హైదరాబాద్‌లో బర్డ్ ఫ్లూ కలకలం.. నిర్ధారించిన అధికారులు

తెలుగు రాష్ట్రాలను మొన్నటి వరకు భయపెట్టిన బర్డ్‌ ఫ్లూ.. మధ్యలో కాస్త గ్యాప్ ఇచ్చినట్టే ఇచ్చి, అందరూ హమ్మయ్యా అని ఊపిరి పీల్చుకునేలోపే.. "నేనున్నానని.. ఎటు పోలేదని.." అంటూ మరోసారి సైలెంట్‌గా రెక్కలు విధిలిస్తోంది. ఏపీలోని పల్నాడు జిల్లా నర్సరావుపేటలో రెండేళ్ల చిన్నారి బర్డ్‌ఫ్లూ సోకి ప్రాణాలు వదిలిన ఘటన అందరినీ ఉలిక్కిపడేలా చేసింది. ఆ ఘటన వెలుగులోకి వచ్చిన గంటల సమయంలోనే.. మరో బాంబు పేల్చారు హైదరాబాద్ అధికారులు.

హైదరాబాద్‌ శివారులోని అబ్దుల్లాపూర్‌మెట్ మండలంలో బర్డ్ ఫ్లూ కలకలం రేపింది. అబ్దుల్లాపూర్ మెట్‌ పరిధిలో ఉన్న ఓ పౌల్ట్రీ ఫార్మ్‌లో నాలుగు రోజుల క్రితం వేల సంఖ్యలో కోళ్లు మృత్యువాత పడ్డాయి. దీంతో.. కోళ్ల శాంపిల్స్ సేకరించిన అధికారులు.. ల్యాబ్‌లో పరీక్షలు నిర్వహించగా బర్డ్ ఫ్లూ అని తేలింది. ఈ విషయం బయటికి రావటంతో.. పౌల్ట్రీ యజమానులంతా ఇప్పుడు ఆందోళనలో ఉన్నారు. మరోవైపు.. ఇప్పుడిప్పుడే చికెన్ తింటున్న ప్రజలు.. భయాందోళనలకు గురవుతున్నారు.

 ఏపీలో బర్డ్‌ఫ్లూ తొలి మరణం..

ఆంధ్రప్రదేశ్‌లో బర్డ్‌ఫ్లూ కారణంగా ఓ చిన్నారి మృతి చెందిన ఘటన తీవ్ర కలకలం రేపింది. పల్నాడు జిల్లా నరసరావుపేటలో రెండేళ్ల బాలిక బర్డ్‌ఫ్లూ వైరస్ బారినపడటంతో మార్చి 16న మృతి చెందింది. బాలిక మరణానికి బర్డ్‌ఫ్లూ కారణమని ఐసీఎంఆర్ అధికారికంగా ధృవీకరించింది. ఆంధ్రప్రదేశ్‌లో బర్డ్‌ఫ్లూతో మృతి చెందిన తొలి కేసుగా ఇది నమోదైంది. పచ్చి కోడి మాంసం తినడం, రోగనిరోధక శక్తి తక్కువగా ఉండటం వల్ల బాలిక వైరస్‌కి బలైందని వైద్యులు తెలిపారు. దీంతో.. అప్రమత్తమైన ఏపీ ప్రభుత్వం.. బర్డ్‌ఫ్లూ మరింత వ్యాపించకుండా రాష్ట్ర ప్రభుత్వం కఠిన చర్యలు చేపట్టింది.

ప్రజలు ఆందోళన చెందాల్సిన అవసరం లేదని ప్రభుత్వం స్పష్టం చేసింది. పచ్చి మాంసం తినడం, రోగపడి చనిపోయిన పక్షులను తాకడం ప్రమాదకరం అని వైద్య నిపుణులు హెచ్చరించారు. అనుమానాస్పద లక్షణాలు కనిపిస్తే వెంటనే వైద్యులను సంప్రదించాలని అధికారులు సూచించారు.

బర్డ్‌ఫ్లూ లక్షణాలు.. జాగ్రత్తలు

లక్షణాలు:

జ్వరం, దగ్గు, గొంతు నొప్పి, శ్వాసకోశ ఇబ్బందులు

జాగ్రత్తలు:

పచ్చి కోడి మాంసం, ఆహారం సరిగ్గా ఉడికించుకోవాలి.

కోళ్ల ఫార్మ్‌లకు దూరంగా ఉండాలి.

రోగపడి చనిపోయిన పక్షులను తాకరాదు.

ఎటువంటి అనుమానం వచ్చినా వెంటనే వైద్య పరీక్షలు చేయించుకోవాలి.

ఆగని వైరస్ వ్యాప్తి – మరిన్ని జాగ్రత్తలు అవసరం

ఈ ఘటన నేపథ్యంలో తెలుగు రాష్ట్రాల ప్రభుత్వాలు మరింత అప్రమత్తయ్యాయి. నియంత్రణ చర్యలు చేపట్టాలని అధికారులకు సూచించాయి. పౌల్ట్రీ పరిశ్రమపై బర్డ్‌ఫ్లూ ప్రభావం పడే అవకాశం ఉన్నప్పటికీ, సరైన నియంత్రణ చర్యలు తీసుకుంటే వైరస్ వ్యాప్తిని అడ్డుకోవచ్చని వైద్య నిపుణులు చెబుతున్నారు.