50 కి.మీ దూరం ఆదా..గంటలోనే ఎయిర్‌పోర్ట్‌కు

తెలంగాణలో మరో ఎయిర్‌పోర్ట్‌ నిర్మాణానికి ముమ్మర ఏర్పాట్లు జరుగుతున్నాయి. వరంగల్ జిల్లాలో ఏర్పాటు చేసే మామునూరు విమానాశ్రయం కొచ్చిన్ ఎయిర్‌పోర్ట్ మాదిరిగా ఉండాలని సీఎం ఆకాంక్షించారు. ఆ దిశగా పనులు చేయాలని అధికారులకు సీఎం రేవంత్ రెడ్డి దిశానిర్దేశం చేశారు. ఈ ఎయిర్‌పోర్ట్ సుమారు 1000 ఎకరాల్లో నిర్మించబోతున్న విషయం తెలిసిందే. ప్రస్తుతం ప్రభుత్వం భూసేకరణ ప్రక్రియను చేపట్టింది. ఇప్పటికే దీనికి ప్రభుత్వం రూ.205 కోట్లను మంజూరు చేసింది. భవిష్యత్‌లో శంషాబాద్ ఎయిర్‌పోర్ట్‌కు ప్రత్యామ్నాయంగా మామునూరు ఎయిర్‌పోర్ట్ నిలవనుంది.

అయితే వరంగల్ నుంచి సిద్దిపేట జిల్లా హుస్నాబాద్‌ మీదుగా ఒక జాతీయ రహదారి ఉంది. చేర్యాల మీదుగా మరొకటి ఉంది. ప్రస్తుతం ప్రయాణికులకు అనుకూలంగా ఉండే విధంగా.. ఈ రెండు రహదారుల విస్తరణ పనులు సాగుతున్నాయి. ఎయిర్‌పోర్ట్ నిర్మాణం పూర్తయితే.. దాని చుట్టుపక్కల ప్రాంతాలే కాకుండా.. అక్కడ నుంచి ఇంటర్ లింక్ రూపంలో ఉన్న జాతీయ రహదారుల వెంట అభివృద్ధి పరుగులు పెట్టనుంది. సిద్దిపేటకు కనెక్షన్ ఉన్న ఈ రహదారుల నిర్వహణ మరింత మెరుగుపడనుంది. రహదారి చుట్టుపక్కల భూములకు ధరలు పెరగనున్నాయి. అనేక వ్యాపార, వాణిజ్య పరిశ్రమలు రానున్నాయి.. పర్యాటకం అభివృద్ధి చెందనుంది.. దీంతో ఉపాధి అవకాశాలు కూడా మెరుగవ్వనున్నాయి.

సిద్దిపేట జిల్లా నుంచి శంషాబాద్ ఎయిర్‌పోర్ట్‌ 139 కిలోమీటర్ల దూరం ఉంది. అక్కడికి చేరుకోవడానికి 2 నుంచి 3 గంటల సమయం పడుతోంది. అదే సిద్దిపేట నుంచి మామునూరు వెళ్లేందుకు 89 కి.మీ మాత్రమే ఉంటుంది. ఈ రకంగా 50 కిలోమీటర్ల దూరం తగ్గనుంది. గంటలోనే ఎయిర్‌పోర్ట్‌కు చేరుకోవచ్చు. వరంగల్ జిల్లా కేంద్రం నుంచి ఏటా 50 వేలకు పైగా ప్రయాణికులు శంషాబాద్ విమానాశ్రయానికి వెళ్తూ ఉంటారు. వరంగల్ లో నిర్మించబోతున్న మామునూరు ఎయిర్‌పోర్ట్ ప్రారంభం అయితే సగానికి పైగా జనాలు ఇటువైపు నుంచే వెళ్లనున్నారు.

విమానాశ్రయం ఏర్పాటుతో జిల్లా ప్రజలకు విమాన సేవలు అందుబాటులోకి రానున్నట్లు.. ఆర్‌అండ్‌బీ విశ్రాంత ఈఈ ముస్త్యాల బాలనర్సయ్య పేర్కొన్నారు. అంతర్జాతీయ విమాన సర్వీసులు ఇక్కడ నుంచి ప్రారంభం అయితే.. జిల్లా రూపు రేఖలు మారిపోతాయన్నారు. ఇతర రాష్ట్రాలకు వెళ్లే మధ్యతరగతి వారు ఈ అవకాశాలను ఎక్కువగా వినియోగించుకుంటారన్నారు. సిద్దిపేట జిల్లాలోని వ్యాపారస్తులు మాట్లాడుతూ.. వరంగల్ సమీపంలో ఎయిర్‌పోర్ట్ రావడం వల్ల.. ప్రయాణికులకు చక్కటి వెసులుబాటు కలగనుంది. వివిధ ప్రాంతాలకు, రాష్ట్రాలకు , విహార యాత్రలకు వెళ్లేవారికి ఇది ఎంతగానో సౌకర్యవంతంగా మారనుందన్నారు. ఎయిర్‌పోర్ట్ నిర్మాణంతో తాము ఎంతో సంతోషగా ఉన్నామన్నారు.