తెలంగాణలో మరో బస్టాండ్ నిర్మాణానికి గ్రీన్ సిగ్నల్

ఎట్టకేలకు ఆ ప్రదేశంలో బస్టాండ్ నిర్మాణానికి అనుకూల వాతావరణం ఏర్పడింది. ఏంటని అనుకుంటున్నారా.. ఎన్నో ఏళ్ల నుంచి దీని కోసం స్థానిక నాయకులు పోరాడుతున్నారు. విషయానికి వస్తే.. కాజీపేట రైల్వే స్టేషన్ ఎదుట నూతన బస్టాండ్ నిర్మాణానికి స్థలం కేటాయించేందుకు రైల్వే శాఖ అధికారులు అంగీకారం తెలిపారు. దీనికి సంబంధించి పూర్తి స్థాయి నివేదికను తమకు పంపాలని రైల్వే శాఖ స్థానిక అధికారులకు ఆదేశాలు కూడా జారీ చేసింది. ఇటీవల కేంద్ర రైల్వే శాఖ మంత్రి అశ్విని వైష్ణవ్‌‌ను పలువురు నాయకులు కలిసిన విషయం తెలిసిందే. వీరిలో ముఖ్యంగా వరంగల్ పశ్చిమ అసెంబ్లీ నియోజకవర్గ ఎమ్మెల్యే నాయిని రాజేందర్ రెడ్డి, ఎంపీ కడియం కావ్య లాంటి వారు ఉన్నారు. ఇక్కడ నూతన బస్టాండ్, డివిజన్ ఏర్పాటు చేయాలని వినతి పత్రం కూడా సమర్పించారు.

ఈ నేపథ్యంలో అక్కడ జరిగిన చర్చలను ఎమ్మెల్యే వెల్లడించారు. రైల్వేకు సంబంధించిన స్థలం బస్టాండ్ నిర్మాణానికి కేటాయిస్తే.. దానికి బదులుగా మరో చోట తమకు స్థలం కావాలని రైల్వే మంత్రి కోరారు. అయితే ఇక్కడ తమ వద్ద రైల్వేకు ఇవ్వడానికి స్థలం లేదని.. ప్రజలు, రైల్వే ప్రయాణికుల ప్రయోజనాలను దృష్టిలో ఉంచుకొని బస్టాండ్ నిర్మాణానికి సంహకరించాలని కోరగా.. దానికి మంత్రి పీపీపీ పద్ధతిలో నిర్మాణం చేపట్టేందుకు మంత్రి అంగీకరించినట్లు ఎమ్మెల్యే తెలిపారు. రైల్వే శాఖ మంత్రి దీనికి సంబంధించి ఆదేశాలను కూడా సంబంధిత జోనల్ అధికారులకు పంపిస్తున్నట్లు తెలిపారు.

రైల్వే స్టేషన్ ఎదుట ఉన్న ప్రస్తుత బస్ బేను మరొక చోటుకు మార్చడానికి అధికారులు ప్రణాళికలు సిద్ధం చేస్తున్నారు. ప్రస్తుతం ఉన్న బస్ బే, రైల్వే జీఆర్పీ పోలీస్ స్టేషన్ ఎదురుగా ఉంది. దీనివల్ల ప్రయాణికులకు కొన్ని ఇబ్బందులు కలుగుతున్నాయి. ఈ సమస్యను పరిష్కరించడానికి, మూసివేసిన ఆంగ్ల మాధ్యమ పాఠశాల మైదానంలోకి బస్ బేను మార్చాలని అధికారులు యోచిస్తున్నారు.

ఈ స్థలం జాతీయ రహదారికి దగ్గరగా ఉండటం వల్ల బస్సుల రాకపోకలు సులభంగా జరుగుతాయి. నూతనంగా నిర్మించబోయే బస్ బే ప్రణాళికలో.. ప్రైవేటు వ్యాపార సముదాయాలకు ఎలాంటి ఇబ్బందులు కలగకుండా.. బస్సులు మైదానంలోనే తిరిగి వెళ్ళే విధంగా ఏర్పాట్లు చేస్తున్నారు. అలాగే, హైదరాబాద్‌కు వెళ్లే బస్సుల కోసం నేరుగా రోడ్డు మార్గాన్ని నిర్మించడానికి రైల్వే, ఆర్ అండ్ బి శాఖ అధికారులు సంయుక్తంగా కృషి చేస్తున్నారు. ఈ మార్పుల వల్ల ప్రయాణికులకు మెరుగైన సౌకర్యాలు లభిస్తాయని అధికారులు ఆశాభావం వ్యక్తం చేస్తున్నారు.