గాంధీ భవన్‌కు అల్లు అర్జున్ మామ.. పీసీసీ అధ్యక్షుడు కీలక వ్యాఖ్యలు

తెలంగాణలో అల్లు అర్జున్, పుష్ప-2 సినిమా విషయంలో తీవ్ర రాజకీయ దుమారం రేగుతోంది. ఈ నేపథ్యంలోనే ఆ వ్యవహారంలో కీలక పరిణామం చోటు చేసుకుంది. కాంగ్రెస్ పార్టీ నేత, అల్లు అర్జున్ మామ కంచర్ల చంద్రశేఖర్ రెడ్డి.. తన పార్టీ కీలక నేతలను కలిసేందుకు గాంధీ భవన్‌కు వెళ్లడం ఇప్పుడు ప్రాధాన్యం సంతరించుకుంది. గత కొన్ని రోజులుగా పుష్ప-2 సినిమాపై, అల్లు అర్జున్‌పై కాంగ్రెస్ పార్టీ నేతలు తీవ్ర విమర్శలు చేస్తుండటం, అల్లు అర్జున్‌పై సంధ్య థియేటర్ తొక్కిసలాట కేసు సహా అనేక పరిణామాల వేళ.. చంద్రశేఖర్ రెడ్డి గాంధీ భవన్‌కు వెళ్లారు. అయితే అక్కడ చంద్రశేఖర్ రెడ్డికి.. పీసీసీ చీఫ్ మహేష్ కుమార్ గౌడ్ కలవలేదని తెలుస్తోంది. అయితే తాను ప్రెస్‌మీట్‌లో ఉన్నానని.. అందుకే చంద్రశేఖర్ రెడ్డిని కలవలేకపోయాయనని పీసీసీ చీఫ్ వెల్లడించారు. తాను చంద్రశేఖర్ రెడ్డికి ఫోన్ చేసినట్లు తెలిపారు.

ఇక గాంధీభవన్‌కు చేరుకున్న చంద్రశేఖర్ రెడ్డి.. అక్కడ కాంగ్రెస్ తెలంగాణ రాష్ట్ర వ్యవహారాల ఇంఛార్జ్‌ దీపాదాస్‌ మున్షీని కలిసినట్లు తెలుస్తోంది. దీపాదాస్ మున్షీతో పాటు పీసీసీ చీఫ్ అధ్యక్షుడు మహేష్ కుమార్ గౌడ్‌, సీడబ్ల్యూసీ సభ్యుడు కొప్పుల రాజు ఉన్నారనే సమాచారంతో చంద్రశేఖర్ రెడ్డి గాంధీభవన్‌కు వెళ్లినట్లు సంబంధిత వర్గాలు వెల్లడించాయి. ఇక చంద్రశేఖర్ రెడ్డి గాంధీ భవన్‌కు వెళ్లిన సమయంలో పీసీసీ అధ్యక్షుడు మహేష్ కుమార్ గౌడ్.. మీడియా సమావేశంలో ఉన్నందున ఆయన.. దీపాదాస్‌ మున్షీని మాత్రమే కలిసి అక్కడి నుంచి వెళ్లిపోయినట్లు గాంధీ భవన్ వర్గాలు తెలిపాయి.

ఇక ఆ విషయం తెలుసుకున్న పీసీసీ అధ్యక్షుడు మహేష్ కుమార్‌ గౌడ్.. ఆ తర్వాత చంద్రశేఖర్‌ రెడ్డికి ఫోన్‌ చేసి మాట్లాడినట్లు స్వయంగా. ఆయన మీడియాకు వెల్లడించారు. అల్లు అర్జున్ మామ చంద్రశేఖర్‌ రెడ్డి కాంగ్రెస్ నేత అని.. ఆయన తనకు మంచి మిత్రుడు అని పీసీసీ చీఫ్ తెలిపారు. చంద్రశేఖర్‌ రెడ్డి గాంధీ భవన్‌కు వచ్చిన సమయంలో తాను మీడియా సమావేశంలో ఉన్నానని.. అందుకే ఆయన దీపాదాస్‌ మున్షీని కలిసి వెళ్లిపోయినట్లు చెప్పారు. అయితే దీపాదాస్ మున్షీతో చంద్రశేఖర్‌ రెడ్డికి అంతగా పరిచయం లేకపోవడంతో తొందరగా మాట్లాడి వెళ్లిపోయారని పేర్కొన్నారు. అనంతరం తాను చంద్రశేఖర్‌ రెడ్డికి ఫోన్‌ చేసి మాట్లాడానని.. ఒకట్రెండు రోజుల్లో కూర్చొని మాట్లాడదాం అని చెప్పినట్లు మహేష్ కుమార్‌ గౌడ్‌ తెలిపారు.