కాజీపేట రైల్వే స్టేషన్‌‌కు నయా లుక్.. ఎయిర్‌పోర్టు తరహాలో, ప్రయాణికులకు సరికొత్త అనుభూతి

అమృతభారత్‌ పథకం కింద తెలంగాణలోని పలు రైల్వే స్టేషన్లకు కేంద్రం అభివృద్ధి చేస్తోంది. ఇప్పటికే హైదరాబాద్‌లో అతిపెద్ద రైల్వే టెర్మినల్‌గా చర్లపల్లి స్టేషన్‌ను డెవలప్ చేయగా.. ఈనెల 28న ప్రారంభించనున్నారు. ఇక ఈ పథకం కింది కాజీపేట రైల్వే స్టేషన్‌‌ను కూడా అభివృద్ధి చేస్తుండగా.. వేగంగా నిర్మాణ పనులు సాగుతున్నాయి. స్టేషన్‌ ముందుభాగాన్ని ఎయిర్‌పోర్టు తరహాలో నిర్మించనున్నారు. అమృత్‌ భారత్‌ పథకంలో కాజీపేట డీఈఎన్‌ విభాగం పరిధిలో భాగంగా రూ.36 కోట్లతో కాజీపేట, యాదాద్రి, జనగామ రైల్వే స్టేషన్లను ఆధునికీకరిస్తున్నారు. ఇందులో ఒక్క కాజీపేట రైల్వే స్టేషన్‌కే రూ.20 కోట్లు వెచ్చిస్తున్నారు.

గతంలో ప్రకటించిన నిర్మాణాలకు భిన్నంగా స్టేషన్‌ ఎలివేషన్‌లో పలు కీలక మార్పులు చేస్తున్నారు. మరో మూడు నెలలు అంటే.. మార్చి చివరినాటికి పూర్తి చేయాలని అధికారులు టార్గెట్‌గా పెట్టుకున్నారు. కాజీపేట రైల్వే స్టేషన్‌ అభివృద్ధిలో భాగంగా స్టేషన్ ముందు భాగంలో రైలు బోగి మాదిరి నిర్మాణంలో ఓ హోటల్‌ను నిర్మిస్తున్నారు. ప్రస్తుతం దీని డిజైన్‌ ఇంకా ఫైనల్ చేయలేదు. స్టేషన్‌ ముందు భాగాన ఆరు పచ్చని గ్యాలరీలు నిర్మించి వాటి మధ్య నుంచి వెహికల్స్ వెళ్లే విధంగా నిర్మాణాలు చేపట్టారు. ప్రయాణికులు చేరుకోవటానికి, స్టేషన్ నుంచి వెళ్లేందుకు వీలుగా ఆటో స్టాండ్, కార్‌ పార్కింగ్, టూ వీలర్ పార్కింగ్‌లను విశాలంగా నిర్మిస్తున్నారు. ఎయిర్‌పోర్టు తరహాలో వెహికల్స్ నేరుగా స్టేషన్‌ ముందుకు వచ్చి ప్రయాణికులను దింపి వెళ్లే విధంగా నిర్మాణాలు చేపడుతున్నారు.

వీటితో పాటుగా ప్రయాణికుల కోసం వెయిటింగ్ లాంజ్, ఏసీ ప్రయాణికులు వెయిటింగ్ కోసం ప్రత్యేకంగా గదులు నిర్మిస్తున్నారు. సాధారణ వెయిటింగ్ లాంజ్‌ల నిర్మాణం పూర్తి కావొచ్చింది. ఇందులో కార్పొరేట్‌ స్థాయిలో టాయిలెట్స్, మూత్రశాలలు నిర్మిస్తున్నారు. ప్రయాణికులు, బయటి వారి కోసం పే అండ్‌ యూజ్‌ టాయిలెట్స్ అందుబాటులో ఉంటాయి. స్టేషన్‌లో ఎక్కడా ఖాళీ లేకుండా కవర్‌ ఓవర్‌ ప్లాటుఫారం(షెడ్లు) నిర్మిస్తున్నారు. కాజీపేటలో రెండు ప్లాట్‌ఫారాల మధ్య వెళ్లడానికి ఫుట్ ఓవర్ బ్రిడ్జిలు సైతం నిర్మిస్తున్నారు. ఇది స్టేషన్‌కు ప్రధాన ఆకర్షణగా నిలవనుంది. ఎఫ్‌ఓబీకి రెండు వైపులా లిఫ్టులు, ఎస్కులేటర్లు ఏర్పాటు చేయనున్నారు. 210 అడుగులతో రెండు వైపులా ర్యాంపులు ఏర్పాటు చేస్తున్నారు. మెుత్తంగా ఎయిర్‌పోర్టు తరహాలో స్టేషన్‌ను అద్భుతంగా తీర్చిదిద్దుతున్నారు.