ఆ పట్టణం చుట్టూ ఔటర్ రింగ్ రోడ్డు.. ట్రాఫిక్ సమస్యకు చెక్

తెలంగాణలో కొత్త రహదారులు, జాతీయ రహదారుల విస్తరణకు కేంద్ర, రాష్ట్ర ప్రభుత్వాలు ప్రణాళికలు రచిస్తున్నాయి. ట్రాఫిక్ సమస్యలు చెక్ పెట్టడటంతో పాటుగా.. భవిష్యత్తు అవసరాలను దృష్టిలో పెట్టుకొని రోడ్ల నిర్మాణాలు చేపడుతున్నారు. ఇక తాండూరులో ట్రాఫిక్‌ సమస్యలు పరిష్కరించేందుకు.. రోడ్డు యాక్సిడెంట్లను అరికట్టేందుకు అక్కడ ఔటర్ రింగు రోడ్డును మంజూరు చేసింది. నాలుగేళ్ల క్రితమే రోడ్డు మంజూరు చేయగా.. ఇప్పటికీ పనులు పూర్తి కాలేదు. రోడ్డు పొడవు మెుత్తం 13 కి.మీ కాగా.. 8.92 కి.మీ పూర్తయింది. అందుకు 48 కోట్లు ఖర్చు చేసింది. మరో రూ.30 కోట్లు ఖర్చు చేస్తే మెుత్తం నిర్మాణం పూర్తవుతుంది.

రోడ్డు మంజూరు అయిన వెంటనే ఆర్‌ అండ్‌ బీ అధికారుల పనులు ప్రారంభించారు. తాండూరు గ్రామీణ సీఐ కార్యాలయం పక్కన నేషనల్ హైవే నుంచి చెంగోల్, అంతారంతండా, భూకైలాష్, అంతారం, సంగారెడ్డి రహదారి మీదుగా ఖాంజాపూర్‌ గేటు వరకు తారు రోడ్డును నిర్మించారు. అయితే చెంగోల్, అంతారంతండా, అంతారం గ్రామానికి చెందిన కొంత మంది రైతులు తమ భూములకు సంబంధించి నష్టపరిహారం డబ్బులు చెల్లించలేదంటూ రోడ్డు నిర్మాణ పనులు అడ్డుకున్నారు. పనులు పూర్తయినచోట రోడ్డును వినియోగంలోకి తీసుకురాకుండా కంచెలు, నాపరాయి వ్యర్థాల కుప్పలుగా పోశారు. దీంతో ఈ రహదారి 70 శాతం నిర్మాణం పూర్తయినా వినియోగంలోకి తెచ్చే అవకాశం లేకుండా పోయింది.

నష్ట పరిహారం కోసం రైతులు ఎమ్మార్వో, ఆర్డీఓ కార్యాలయాలకు రెండేళ్లుగా తిరుగుతున్నా ఫలితం లేకుండా పోయింది. ఎట్టకేలకు స్థానిక ఎమ్మెల్యే మనోహర్‌రెడ్డి ఆదేశాలతో తాండూరు సబ్‌కలెక్టర్‌ ఔటర్ రింగు రోడ్డు సమస్యలపై దృష్టిసారించారు. ప్రత్యేకంగా రైతులతో ఆర్డీఓ ఆఫీసులో మీటింగ్ కూడా ఏర్పాటు చేయించారు. గతంలో భూములు కోల్పోయిన రైతులకు ఎకరాకు రూ.18లక్షల చొప్పున నష్టపరిహారాన్ని ఇచ్చారు. చెంగోల్‌కు చెందిన 17 మంది రైతులకు మాత్రం పరిహారం చెల్లించలేదు. దీంతో సబ్‌కలెక్టర్‌ ఆయా రైతుల భూములకు పరిహారం ఇచ్చేందుకు సిద్ధమయ్యారు. పరిహారం చెల్లింపుల ప్రక్రియ పూర్తయిన వెంటనే గ్రామీణ సీఐ కార్యాలయం వద్ద జాతీయ రహదారి నుంచి ఖాంజాపూర్‌ గేటు వద్ద హైదరాబాద్‌ రోడ్డు మార్గం దాదాపు 9 కి.మీ. బాహ్యవలయ రహదారి సమకూరుతుంది. మిగిలిన పనులు కూడా పూర్తి చేసి ఔటర్ రింగు రోడ్డును అందుబాటులోకి తీసుకురానున్నారు.