అయ్యో వరప్రసాదూ.. ఎంత పనైందయ్యా.. నీ కష్టం పగోనికి కూడా రావొద్దు సామీ..!

తన పేరు వరప్రసాద్. కడప జిల్లా రైల్వే కోడూరు ఆయన సొంతూరు. కూటి కోసం కోటి విద్యలు.. అందులో తనకు తెలిసిన డ్రైవింగ్‌నే తన బతుకుదెరువుగా ఎంచుకున్నాడు వరప్రసాద్. సొంతూరిని వదిలిపెట్టి.. హైదరాబాద్‌కు వచ్చి ఓ ప్రైవేటు కంపెనీలో డ్రైవర్‌గా చేరాడు. రూమ్‌లో ఉంటే ఖర్చులు ఎక్కువవుతాయని ఆలోచించి.. కూకట్‌పల్లి హౌసింగ్ బోర్డులోని ఓ హాస్టల్‌లో ఉంటున్నాడు. రోజూ సమయానికి విధులకు వెళ్లటం.. డ్యూటీ అయిపోగానే మళ్లీ హాస్టల్‌కు రావటం.. అక్కడ పరిచయమైన హాస్టల్ స్నేహితులతో అప్పుడప్పుడు అలా బయటికి వెళ్లి రావటం వరప్రసాద్ డైలీ రొటీన్. ఇలా సాఫీగా సాగిపోతున్న వరప్రసాద్ జీవితంలో ఓ అర్ధరాత్రి ఊహించని పరిణామం ఎదురైంది. తన పేరే తనకు అనుకోని ముప్పు తీసుకొచ్చిపెట్టింది.

రోజూలాగే ఆ రోజు (డిసెంబర్ 17న) కూడా వరప్రసాద్ డ్యూటీకి వెళ్లి.. తిరిగి హాస్టల్‌కు వచ్చాడు. ఎంచక్కా హాస్టల్‌లో పెట్టిన భోజనాన్ని కడుపు నిండా తినేసి.. స్నేహితులతో ముచ్చట్లలో మునిగిపోయాడు. ఇంతలో.. "వరప్రసాద్‌ నీకోసం ఎవరో వచ్చారు" అంటూ.. పక్క గది అతను చెప్పాడు. ఆ మాట విని.. ఒకింత ఆశ్చర్యపోయాడు వరప్రసాద్. "అదేంటీ.." అన్నట్టుగా తన మొబైల్ తీసి టైం చూసుకున్నాడు. అర్ధరాత్రి కావొస్తోంది. "ఈ సమయంలో నాకోసం ఎవరొచ్చారబ్బా.. అలా వచ్చేవాళ్లు ఇక్కడ ఎవరూ లేరే.." అనుకుంటూనే బెడ్ దిగి.. బయటకు బయలుదేరాడు.

ఇంతలోనే.. "ముగ్గురు మగాళ్లతో పాటు ఓ అమ్మాయి కూడా ఉందిరోయ్.." అంటూ ఆ సమాచారం తెచ్చిన వ్యక్తి ఉత్సాహంగా చెప్పాడు. వరప్రసాద్ మనసులో మరింత అలజడి పెరిగింది. గది బయటకు వెళ్లిన వరప్రసాద్.. మళ్లీ వెనక్కి వచ్చి అద్దంలో జుట్టు సవరించుకుని బయలుదేరాడు. మనసులో "ఇంతకూ వాళ్లు ఎవరబ్బా.." అనే అనుమానం రెట్టింపయ్యింది. అదే అనుమానంతో హాస్టల్ కిందికి వెళ్లాడు.

హాస్టల్ కిందికి వెళ్లిన వరప్రసాద్‌ను చూసి.. ఆ నలుగురు (ముగ్గురు అబ్బాయిలు, ఓ అమ్మాయి) "నువ్వేనా వరప్రసాద్ అంటే.." అని అడిగారు. "అవును" అని కన్ఫార్మ్ చేసి.. "మీరూ..?" అని ప్రశ్నించేలోపే.. వరప్రసాద్‌ను ఆ నలుగురూ కలిసి వీర కుమ్ముడు కుమ్మేశారు. కిందపడేసి ఇష్టమొచ్చినట్టుగా కొట్టారు. ఎవరు మీరు.. నన్నెందుకు కొడుతున్నారు..? అంటూ వరప్రసాద్ అరుస్తున్నా.. పట్టించుకోకుండా బూతులు తిడుతూ దాడి చేశారు. తప్పించుకునేందుకు ప్రయత్నించినా.. పారిపోకుండా పట్టుకుని కొట్టారు.

