మోసం చేశాడంటూ బీఆర్ఎస్ ఎమ్మెల్యే మర్రి రాజశేఖర్ రెడ్డిపై కంప్లైంట్, కేసు నమోదు

తెలంగాణలో రేవంత్ రెడ్డి సర్కార్ అధికారంలోకి వచ్చినప్పటి నుంచి బీఆర్ఎస్ మాజీ మంత్రి మల్లారెడ్డి కుటుంబానికి చిక్కులు ఎదురవుతూనే ఉన్నాయి. మల్లారెడ్డితో పాటు ఆయన అల్లుడు, మల్కాజ్‌గిరి బీఆర్ఎస్ ఎమ్మెల్యే మర్రి రాజశేఖర్ రెడ్డి కూడా వరుస వివాదాల్లో చిక్కుకుంటున్నారు. కళాశాల భూముల ఆరోపణలు, ఐటీ సోదాలు, హాస్టల్‌లో కెమెరాల వివాదాలు మల్లారెడ్డి కుటుంబాన్ని ఉక్కిరిబిక్కిరి చేయగా.. తాజాగా మరో తలనొప్పి తయారైంది. డబ్బు చెల్లింపు విషయంలో మర్రి రాజశేఖర్ రెడ్డి తమను మోసం చేశారంటూ ఓ వ్యక్తి పోలీసులను ఆశ్రయించడంతో ఆయనపై ఎఫ్ఐఆర్ నమోదైంది.

వివరాల్లోకి వెళితే.. విజన్ ప్రాపర్టీ మేనేజ్మెంట్ సర్వీస్ అనే సంస్థతో ఎమ్మెల్యే మర్రి రాజశేఖర్ రెడ్డికి చెందిన అరుంధతి హాస్పిటల్స్ కలిసి పని చేసింది. ఈ క్రమంలో అరుంధతి హాస్పిటల్‌కు 40 మంది సిబ్బందిని తమ సంస్థ నుంచి కేటాయించాలని విజన్ ప్రాపర్టీ మేనేజ్మెంట్ సర్వీస్‌కు చెందిన యేసు బాబుతో రాజశేఖర్ రెడ్డి ఒప్పందం కుదుర్చుకున్నారు.

ఈ 40 మంది సిబ్బందికి గాను రూ. 50 లక్షలు చెల్లించేందుకు ఎమ్మెల్యే రాజశేఖర్ రెడ్డి అంగీకరించారు. ఒప్పందం ప్రకారం యేసుబాబు అరుంధతి ఆస్పత్రిలో విజన్ ప్రాపర్టీ మేనేజ్మెంట్ సర్వీస్‌కు చెందిన 40 మంది సిబ్బందిని విధుల్లోకి పంపించారు. అయితే, హాస్పిటల్ యాజమాన్యం ఇప్పటి వరకు విడతల వారీగా కేవలం రూ.30 లక్షలు మాత్రమే చెల్లించింది. మిగిలిన రూ. 20 లక్షల కోసం యేసుబాబు ఎమ్మెల్యే రాజశేఖర్ రెడ్డిని సంప్రదించగా ఆయన నుంచి ఎలాంటి స్పందన రాలేదు.

దీంతో విసిగిపోయిన యేసుబాబు పోలీసులను ఆశ్రయించి ఎమ్మెల్యే రాజశేఖర్ రెడ్డిపై బీఎన్ఎస్ (భారతీయ న్యాయ సంహిత) చట్టం ప్రకారం కేసు నమోదు చేయాలని కోరారు. యేసుబాబు ఫిర్యాదు మేరకు పోలీసులు సెక్షన్లు 316/2 మరియు 318(4) కింద కేసు నమోదు చేసుకుని దర్యాప్తు చేస్తున్నారు. ఈ ఘటన.. ఇప్పుడు బీఆర్ఎస్ వర్గాల్లో తీవ్ర చర్చనీయాంశంగా మారింది. మరి ఈ కేసు విషయంలో మర్రి రాజశేఖర్ రెడ్డి ఎలా స్పందిస్తారన్నది ఆసక్తికరంగా మారింది.