ఉస్మానియాలో ఇంత మంచి వైద్యమా..? ,,,. ఏపీ యువకుడి ఎమోషనల్ ట్వీట్

తెలంగాణ వైద్యారోగ్య రంగంలో గణనీయమైన వృద్ధిని సాధించింది. హైదరాబాద్ అయితే ప్రపంచానికి మెడికల్ హబ్‌గా మారింది. దేశ, విదేశాల నుంచి రోగులు నగరానికి వచ్చి ట్రీట్‌మెంట్ చేయించుకుంటున్నారు. అయితే ప్రైవేటు హాస్పిటల్స్‌లో అత్యాధునిక సౌకర్యాలు ఉన్నా.. ప్రభుత్వ ఆసుపత్రిల్లో సరైన సౌకర్యాలు ఉండవనే అపోహ ప్రజల్లో ఉంది. డాక్టర్ల నిర్లక్ష్యం, అపరిశుభ్రమైన పరిస్థితులు, సరైన నిర్వహణ లేకపోవటం, డాక్టర్ అపాయింట్‌మెంట్ కోసం, రిపోర్టుల కోసం ఎక్కువ గంటలు వేచి ఉండాల్సి వస్తోందనే ఫిర్యాదులు కూడా ఉన్నాయి. హైదరాబాద్ ఉస్మానియా హాస్పిటల్, గాంధీ వంటి ఆసుపత్రుల్లో రోగులకు సరైన వైద్య సేవలందవనే చెడ్డ పేరు ఉంది.

అయితే ఎక్కడో ఓ చోట అలాంటి పరిస్థితులు ఉన్నా.. కొన్ని ప్రభుత్వ ఆసుపత్రుల్లో మాత్రం మెరుగైన వైద్య సేవలు అందుతున్నాయి. తాజాగా ఉస్మానియా ఆసుపత్రి, అక్కడ అందుతున్న వైద్య సేవలు, డాక్టర్ల పనితీరుపై రవితేజ అనే ఏపీ యువకుడు ఎమోషనల్ ట్వీట్ చేశారు. తమ బంధువుల యువకుడు అనారోగ్యానికి గురి కాగా.. సత్వరమే స్పందించి ఉస్మానియా ఆసుపత్రి డాక్టర్లు మెరుగైన వైద్య సేవలు అందించారని కొనియాడారు. పక్క రాష్ట్రం నుంచి వచ్చినా.. ఆలస్యం లేకుండా ట్రీట్‌మెంట్ అందించారన్నారు. అందుకు సంబంధించిన ట్వీట్ ప్రస్తుతం సోషల్ మీడియాలో వైరల్‌గా మారింది.

'ఉగాది రోజున హైదరాబాద్ నుంచి షిర్డీకి వెళ్లే ట్రైన్ రాత్రికి ఉందని.. హైదరాబాద్ చూద్దామని తిరుగుతూ ఉండగా రాయదుర్గ్ మెట్రో స్టేషన్‌లో మా అక్క కొడుక్కి ఒక్కసారిగా శ్వాస అందలేదు. ఏం చేయాలో తెలియని మేము కొండాపూర్ ఏరియా హాస్పిటల్‌కి వెళ్తే అక్కడి నుంచి ఉస్మానియా హాస్పిటల్‌కి రిఫర్ చేశారు, హాస్పిటల్‌లో డాక్టర్స్ త్వరగా స్పందించి, X-RAY, USG చేయించారు, పేగులో రంధ్రం ఉందని ఆపరేషన్ చేయాలని చాలా త్వరతగిన చేశారు. ప్రైవేట్ హాస్పిటల్ లాగే చూశారు. డాక్టర్స్ దయ వల్ల బ్రతికాడు. ఇంత మంచి వైద్యం అందించిన తెలంగాణ ప్రభుత్వానికి ప్రత్యేకమైన ధన్యవాదాలు.

ఎక్కడ కూడా పక్క రాష్ట్రం నుంచి వచ్చామని ట్రీట్‌మెంట్ ఆలస్యం చేయలేదు, వెంట వెంటనే టెస్టులు చేయించారు. రిజిస్ట్రేషన్ చేశారు. ఉస్మానియా జనరల్ హాస్పిటల్‌ను జన్మలో మరిచిపోలేం. ఎంత చెప్పిన తక్కువే అక్కడ డాక్టర్స్ గురించి. 108కి కాల్ చేయగానే నిమిషాలలో అంబులెన్స్ వచ్చింది. వెంటనే హాస్పిటల్‌కి తీసుకువెళ్ళకపోయి ఉంటే ఈరోజు పరిస్థితి వేరే లాగ ఉండేదేమో. డాక్టర్స్‌కి, అంబులెన్స్ డ్రైవర్, అక్కడ స్టాఫ్‌కి ఎలా కృతజ్ఞత చెప్పుకోవాలో కూడా తెలియడం లేదు.' అని ట్వీట్ చేశాడు. ఈ ట్వీట్‌పై నెటిజన్లు తమ అభిప్రాయాన్ని కామెంట్ల రూపంలో వెల్లడిస్తున్నారు. నిజంగా ఉస్మానియా హాస్పిటల్ డాక్టర్ల వైద్య సేవలు గొప్పవని అంటున్నారు. తక్షణమే డాక్టర్లు స్పందించిన తీరుకు హ్యాట్సాప్ చెప్పాల్సిందేనని కామెంట్లు పెడుతున్నారు.