పండుగ వేళ సజ్జనార్ మాస్ వార్నింగ్

దేశమంతా రంగుల పండుగ హోలీని ఘనంగా జరుపుకుంటున్నారు. చిన్నా పెద్దా అంతా రంగులు చల్లుకుంటూ ఎంజాయ్ చేస్తున్నారు. ముఖ్యంగా యువత అయితే.. హోలీని ఎంతో గ్రాండ్‌గా జరుపుకుంటున్నారు. సామాన్యుల నుంచి సినీ రాజకీయ ప్రముఖుల వరకు అందరూ హోలీ వేడుకల్లో పాల్గొంటూ.. పండుగ శుభాకాంక్షలు చెప్తున్నారు. ఈ నేపథ్యంలో.. ఆర్టీసీ ఎండీ వీసీ సజ్జనార్ మాత్రం తనదైన స్టైల్‌లో శుభాకాంక్షలు తెలిపారు. కేవలం శుభాకాంక్షలు చెప్పటమే కాదు.. రంగు పడుద్ది అంటూ మాస్ వార్నింగ్ కూడా ఇచ్చారు. ఇంతకీ ఈ వార్నింగ్ ఎవరికీ అనేగా మీ డౌటనుమానం.

సోషల్ మీడియాలో యాక్టివ్‌గా ఉండే సజ్జనార్.. నెట్టింట జరుగుతున్న సైబర్ నేరాలపై గట్టిగానే స్పందిస్తున్నారు. ముఖ్యంగా.. ఈమధ్య బెట్టింగ్ యాప్‌లపై, వాటిని ప్రమోట్ చేస్తున్న సోషల్ మీడియా ఇన్‌ఫ్లూయెన్సర్లు, యూట్యూబర్లపై ఫోకస్ చేశారు సజ్జనార్. తనదైన శైలిలో ట్వీట్లు చేస్తూ.. సైబర్ నేరాలపై, బెట్టింగ్ యాప్‌ల మోసాలపై అవగాహన కల్పించటమే కాకుండా.. వాటిని ప్రమోట్ చేస్తూ అమాయకుల జీవితాలతో ఆడుకుంటున్న ఇన్‌ఫ్లూయెన్సర్లు, యూట్యూబర్లను హెచ్చరిస్తూనే ఉన్నారు.

ఈ నేపథ్యంలోనే.. హోలీ పండుగ సందర్భంగా సజ్జనార్ ఇంట్రెస్టింగ్ పోస్ట్ పెట్టారు. ఈ హోలీ పండుగ సందర్భంగా.. "మన జీవితాలను సంతోషం, దయతో పాటు కొత్త ఆరంభాలతో అలంకరించుకుందాం. ప్రతి రంగుకు స్వతహాగా అందం ఉన్నట్లే.. ప్రతి వ్యక్తి తన సొంత కాంతిని ప్రపంచంలోకి తెస్తాడు. వైవిధ్యంగా పండుగను జరుపుకుందాం, ప్రేమను వ్యాప్తి చేద్దాం, నెగిటివిటీని వీడదాం." అంటూ హోలీ శుభాకాంక్షలు చెప్పారు సజ్జనార్. ఈ హోలీ శుభాకాంక్షల పోస్టుతో పాటు.. మరో ఇంట్రెస్టింగ్ ట్వీట్ కూడా చేశారు.

బెట్టింగ్ యాప్స్ ప్రమోట్ చేస్తే.. రంగు పడుద్ది అంటూ తన స్టైల్‌లో వార్నింగ్ ఇస్తూ.. మరో పోస్ట్ చేశారు సజ్జనార్. దాంతో పాటుగా.. "మీలో ఎంతమంది బెట్టింగ్ యాప్‌లను ప్రోత్సహించే నకిలీ సోషల్ మీడియా ఇన్‌ఫ్లూయెన్సర్‌లను రిపోర్ట్ కొట్టి, బ్లాక్ చేశారు." అని ప్రశ్నిస్తూనే.. మీ స్నేహితులందరినీ ఇలాగే చేయాలని ట్యాగ్ చేయమని కోరారు. అలా ట్యాగ్ చేసిన స్క్రీన్ షాట్‌లను తనకు షేర్ చేయమని కూడా సజ్జనార్ తెలిపారు.

ఈ క్రమంలో.. వైజాగ్ లోకల్ బాయ్ నాని అనే యూట్యూబర్ మీద సజ్జనార్ ట్వీట్ చేయగా.. అతన్ని అక్కడి పోలీసులు అరెస్టు చేసి.. కోర్టు తీర్పుతో 14 రోజుల రిమాండ్‌కు తరలించారు. మరోవైపు.. తెలంగాణ ఫేమస్ బ్లాగర్ అయిన భయ్యా సన్నీ యాదవ్ మీద కూడా సూర్యాపేట జిల్లా నూతనకల్‌లో కేసు నమోదైంది. భయ్యా సన్నీ యాదవ్‌ను కూడా త్వరలోనే అరెస్ట్ చేస్తామని పోలీసులు స్పష్టం చేశారు.