వరంగల్‌లో ఏప్రిల్ 6 నుంచి మే 5 వరకు 'సిటీ పోలీస్ యాక్ట్'

వరంగల్ పోలీస్ కమిషనరేట్ పరిధిలో పోలీసులు కఠిన చర్యలు అమలు చేయనున్నట్టు ప్రకటించారు. ఈరోజు (ఏప్రిల్ 6) నుంచి మే 5 వరకు 'సిటీ పోలీస్ యాక్ట్' సెక్షన్ 30 అమల్లో ఉంటుందని ప్రకటించారు. వ‌రంగ‌ల్ పోలీస్ క‌మిష‌న‌రేట్ ప‌రిధిలో శాంతి భ‌ద్రత‌ల‌ను కాపాడేందుకు పోలీసులు ఈ ప్రత్యేక చర్యలు తీసుకున్నారు. ఈ మేరకు ఏప్రిల్ 6వ తేదీ నుంచి మే 5వ తేదీ వరకు వరంగల్‌లో "సిటీ పోలీస్ యాక్ట్" సెక్షన్ 30ని అమల్లోకి తీసుకువస్తున్నట్టు పోలీస్ కమిషనర్ సన్ ప్రీత్ సింగ్ శనివారం (ఏప్రిల్ 05న) రోజు సాయంత్రం ఉత్తర్వులు జారీ చేశారు. ఈ నెల రోజుల్లో ఏవైనా బహిరంగ కార్యక్రమాలు, ర్యాలీలు, సభలు నిర్వహించాలంటే పోలీసుల అనుమతి తప్పనిసరి అని సన్ ప్రీత్ సింగ్ స్పష్టం చేశారు.

పోలీసుల అనుమతి లేకుండా సభలు, సమావేశాలు నిర్వహిస్తే కఠిన చర్యలు తీసుకుంటామని సీపీ సన్ ప్రీత్ సింగ్ హెచ్చరించారు. శాంతి భద్రతలకు భంగం కలిగించే విధంగా ప్రవర్తించే వారిపై చట్టపరంగా కఠిన చర్యలు తీసుకుంటామని తెలిపారు. ఇదే సమయంలో బహిరంగ ప్రదేశాల్లో మద్యం సేవించడం, అసాంఘిక కార్యకలాపాలకు పాల్పడడం నేరంగా పరిగణించబడుతుందని పోలీసులు పేర్కొన్నారు. ప్రజలు తప్పకుండా నిబంధనలు పాటించాలని, ఉల్లంఘించిన వారిపై చర్యలు తప్పవని సీపీ హెచ్చరించారు.

మరోవైపు.. శబ్ద కాలుష్యాన్ని నియంత్రించేందుకు డీజేలు, లౌడ్ స్పీకర్ల వినియోగాన్ని కూడా పోలీసులు బ్యాన్ చేశారు. చిన్న పిల్లలు, వృద్ధులు, విద్యార్థుల శ్రేయస్సును దృష్టిలో పెట్టుకుని ఈ నిర్ణయం తీసుకున్నట్టు తెలిపారు. మైకులు వాడాలంటే సంబంధిత ఏసీపీ నుంచి ముందస్తు అనుమతి తీసుకోవాల్సి ఉంటుందని తెలిపారు. అలాగే మైకులు వినియోగించే సమయం ఉదయం 6 గంటల నుంచి రాత్రి 10 గంటల వరకు మాత్రమేనని పోలీసులు వెల్లడించారు. ఈ సమయం తర్వాత కూడా మైకులు వాడితే చర్యలు తప్పవని హెచ్చరించారు.

అంతేకాదు.. హాస్పిటల్స్‌, స్కూల్స్‌, కాలేజీలు, ఇతర విద్యా సంస్థల 100 మీటర్ల పరిధిలో మైకులు, డీజేలు వాడకూడదని పోలీసులు స్పష్టం చేశారు. మే 5వ తేదీ వరకు సెక్షన్ 30 అమల్లో ఉంటుందని తెలిపారు. ప్రజలు నిబంధనలను గౌరవించి పోలీసులకు సహకరించాలని కోరారు. అన్ని మినహాయింపులు, అనుమతుల గురించి స్థానిక పోలీసు స్టేషన్‌ను సంప్రదించాలని నగర ప్రజలకు సీపీ సన్ ప్రీత్ సింగ్ సూచించారు.