వారానికి రూ.200 కిస్తీ డబ్బులు కట్టలేక దంపతులు ఆత్మహత్య.. అనాథలైన ఇద్దరు చిన్నారులు

జయశంకర్ భూపాలపల్లి జిల్లాలో విషాదకర ఘటన చోటు చేసుకుంది. పేదరికం దంపతులను మింగేసింది. ఇద్దురు చిన్నారులను అనాథలను చేసింది. వారానికి రూ.200 కిస్తీ డబ్బులు కట్టలేక దంపతులు తనువు చాలించారు. అప్పచ్చిన వారి వేధింపులు, అనారోగ్య సమస్యలతో ఈ లోకం విడిచి వెళ్లిపోయారు. తమ 15 ఏళ్ల లోపు ఇద్దరు పిల్లలను అనాథలను చేసి తనువు చాలించారు. గుండెల్ని పిండేసే ఈ ఘటన భూపాలపల్లి మండలం కమలాపూర్ గ్రామంలో చోటు చేసుకుంది.

వివరాల్లోకి వెళితే.. గ్రామానికి చెందిన బానోత్ దేవేందర్ (37), చందన (32) దంపతులు. వీరికి పాత పెంకుటిళ్లు తప్ప ఆస్తులేవీ లేవు. వ్యవసాయ కూలీ పనులు చేసుకుంటూ కుటుంబాన్ని పోషించుకునేవారు. వీరికి ఇద్దరు కుమారులు రిషి (14), జశ్వంత్ (12) కాగా.. పిల్లలిద్దరూ గ్రామంలోని ప్రభుత్వ పాఠశాలలో చదువును కొనసాగిస్తున్నారు. కూలీ చేయగా.. వచ్చే డబ్బులతోనే కడుపు నింపుకునేవారు. అయితే గ్రామంలోని కొంతమంది మహిళలను గ్రూపుగా ఏర్పడి.. ఓ ప్రైవేటు ఫైనాన్స్ వ్యాపార సంస్థ నుంచి రుణాలు తీసుకున్నారు. ఆ గ్రూపులో సభ్యురాలిగా చేరిన చందన కొంత లోన్ తీసుకుంది. సంఘం సభ్యులంతా కలిసి రూ.2.50 లక్షల వరకు అప్పు తీసుకోగా.. దీనికి ప్రతి వారం రూ. 200 కిస్తీ కట్టాల్సి ఉంటుంది.

కొన్నాళ్ల పాటు చందన సక్రమంగానే కిస్తీ డబ్బులు చెల్లించింది. అయితే ఇంతలో భర్త అనారోగ్యం పాలయ్యాడు. దేవేందర్ పనికి వెళ్లే పరిస్థితి లేకపోవటంతో.. కుటుంబ పోషణ భారం మెుత్తం చందనపై పడింది. తాను కూలీ చేయగా.. వచ్చే డబ్బులతో కుటుంబ పోషణే భారమైంది. దీంతో వారానికి కట్టే రూ. 200 కిస్తీ చెల్లింపులు ఆగిపోయాయి. దీనిపై ఫైనాన్స్ యజమాని ఒత్తిడి చేశాడు. సక్రమంగా డబ్బులు కట్టాలని వేధింపులకు గురి చేశారు. దీంతో భార్యాభర్తలు తీవ్ర మనోవేదనకు గురయ్యారు.

ఇక బతికుండి లాభం లేదనుకున్న చందన.. డిసెంబరు 6న గడ్డి మందు తాగంది. గమనించిన ఇరుగు పొరుగు వారు ఆమెను వరంగల్ ఎంజీఎం ఆసుపత్రికి తరలించారు. ఆమె పరిస్థితిపై ఆందోళనతో దేవేందర్ అదే నెల 20న ఇంట్లో ఉరి వేసుకుని సూసైడ్ చేసుకున్నాడు. ఆసుపత్రిలో చికిత్స పొందుతున్న చందన మంగళవారం మృతిచెందింది. దీంతో వారి ఇద్దరు పిల్లలు అనాథలుగా మారారు. ఈ ఘటన గ్రామంలో విషాదాన్ని నింపగా.. చిన్నారులను ప్రభుత్వం ఆదుకోవాలని స్థానికులు కోరుతున్నారు.