వెంటనే ఈ పని చేయండి, లేదంటే ప్రాపర్టీస్ సీజ్

హైదరాబాద్ నగరవాసులకు జీహెచ్‌ఎంసీ అలర్ట్ జారీ చేసింది. ప్రాపర్టీస్ ట్యాక్స్ విషయంలో కఠినంగా వ్యవహరించాలని డిసైడ్ అయింది. ఈ ఫైనాన్షియల్ ఇయర్ ముగుస్తుండటంతో.. మార్చి నెలాఖరు నాటికి మరో రూ.600 కోట్ల ఆదాయాన్ని సమకూర్చుకోవడమే టార్గెట్‌గా కఠిన చర్యలకు రెడీ అయింది. ట్యాక్స్ చెల్లించని ప్రైవేటు హాస్పిటల్స్, విద్యా సంస్థలు, రెస్టారెంట్లు, హోటళ్లు, ఇతరత్రా వ్యాపార సముదాయాలకు తాళం వేయాలని నిర్ణయించారు. గత వారం రోజుల వ్యవధిలో 100 భవనాలను సీజ్ చేశారు.

జీహెచ్ఎంసీ అధికారులు వెల్లడించిన వివరాల ప్రకారం.. ప్రాపర్టీ ట్యాక్స్ బకాయిలు రూ.5 లక్షలకు మించి ఉన్న భవనాలు నగరంలో 4 వేలకుపైగా ఉన్నాయి. అత్యధికంగా జూబ్లిహిల్స్‌ సర్కిల్‌లో 700 వరకు నిర్మాణాలు ఉన్నట్లు గుర్తించారు. ఆ తర్వాత ఖైరతాబాద్‌లో 650 నిర్మాణాలు, గోషామహల్‌లో 550 నిర్మాణాలు, బేగంపేటలో 280, సరూర్‌నగర్‌లో 180, అంబర్‌పేట్‌లో 140 నిర్మాణాలు, మెహిదీపట్నంలో 150 వరకు నిర్మాణాలున్నాయి. వాటి నుంచి రూ.4 వేల కోట్ల వరకు పన్ను వసూలు కావాల్సి ఉంది. ఈ నేపథ్యంలో ట్యాక్స్ వసూళ్లపై స్పెషల్ ఫోకస్ పెట్టింది. ప్రస్తుతం శేరిలింగంపల్లి జోన్‌ నుంచి ఆశించిన స్థాయిలో వసూళ్లు లేవని జీహెచ్‌ఎంసీ అధికారులు తెలిపారు.

మల్టీ లెవల్ బిల్డింగులు, అనేక వ్యాపార సంస్థలున్న హైటెక్‌సిటీ, మాదాపూర్, గచ్చిబౌలి, చందానగర్, మియాపూర్‌, కొండాపూర్ ప్రాంతాల్లో బకాయిదారులను సంప్రదించి పన్ను వసూలుపై దృష్టి పెట్టారు. ఇప్పటికే ఇప్పటికే 6 లక్షల మంది యజమానులకు నోటీసులు జారీ చేసేందుకు జీహెచ్‌ఎంసీ సిద్ధమైంది. ట్రేడ్‌ లైసెన్సులు తీసుకోని వారికి, గతంలోని లైసెన్సులు పునరుద్ధరించుకోని వారిని మరో లక్షన్నర మందిని గుర్తించి వారికి కూడా నోటీసులు జారీ చేసింది. పెండింగ్‌లో ఉన్న పన్నులు చెల్లించాలని లేదంటే బిల్డింగులు సీజ్ చేస్తామని జీహెచ్‌ఎంసీ అధికారులు హెచ్చరిస్తున్నారు. ఇక నుంచి పన్ను వసూళ్లపై కఠినంగా వ్యవహరిస్తామని.. ఎంతటివారైనా పన్నులు చెల్లించకపోతే తాళాలు పడాల్సిందేనని చెబుతున్నారు. కాబట్టి ఇంకా ఎవరైనా ట్యాక్స్ కట్టని వారు ఉంటే వెంటనే వాటిని క్లియర్ చేయాలని సూచిస్తున్నారు.