మే 31న మిస్ వరల్డ్ పోటీల ఫైనల్

విశ్వనగరం హైదరాబాద్ మరో అరుదైన ఘనత సాధించింది. ఈ ఏడాది భాగ్యనగరం వేదికగా మిస్ వరల్డ్ పోటీలు జరుగుతున్న సంగతి తెలిసిందే. ఈ క్రమంలో తాజాగా మిస్ వరల్డ్ ఆర్గనైజషన్.. ఈ పోటీల ఫార్మాట్‌ని వెల్లడించింది. హైదరాబాద్‌ వేదికగా జరుగుతున్న 72వ ప్రపంచ సుందరి పోటీల్లో.. సుమారు 108 దేశాల భామలు అందాల కిరీటం కోసం పోటీపడుతున్నారు. కంటెస్టెంట్లను ఇప్పటికే ఖండాల వారీగా గ్రూపులుగా విభజించారు. ఒక్కో ఖండం నుంచి 10 దేశాల పోటీదారులు క్వార్టర్‌ ఫైనల్‌కు చేరుకుంటారు. వీరిలోంచి టాప్‌-5ను ఎంపిక చేస్తారు. ఆ తర్వాత టాప్‌-2 తీసుకుంటారు.

ఇలా టాప్‌లో నిలిచిన వీరిలో ఒకరు ఆయా ఖండం తరఫున విజేత, మరొకరు రన్నరప్‌ అవుతారు. న్యాయనిర్ణేతలు ఒక్కో ఖండం నుంచి ఒక్కర్ని విజేతగా ప్రకటిస్తారు. ఆతర్వాత నాలుగు ఖండాల గ్రూపుల్లోంచి నలుగురు సుందరీమణులు చివరి రౌండ్‌కు చేరుకుంటారు. ఇక మిస్ వరల్డ్ ఫైనల్ ఈనెల 31న హైటెక్స్‌లో జరుగుతుంది. ఈ తుది రౌండ్‌ పోటీల్లో వీరిలోంచి అత్యుత్తమ ప్రదర్శన ఇచ్చిన సుందరీమణిని మిస్‌ వరల్డ్‌గా ఎంపిక చేస్తారు. మిగతా ముగ్గుర్ని ఒకటి, రెండు, మూడో రన్నరప్‌గా ప్రకటిస్తారు.

దీని కన్నా ముందు.. ఒక్కో ఖండం తరఫున మొదటి రన్నరప్‌గా నిల్చిన వారు.. ఫైనల్‌ రౌండ్ తర్వాత ఆయా ఖండాల విజేతలుగా ప్రకటిస్తారు. మిస్ వర్డల్ పోటీల్లో భాగంగా.. శనివారం నాడు క్రీడల ఛాలెంజ్‌ పోటీలు జరిగాయి. దీనిలో మిస్‌ వరల్డ్‌ ఎస్తోనియా ఎలిస్‌ రాండ్మా విజేతగా నిలిచి స్వర్ణ పతకం గెలుచుకున్నారు. అలానే మే 22న టాలెంట్‌ ఛాలెంజ్‌ ఫైనల్, 23న హెడ్‌ టూ హెడ్‌ ఛాలెంజ్‌ ఫైనల్, 24న మిస్‌ వరల్డ్‌ టాప్‌ మోడల్, 26న బ్యూటీ విత్‌ ఏ పర్పస్‌ ప్రాజెక్టుల ప్రదర్శన పోటీలు జరగనున్నాయి. తెలంగాణ ప్రభుత్వం అంత్యంత ప్రతిష్టాత్మకంగా ఈ పోటీలను నిర్వహిస్తున్నది.

మిస్ వరల్డ్ 2025 పోటీల కోసం వివిధ దేశాల నుండి వచ్చిన అందాల భామలు.. ఇప్పటికే తెలంగాణలోని పలు చారిత్రక కట్టడాలను, దేవాలయాలను సందర్శించారు. ఈ క్రమంలో ఓ చిన్న సంఘటన వివాదాస్పదంగా మారింది. సుందరీమణలు రామప్ప దేవాలయాన్ని సందర్శన కోసం వెళ్లిన సమయంలో.. కొందరు మహిళా వాలంటీర్లు వారికి కాలు కడుక్కునేందుకు సాయం చేశారు. ఈ దృశ్యాలు సోషల్ మీడియాలో వైరల్‌గా మారడంతో దీనిపై వివాదం రాజుకుంది. కొందరు దీన్ని సమర్థించగా.. మరికొందరు మన ఆడ బిడ్డల ఆత్మగౌరవాన్ని వాళ్ల కాళ్ల దగ్గర తాకట్టు పెట్టారని విమర్శించారు. దీనిపై మంత్రి సీతక్క ఘాటుగా స్పందించారు.