.