కోతులను తరిమేందుకు ,,,రైతన్న ఐడియా సూపర్

తెలంగాణలో పట్టణాల్లో కంటే.. పల్లెల్లో కోతుల బెడద ఎక్కువగా ఉంటుంది. కొన్ని జిల్లాలో ఇవి చాలా తక్కువ మోతాదులో ఉన్నా.. ఖమ్మం, భద్రాచలం, నల్గొండ, వరంగల్ జిల్లాల్లో అధిక మొత్తంలో కోతులు విహరిస్తున్నాయి. పంట వేసుకున్న రైతులు వాటి బారి నుంచి ఎలా తప్పించాలో అర్థం కాక.. తలలు పట్టుకుంటున్నారు. కోతుల బెడద తట్టుకోలేక చాలామంది వ్యవసాయం చేయడమే మానేశారు.

అధికారులను ఎన్నిసార్లు విన్నవించుకున్నా ఈ కోతుల బెడదను తగ్గించే చర్యలు తీసుకోలేదు. అంతే కాదు.. వాటి సంఖ్య రాను రాను పెరుగుతుందే తప్ప తగ్గడం లేదు. వీటికి అడవిలో ఆహారం దొరక్కపోతే.. ఊళ్లల్లోకి వచ్చేస్తున్నాయి. దీంతో పిల్లలు, వృద్ధులు, మహిళలు భయబ్రాంతులకు గురవుతున్నారు. అయితే.. ఇక్కడ ఓ రైతు తెలివితేటలతో కోతులను హడలెత్తిస్తున్నాడు. ఆయన్ను చూసి మిగతా రైతులు కూడా అదే ఉపాయాన్ని అమలు చేస్తున్నారు. దీంతో కోతుల నుంచి తమ పంటలు రక్షించుకోగలుగుతున్నారు. దీనికి సంబంధించి పూర్తి వివరాలు ఇలా ఉన్నాయి.

ఖమ్మం జిల్లా నేలకొండపల్లి మండలం ఆరె గూడెం గ్రామానికి చెందిన భద్రయ్య అనే రైతు మామిడి తోట కౌలుకు తీసుకున్నాడు. మామిడి కాయలను, మొక్కజొన్న పంటను కోతుల నుంచి రక్షించుకునేందుకు ఓ ఉపాయం ఆలోచించాడు. వేసవికాలం కావడంతో ఎండకు చెట్లు తేమ కోల్పోతున్నాయి. కానీ మామిడి తోటలు, మొక్కజొన్న చేలు మాత్రం పచ్చగా ఉండి కాయలు కాస్తున్నాయి. కానీ అవి రైతుకు చేరకముందే.. కోతుల పాలవుతున్నాయి. దీంతో రైతుల పరిస్థితి దయనీయంగా మారుతోంది. మామిడి కాయలతో పాటు మొక్కజొన్న పంటను కోతుల నుంచి కాపాడుకునేందుకు రైతులు చెట్ల కింద, చుట్టూ కంచెలు ఏర్పాటు చేస్తున్నారు.

ఆ వైపు చూడాలంటేనే వణుకుతున్న కోతులు..

అయినప్పటికీ కోతుల బెడద తగ్గలేదు. చివరికి ఒక తెలివైన ఐడియాతో కోతులను అవైపు రాకుండా తరుముతున్నాడు. తోట చుట్టూ ఓ హ్యాండ్ మైక్ తీసుకుని తిరుగుతూ.. కుక్కల అరుపుల శబ్దాలు చేయడం మొదలు పెట్టాడు. దీంతో తోట అంతటా కుక్కల అరుపులు మారుమోగుతున్నాయి. దీంతో కుక్కల శబ్దాలు విన్న కోతులు భయంతో పరుగులు తీస్తున్నాయి. రోజూ ఇలాగే తోట చుట్టూ మైక్ పట్టుకుని తిరుగుతూ ఆ రైతు కోతుల బెడదను పూర్తిగా తగ్గించగలుగుతున్నాడు. ఊరిలో ఉన్న ఇతర రైతులు కూడా ఆయన్ను చూసి ఇలాంటి ఐడియానే అమలు చేయడం మొదలెట్టారు. కుక్కలు లేకున్నా, వాటి అరుపులు సరిపోతాయని దాంతో కోతులు భయంతో పారిపోతాయని భద్రయ్య చెప్తున్నాడు.