వరప్రసాద్‌ను కొడుతుండటం చూసిన మిగతా యువకులు.. ఇదేదో యవ్వారం వేరేగా ఉందని వెంటనే పోలీసులకు సమాచారం అందించారు. సమాచారం అందుకున్న పోలీసులు నిమిషాల్లోనే ఘటన స్థలికి చేరుకున్నారు. వరప్రసాద్ మీద దాడి చేసిన.. యువతి, ముగ్గురు యువకుల పేర్లు వివరాలు అడిగి తెలుసుకున్నారు. నలుగురూ పోలీస్ స్టేషన్‌కు రావాలని చెప్పి అక్కడినుంచి వెళ్లిపోయారు. పోలీసులు అలా వెళ్లారో లేదో.. ఈ నలుగురు క్షణాల్లో మాయమైపోయారు. దాడిలో గాయపడిన వరప్రసాద్‌కు పెదవిలోపల గాయమవటమే కాకుండా.. దవడకు కూడా గట్టిగానే దెబ్బలు తగిలాయి. హాస్టల్ యువకులు.. వరప్రసాద్‌ను వెంటనే దగ్గర్లోని ఆస్పత్రికి తరలించిన చికిత్స చేపించారు. అయితే.. వర ప్రసాద్‌ మీద ఆ నలుగురు ఎందుకు దాడి చేశారనే కదా.. మీ డౌటనుమానం అంతా.. అక్కడికే వస్తున్నా.

పోలీసులు వచ్చి ఆ నలుగురిని ఆరా తీశారు. "వాన్ని ఎందుకు కొడుతుండ్రురా..?" అని పోలీసులు అడిగితే.. వరప్రసాద్ తన భార్యకు ఫోన్ చేసి వేధిస్తున్నాడని.. దాడి చేసిన వాళ్లలో ఓ వ్యక్తి చెప్పుకొచ్చాడు. వాళ్ల వెర్షన్ విన్న పోలీసులు.. వరప్రసాద్‌ను పిలిచి.. "ఏంరా.. బలిసిందా.. ఆడోళ్లకు ఫోన్లు చేసి ఏడిపిస్తున్నవా.." అంటూ గుర్రుగా అడిగారు. "నేనేం చేయలేదు సార్.. నాకేం తెల్వదు.." అంటూ ఏడుస్తూ చెప్పాడు. "మరి వాళ్లేమో అట్ల జెప్తున్నారేందిరా..?" అంటే.. "ఏమో సార్.." అన్నాడు అమాయకంగా. "వాడేం చేయలేదట కదా.. అసలు వీడే చేసిండని మీకెట్ల తెలుసు.." అని పోలీసుల నుంచి మరో ప్రశ్న. "లేదు సార్.. తన పేరు వరప్రసాద్ అని.. కేపీహెచ్‌బీలోని ధర్మారెడ్డి కాలనీలోని హాస్టల్‌లో ఉంటానని వాడే చెప్పాడు సార్. అందుకే ఇక్కడికొచ్చి అన్ని హాస్టళ్లలో వరప్రసాద్ అని ఎవరైనా ఉన్నారా అడుగుతూ వస్తే.. ఈ హాస్టల్‌లో ఉన్నట్టు చెప్పిండ్రు." అని చెప్పటంతో పోలీసులకు సీన్ మొత్తం సమజైంది.

ఆ నలుగురు కొట్టాలనుకున్నది వరప్రసాద్‌నే కానీ.. ఆ వరప్రసాద్ ఈ దెబ్బలుపడ్డ వ్యక్తి కాదు.. ఇంకెవరో వరప్రసాద్‌. కేవలం పేర్లు ఒకటే కావటం వల్ల ఎవరో వరప్రసాద్‌కు పడాల్సిన దెబ్బలు మన గాలి వరప్రసాద్‌కు పడ్డాయన్న మాట. మరి ఈ నలుగురు ఎవరిపై దాడి చేయాలనుకున్నారో ఆ వరప్రసాద్ ఎవరబ్బా అని అరా తీస్తే.. దెబ్బలు పడిన వరప్రసాద్ ఉండే హాస్టల్‌ నుంచి రెండో గల్లీలో ఉండే మరో హాస్టల్‌లో ఆ ప్రబుద్ధుడు ఉంటాడని తెలిసింది. ఈ విషయం తెలిసి.. మన వరప్రసాద్.. పరుగెత్తుకుంటూ వచ్చి వరప్రసాద్ నీకోసం ఎవరో వచ్చారని చెప్పిన వ్యక్తిని తలచుకుని కోపంతో పళ్లు కొరికాడు. కానీ.. దవడకు తగిలిన దెబ్బలతో నొప్పితో విలవిల్లాడిపోయాడు. ఇంకేముంది.. పోలీసుల దగ్గరికి వెళ్లి.. తనను కొట్టిన వాళ్లపై కంప్లైంట్ చేస్తే.. వాళ్లు కేసు నమోదు చేసుకుని.. సీసీ కెమెరాల్లో రికార్డయిన దృశ్యాల ఆధారంగా దర్యాప్తు చేస్తున్నారు. "పాపం వరప్రసాదూ.. ఎంత పనైందయ్యా.. నీకు వచ్చిన కష్టం పగోనికి కూడా రావొద్దయ్యా..!!"