ఆ ఏరియాల్లో ట్రాఫిక్ సమస్యలకు చెక్,,,అందుబాటులోకి మరో ఫ్లైఓవర్

హైదరాబాద్ నగరంలో ట్రాఫిక్ కష్టాల గురించి ఎంత చెప్పినా తక్కువే. ఇక వర్షాకాలంలో ఈసమస్యలు మరింత పెరుగుతాయి. పది చినుకులు పడ్డా సరే.. ఎక్కడికక్కడ ట్రాఫిక్ ఆగిపోతుంది. జనాలు గంటల తరబడి ట్రాఫిక్‌లో చిక్కుకుని ఇబ్బంది పడాల్సిన పరిస్థితి వస్తుంది. ఈ సమస్యలకు చెక్ పెట్టేందుకు ప్రభుత్వాల అనేక చర్యలు తీసుకుంటున్నాయి. దీనిలో భాగంగా ఫ్లైఓవర్లను నిర్మిస్తున్న సంగతి తెలిసిందే. ఈ క్రమంలో నగరంలో ట్రాఫిక్ కష్టాలను తీర్చేందుకు మరో ఫ్లైఓవర్ అందుబాటులోకి రానుంది. ఆ వివరాలు..

త్వరలోనే కొండాపూర్ ఫ్లైఓవర్ అందుబాటులోకి రానుంది. జూన్ మొదటి వారంలో ముఖ్యమంత్రి రేవంత్ రెడ్డి ఈ ఫ్లైఓవర్‌ని ప్రారంభించనున్నారు. ఇది అందుబాటులోకి వస్తే.. ప్రధానంగా ఐటీ కారిడార్‌లో ప్రయాణించే వారికి ఎంతో ప్రయోజనం కలగనుంది. అలానే గచ్చిబౌలి జంక్షన్ వద్ద ట్రాఫిక్ రద్దీ భారీగా తగ్గడమే కాక ప్రయాణ సమయం ఆదా కానుంది అంటున్నారు. స్ట్రాటజిక్ రోడ్ డెవలప్‌మెంట్ ప్రోగ్రామ్‌లో భాగంగా.. ఔటర్ రింగ్‌రోడ్డు నుంచి కొండాపూర్ వరకు ఈ అత్యాధునిక మల్టీలెవల్ ఫ్లైఓవర్ నిర్మాణం చేపట్టారు.

రూ.178 కోట్ల ఖర్చుతో.. 1.2 కిలోమీటర్ల పొడవు, 24 మీటర్ల వెడల్పుతో ఆరు లేన్లతో ఈ ఫ్లైఓవర్‌ని నిర్మించారు. ఇప్పటికే ఇక్కడ రెండు ఫ్లైఓవర్లు ఉండగా.. ఇది వాటిపై నిర్మించిన మూడో ఫ్లైఓవర్. కింద గచ్చిబౌలి జంక్షన్ ఫ్లై ఓవర్, ఆపైన శిల్పా లేఅవుట్ ఫేజ్ 1 ఫ్లైఓవర్ ఉన్నాయి. ఇప్పుడు దానికి పైన ఫేజ్ 2 ఫ్లైఓవర్ నిర్మించారు. ఇది అందుబాటులోకి వస్తే.. దీంతో గచ్చిబౌలి జంక్షన్ వద్ద ట్రాఫిక్ సమస్య చాలా వరకు తగ్గునుంది అంటున్నారు.

ఈ ఫ్లైఓవర్ అందుబాటులోకి వస్తే.. ఓఆర్ఆర్ నుంచి కొండాపూర్, హఫీజ్‌పేట్ రూట్‌లో వెళ్లే వారికి చాలా ఉపయోగంగా ఉంటుంది. దీని ద్వారా హైటెక్ సిటీ, ఫైనాన్షియల్ డిస్ట్రిక్ట్‌కు మెరుగైన కనెక్టివిటీ లభించడమే కాక ట్రాఫిక్ కష్టాలు తీరతాయి. వీటితో పాటు ప్రయాణ సమయం కూడా ఆదా అవుతుంది.

ఈఫ్లైఓవర్ అందుబాటులోకి వస్తే.. కొండాపూర్ ప్రాంతం నుంచి శంషాబాద్ ఎయిర్ పోర్ట్, అక్కడి నుంచి కొండాపూర్ ప్రాంతాలకు వెళ్లేందుకు గచ్చిబౌలి వద్ద ఎలాంటి ట్రాఫిక్ జామ్ లేకుండా నేరుగా వెళ్లే వెసులుబాటు కలుగుతుంది. ఇక నగరంలో ఫ్లైఓవర్లు, ఇతర నిర్మాణాలు శరవేగంగా పూర్తవుతున్నాయి. గతంలో ముఖ్యమంత్రి రేవంత్ రెడ్డి.. జీహెచ్ఎంసీకి ఇచ్చిన హామీ మేరకు నగర అభివృద్ధికి నిధులను మంజూరు చేస్తున్నారు. దాంతో పలు నిర్మాణాలు వేగంగా పూర్తవుతున్నాయి.