కొత్త రేషన్ కార్డు జాబితాలో పేరు లేని వారికి శుభవార్త.. మరో అవకాశం, మంత్రి కీలక ప్రకటన

తెలంగాణ ప్రజలకు రేవంత్ రెడ్డి సర్కార్ బిగ్ అప్డేట్ ఇచ్చింది. ఇప్పటికే.. జనవరి 26 నుంచి తెలంగాణలో మూడు కొత్త పథకాలు ప్రారంభించనున్నట్టు సీఎం రేవంత్ రెడ్డి ప్రకటించిన విషయం తెలిసిందే. అన్నదాతలకు రైతు భరోసా పథకం, రైతు కూలీలకు ఇందిరా ఆత్మీయ భరోసా పథకంతో పాటు ఎప్పుడెప్పుడా అని ఎదురుచూస్తున్న కొత్త రేషన్ కార్డుల పంపిణీ ప్రక్రియను కూడా జనవరి 26 నుంచి ప్రారంభించనున్నారు. ఈ మేరకు.. గ్రామాల్లో అధికారులు సర్వేలు నిర్వహిస్తున్నారు. ఇందులో భాగంగానే.. గ్రామాల్లో కొత్త రేషన్ కార్డు లబ్ధిదారులకు సంబంధించిన జాబితాలు ప్రకటిస్తున్నారు. అయితే.. ఈ జాబితాల్లో చాలా మంది పేర్లు లేకపోవటంతో.. ప్రజలు ఆందోళన చెందుతున్నారు. తమకు కొత్త రేషన్ కార్డులు రావేమో అని.. టెన్షన్ పడుతున్నారు. ఈ సందర్భంగా.. మంత్రి ఉత్తమ్ కుమార్ రెడ్డి శుభవార్త వినిపించారు.

శనివారం (జనవరి 18న) మీడియాతో మాట్లాడిన మంత్రి ఉత్తమ్ కుమార్ రెడ్డి.. రాష్ట్రంలో అర్హత ఉన్న అందరికీ కొత్త రేషన్ కార్డులు ఇస్తామని భరోసా ఇచ్చారు. పాత రేషన్ కార్డులు తీసేస్తారని జరుగున్న ప్రచారంలో ఎలాంటి నిజం లేదని కొట్టిపారేశారు. పాత రేషన్ కార్డులు అలాగే ఉంటాయని స్పష్టం చేశారు. పాత రేషన్‌ కార్డుల్లో కొత్త సభ్యులను చేరుస్తామని కూడా చెప్పుకొచ్చారు. కులగణన ఆధారంగానే రేషన్ కార్డుల ప్రక్రియ ఉంటుందని మరోసారి తెలిపారు. అయితే.. ప్రస్తుతం ప్రకటిస్తున్న జాబితాల్లో పేర్లు లేకపోతే ఎలాంటి ఆందోళన చెందొద్దని ఉత్తమ్ కుమార్ రెడ్డి తెలిపారు. గ్రామ సభల్లో మళ్లీ దరఖాస్తు చేసుకోవచ్చని స్పష్టం చేశారు. అంతేకాకుండా రేషన్ కార్డులు పంపిణీ అనేది నిరంతర ప్రక్రియ అని ఉత్తమ్ చెప్పుకొచ్చారు. మంత్రి ప్రకటనతో.. ప్రస్తుతం జాబితాల్లో పేర్లు లేనివారికి మరో అవకాశం దొరికినట్టయింది.

ఇదిలా ఉంటే.. జనవరి 26 నుంచి కొత్త రేషన్ కార్డులు జారీ చేయనున్నట్లు ఇప్పటికే సీఎం రేవంత్ రెడ్డి ప్రకటించిన విషయం తెలిసిందే. రేషన్ కార్డుల పంపిణీ ప్రక్రియ కోసం గ్రామాల్లో సర్వే కూడా శరవేగంగా జరుగుతోంది. కాగా.. రాష్ట్రంలో 2 కోట్ల 81 లక్షల మందికి ఇప్పటికే.. 90 లక్షల రేషన్ కార్డులు ఉన్నాయని మంత్రి పొన్నం ప్రభాకర్ పేర్కొన్నారు. అర్హత ఉన్న ప్రతి ఒక్కరికి రేషన్ కార్డు వస్తుందని మంత్రి పొన్నం ప్రభాకర్ తెలిపారు. రేషన్ కార్డు అర్హత ఉండి కూడా రాకుంటే.. సంబంధిత అధికారికి, ప్రజా ప్రతినిధులకు విజ్ఞాపన పత్రాలు ఇవ్వొచ్చని.. ఇది నిరంతర ప్రక్రియ అని మంత్రి పొన్నం ప్రభాకర్ కూడా ఇప్పటికే స్పష్టం చేయటం గమనార్హం.