ఓబుళాపురం మైనింగ్ కేసులో,,, సబితా ఇంద్రారెడ్డికి క్లీన్ చీట్

ఉమ్మడి ఆంధ్రప్రదేశ్ రాజకీయాల్లో 14 ఏళ్ల క్రితం సంచలనం సృష్టించిన ఓబుళాపురం మైనింగ్ కంపెనీ (ఓఎంసీ) అక్రమ తవ్వకాల కేసులో సీబీఐ ప్రత్యేక న్యాయస్థానం మంగళవారం (మే 06న) రోజున కీలక తీర్పు వెలువరించింది. ఈ కేసులో ఏ1 బీవీ శ్రీనివాస రెడ్డి, ఏ2 గాలి జనార్ధన్ రెడ్డి, ఏ3 వీడీ రాజగోపాల్, ఏ4 ఓబుళాపురం మైనింగ్ కంపెనీ ప్రైవేట్ లిమిటెడ్, ఏ7 అలీ ఖాన్‌కు సీబీఐ కోర్టు శిక్ష విధించింది. గాలి జనార్ధన్ రెడ్డి, బీవీ శ్రీనివాస్ రెడ్డి, వీడీ రాజగోపాల్, మెఫజ్ అలీ ఖాన్‌తో పాటు ఓఎంసీ కంపెనీని దోషులుగా తేల్చిన న్యాయస్థానం.. ఒక్కొక్కరికి ఏడేళ్ల జైలు శిక్షను ఖరారు చేసింది. అయితే.. మాజీ మంత్రి సబితా ఇంద్రారెడ్డి, రిటైర్డ్ ఐఏఎస్ అధికారి కృపానందంలను న్యాయస్థానం నిర్దోషులుగా ప్రకటించింది. ఈ కేసులో గతంలోనే ఐఏఎస్ అధికారిణి శ్రీలక్ష్మిని హైకోర్టు నిర్దోషిగా తేల్చింది. విచారణ సమయంలో ఒక నిందితుడు మరణించాడు. 2004-2009 మధ్య గనుల శాఖ మంత్రిగా పనిచేసిన సబితా ఇంద్రారెడ్డి ఈ కేసులో ఆరోపణలు ఎదుర్కొన్నారు.

ఏపీ అనంతపురం జిల్లాలోని ఓబుళాపురం మైనింగ్ కంపెనీలో అక్రమ తవ్వకాలు జరిగాయని, దీని ద్వారా ప్రభుత్వ ఖజానాకు భారీ నష్టం వాటిల్లిందని ఆ సమయంలో పెద్ద ఎత్తున ఆరోపణలు వచ్చాయి. ఈ వ్యవహారం అప్పట్లో రాజకీయంగా తీవ్ర దుమారం రేపింది. సీబీఐ ఈ కేసును విచారించి.. పలువురిపై ఛార్జ్ షీట్ దాఖలు చేసింది.

న్యాయస్థానం తీర్పులోని ముఖ్యాంశాలు:

గాలి జనార్ధన్ రెడ్డి, బీవీ శ్రీనివాస్ రెడ్డి, వీడీ రాజగోపాల్, మెఫజ్ అలీ ఖాన్, ఓఎంసీ కంపెనీని దోషులుగా నిర్ధారించింది.

దోషులకు ఏడేళ్ల జైలు శిక్ష విధించింది.

సబితా ఇంద్రారెడ్డి, కృపానందంలను నిర్దోషులుగా ప్రకటించింది.

గతంలో ఐఏఎస్ అధికారిణి శ్రీలక్ష్మిని హైకోర్టు నిర్దోషిగా తేల్చింది.

విచారణ సమయంలో ఒక నిందితుడు మరణించాడు.

ఈ తీర్పుతో ఓబుళాపురం మైనింగ్ కేసులో సుదీర్ఘ న్యాయపోరాటానికి తాత్కాలికంగా ముగింపు లభించింది. అయితే, దోషులుగా తేలిన వారు ఈ తీర్పుపై ఉన్నత న్యాయస్థానానికి అప్పీల్ చేసే అవకాశం ఉంది. ఈ కేసు రాజకీయంగానూ, న్యాయపరంగానూ మరింత చర్చకు దారితీసే అవకాశం ఉంది.