పైసా ఖర్చు లేకుండా,,,,60 ఏళ్లు దాటిన వారికి వైద్యం

వృద్ధుల ఆరోగ్య సంరక్షణ కోసం గాంధీ ఆసుపత్రిలో ప్రత్యేకంగా జెరియాట్రిక్ వార్డులను ఏర్పాటు చేశారు. వృద్ధాప్యంలో వచ్చే ఆరోగ్య సమస్యలకు ప్రత్యేక చికిత్స అందించడమే ఈ వార్డుల ప్రధాన లక్ష్యం. చాలా మంది వృద్ధులు ప్రైవేట్ ఆసుపత్రులలో అధిక ఖర్చుతో కూడుకున్న చికిత్సలు చేయించుకోలేక ఇబ్బంది పడుతున్నారు. వారికి ఈ జెరియాట్రిక్ వార్డులు ఎంతో ఉపయోగకరంగా ఉంటాయి.

గాంధీ ఆసుపత్రిలో ఒక 60 ఏళ్ల వృద్ధుడు అనారోగ్యంతో చేరగా.. వైద్యులు అతన్ని జెరియాట్రిక్ వార్డులో చేర్చారు. అక్కడ అతనికి 20 రోజులుగా అన్ని రకాల చికిత్సలు అందుతున్నాయి. అయితే ఆ వార్డులో అతను ఒక్కడే ఉన్నాడు. గాంధీ ఆసుపత్రిలో వృద్ధుల కోసం ప్రత్యేక వార్డులు ఉన్నాయని చాలా మందికి తెలియకపోవడమే దీనికి కారణం.

జెరియాట్రిక్ వార్డులలో వృద్ధులకు శారీరకంగా, మానసికంగా సాంత్వన చేకూరుస్తూ వైద్య సేవలు అందిస్తారు. మహిళలు, పురుషుల కోసం ప్రత్యేకంగా 20 పడకల వార్డులను ఏర్పాటు చేశారు. ప్రస్తుతం గాంధీ ఆసుపత్రిలో అన్ని వయసుల వారికి చికిత్స అందిస్తున్నారు. అయితే సాధారణ వార్డుల్లో వృద్ధులకు ప్రత్యేక శ్రద్ధ కష్టమవుతోంది. ఈ సమస్యను అధిగమించడానికి జెరియాట్రిక్ వార్డులను ప్రారంభించారు.

ఇక్కడ వృద్ధులకు సౌకర్యవంతమైన వాతావరణం కల్పించడంతో పాటు, వారి ఆహారం విషయంలో కూడా ప్రత్యేక శ్రద్ధ తీసుకుంటున్నారు. ఈ వార్డులలో వృద్ధుల కోసం ప్రత్యేక వైద్య సదుపాయాలు ఉన్నాయి. ఇక్కడ వృద్ధుల కోసం యోగా, ధ్యానం వంటివి కూడా ఏర్పాటు చేస్తారు. ప్రభుత్వం ఈ సేవలను మరింత మంది వృద్ధులకు చేరేలా చర్యలు తీసుకోవాలి.

ప్రస్తుతం పురుషుల వార్డులో ఒకరు చికిత్స పొందుతుండగా, మహిళల వార్డు మొత్తం ఖాళీగా ఉంది. జెరియాట్రిక్ వార్డుల గురించి ప్రజలకు అవగాహన లేకపోవడం.. ఆసుపత్రి యాజమాన్యం సరైన ప్రచారం చేయకపోవడం వల్ల ఈ పరిస్థితి నెలకొంది. సాధారణ వార్డుల వద్ద వృద్ధులు గంటల తరబడి ఓపీ సేవల కోసం వేచి ఉండటం గమనార్హం. ఈ నేపథ్యంలో జెరియాట్రిక్ విభాగంలో పనిచేసేందుకు ప్రొఫెసర్, అసోసియేట్, అసిస్టెంట్ ప్రొఫెసర్లతో పాటు సీనియర్, జూనియర్ వైద్యులు, 30 మంది స్టాఫ్ నర్సులు, ఫిజియోథెరపిస్టులను నియమించే ప్రక్రియను ఆసుపత్రి యాజమాన్యం చేపట్టింది.