అల్లు అర్జున్ ఇష్యూ,,,ఎవరూ నోరు విపొద్దని సూచన,,,గాంధీభవన్‌ నుంచి కాంగ్రెస్ నేతలకు కీలక సూచన

సంధ్య థియేటర్ ఘటన, అల్లు అర్జున్ అరెస్ట్ వ్యవహారం ప్రస్తుతం దేశవాప్తంగా హాట్ టాఫిక్‌గా మారింది. ఈనెల 4న పుష్ప 2 మూవీ బెనిఫిట్ షో సందర్భంగా థియేటర్ వద్ద జరిగిన తొక్కిసలాటలో రేవతి అనే మృతి చెందగా ఆమె తొమ్మిదేళ్ల కుమారుడు శ్రీతేజ్ ప్రస్తుతం ఆసుపత్రిలో చావుబతుకుల మధ్య పోరాడుతున్నారు. పర్మిషన్ లేకుండా అల్లు అర్జున్ థియేటర్‌కు రావటంతోనే తొక్కిసలాట జరిగిందని ఆయనపై కేసు నమోదైంది. నాంపల్లి కోర్టు రిమాండ్ విధించటం ఆ తర్వాత చర్లపల్లి జైలులో ఓ రాత్రి ఉండాల్సి రావటం హైకోర్టు బెయిల్ వంటి కీలక పరిణామాలు చోటు చేసుకున్నాయి.

అయితే అల్లు అర్జున్ ఇష్యూపై ఇటీవల సీఎం రేవంత్ రెడ్డి అసెంబ్లీలో చేసిన కామెంట్స్‌తో ఈ వ్యవహారం మళ్లీ రాజుకుంది. కాంగ్రెస్ ప్రభుత్వం కక్షపూరితంగానే అల్లు అర్జున్‌పై కేసు పెట్టిందని పలువురు ఆరోపిస్తున్నారు. కేంద్రమంత్రి బండి సంజయ్ సహా, పలువురు ప్రతిపక్ష నేతలు ప్రభుత్వ తీరును తప్పుబట్టారు. అదే సమయంలో అల్లు అర్జున్ చేసిందని తప్పని.. కాంగ్రెస్ మంత్రులు, నేతలు ప్రెస్‌మీట్లు పెట్టి మరీ మండిపడుతున్నారు. దీనిపై జాతీయ స్థాయిలోనూ చర్చ జరుగుతోంది. ఈ నేపథ్యంలో కాంగ్రెస్ పార్టీ అప్రమత్తమైంది. పార్టీకి, ప్రభుత్వానికి డ్యామేజ్ కాకుండా గాంధీ భవన్ నుంచి నేతలకు కీలక ఆదేశాలు జారీ చేసినట్లు తెలిసింది.

అల్లు అర్జున్ విషయంలో ఇప్పటికే సీఎం రేవంత్ రెడ్డి, పీసీసీ చీఫ్‌ మహేష్ కుమార్ గౌడ్ సమగ్రమైన వివరాలతో ప్రకటనలు చేశారని గాంధీ భవన్ వర్గాలు వెల్లడించాయి. తెలుగు సినీ పరిశ్రమ, నటులపై ఆరోపణలు చేస్తూ.. ఇక నుంచి ఎవరూ ప్రకటనలు చేయొద్దని పీసీసీ సూచించినట్లు తెలుస్తోంది. ప్రెస్‌మీట్స్‌, డిబేట్స్‌, సమావేశాల్లో.. సినీ పరిశ్రమ, నటులను కించపరిచేలా మాట్లాడవద్దని కాంగ్రెస్ నేతలకు గాంధీ భవన్ కీలక సూచన చేసినట్లు సమాచారం.

ఇక ఈ సంధ్య థియేటర్ ఘటనలో అల్లు అర్జున్‌కు పోలీసులు సోమవారం నోటీసులు జారీ చేసిన సంగతి తెలిసిందే. నేడు విచారణకు హాజరు కావాలని నోటీసులు జారీ చేయగా.. ఉదయం 11 గంటల సమయంలో ఆయన చిక్కడపల్లి పోలీసు స్టేషన్‌కు చేరుకున్నారు. ప్రస్తుతం సెంట్రల్ జోన్ డీసీపీతో పాటు చిక్కడపల్లి ఏసీపీ ఆయన్ను ప్రశ్నిస్తున్నారు. లాయర్ అశోక్ రెడ్డి సమక్షంలో ఆయన్ను పోలీసులు ప్రశ్నిస్తున్నారు.