నిజాం కాలం నాటి భూముల సమస్యలకు పరిష్కారం.. ఆ 5 గ్రామాల్లో పైలట్ ప్రాజెక్టు: పొంగులేటి

తెలంగాణ రాష్ట్రంలో నిజాం కాలం నాటి భూముల సమస్యలకు శాశ్వత పరిష్కారం చూపేందుకు ప్రభుత్వం నడుం బిగించింది. దశాబ్దాలుగా పరిష్కారం కాని ఈ సమస్యకు ఇందిరమ్మ ప్రభుత్వం మోక్షం కల్పించబోతోందని మంత్రి పొంగులేటి శ్రీనివాస్ రెడ్డి కీలక ప్రకటన చేశారు. రాష్ట్రంలో సర్వే చేయని లేదా సర్వే రికార్డులు లేని 413 గ్రామాలు ఉన్నాయని, గత పదేళ్లలో బీఆర్ఎస్ ప్రభుత్వం దీనిపై దృష్టి సారించలేదని ఆయన విమర్శించారు. ముఖ్యమంత్రి రేవంత్ రెడ్డి నేతృత్వంలోని ప్రభుత్వం ఈ సమస్యను పరిష్కరించాలని దృఢ సంకల్పంతో ఉందని మంత్రి తెలిపారు. దీనిలో భాగంగా, ఐదు గ్రామాల్లో పైలట్ ప్రాజెక్టును నిర్వహిస్తున్నట్లు వెల్లడించారు. ఈ పైలట్ ప్రాజెక్టు ఫలితాలను బట్టి, మిగిలిన 408 గ్రామాల్లోనూ సర్వే ప్రక్రియను వేగవంతం చేస్తామని ఆయన స్పష్టం చేశారు.

పైలట్ ప్రాజెక్టు కోసం మహబూబ్‌నగర్ జిల్లా గండీడ్ మండలం సలార్ నగర్, జగిత్యాల జిల్లా భీర్పూర్ మండలం కొమ్మనాపల్లి (కొత్తది), ఖమ్మం జిల్లా ఎర్రుపాలెం మండలం ములుగుమడ, ములుగు జిల్లా వెంకటాపురం మండలం నూగురు, సంగారెడ్డి జిల్లా వట్‌పల్లి మండలం షాహిద్ నగర్ ఎంపిక చేసినట్లు చెప్పారు. ఈ గ్రామాల్లో ఆధునిక సాంకేతికతను ఉపయోగించి ఏరియల్/డ్రోన్ సర్వే, ప్యూర్ గ్రౌండ్ ట్రూతింగ్ పద్ధతుల్లో సమగ్ర సర్వే నిర్వహిస్తామన్నారు. దీని ద్వారా జియో రిఫరెన్స్, క్యాడస్ట్రల్ మ్యాప్‌లు, హక్కుల నమోదు పత్రాలను తయారు చేస్తారు. ఈ నూతన విధానాల ద్వారా భూ సమాచారం పారదర్శకంగా మారుతుందని, భూ వివాదాలు పరిష్కారమవుతాయని, భూ యాజమాన్యంలో స్పష్టత వస్తుందని మంత్రి పొంగులేటి వివరించారు.

ఈ రీసర్వే కోసం ఆర్వీ అసోసియేట్స్, మార్వెల్ జియో స్పేషియల్, ఐఐసీ టెక్నాలజీస్, నియో జియో, డ్రోగో డ్రోన్ వంటి వివిధ రాష్ట్రాల్లో రీసర్వే అనుభవం కలిగిన సంస్థలను ఎంపిక చేసినట్లు మంత్రి పొంగులేటి తెలిపారు. ఆధునిక యంత్రాలు, సాంకేతిక పరిజ్ఞానాన్ని ఉపయోగించి భూ సమస్యలను శాశ్వతంగా పరిష్కరించే దిశగా ప్రభుత్వం చర్యలు తీసుకుంటోందని ఆయన స్పష్టం చేశారు.