ఇన్నోవా కారులో కొకైన్ రవాణా.. ముగ్గురు అరెస్ట్, ఒకరు విదేశీ పౌరుడు
Telangana Telugu | Suryaa Desk | Published : Sun, Aug 24, 2025, 07:58 PM
హైదరాబాద్లో డ్రగ్స్ రవాణా చేసిన ముగ్గురిని ఎక్సైజ్ స్పెషల్ టాస్క్ ఫోర్స్ (STF) పోలీసులు అరెస్ట్ చేశారు. నారాయణగూడ ఎక్సైజ్ పోలీస్ స్టేషన్ పరిధిలో జరిగిన ఈ సంఘటనకు సంబంధించి ఎక్సైజ్ సూపరింటెండెంట్ ఎన్. అంజిరెడ్డి మీడియాకు వివరాలు వెల్లడించారు.
రామ్కోఠిలోని వర్ధమాన్ బ్యాంక్ సమీపంలో ప్రత్యేక తనిఖీలు నిర్వహించిన ఎక్సైజ్ అధికారులు, అనుమానస్పదంగా ఉన్న ఇన్నోవా కారును నిలిపివేశారు. కారులో తనిఖీలు జరపగా, కొకైన్ తరలిస్తున్నట్టు గుర్తించారు.
పోలీసులు కారులో ఉన్న ముగ్గురిని అదుపులోకి తీసుకున్నారు. నాంపల్లికి చెందిన మిస్బాహిద్దీన్ ఖాన్, బంజారాహిల్స్కు చెందిన అలీ అస్గర్ గులాబీ, అలాగే అమెరికా పౌరుడైన జుబైర్ అలీ అనే వ్యక్తిని అరెస్ట్ చేశారు.
వారి వద్ద నుంచి మొత్తం 33.3 గ్రాముల కొకైన్ను స్వాధీనం చేసుకున్నారు. ఈ కేసుకు సంబంధించి ముద్దాయిలపై మత్తుపదార్థాల చట్టం కింద కేసు నమోదు చేసి దర్యాప్తు కొనసాగిస్తున్నారు.
|
|