బీసీ రిజర్వేషన్లపై తెలంగాణ సర్కార్ సుప్రీంకు.. హైకోర్టు తీర్పును సవాల్ చేస్తూ ఎస్ఎల్పీ దాఖలు

తెలంగాణ ప్రభుత్వం బీసీ రిజర్వేషన్లకు సంబంధించి హైకోర్టు ఇచ్చిన తీర్పును సవాల్ చేస్తూ సుప్రీంకోర్టులో స్పెషల్ లీవ్ పిటిషన్ (SLP) దాఖలు చేసింది. ఈ విషయాన్ని టీపీసీసీ చీఫ్ మహేశ్ కుమార్ గౌడ్ ఢిల్లీలో వెల్లడించారు. సుప్రీంకోర్టు సీనియర్ న్యాయవాది, ఎంపీ అభిషేక్ మను సింగ్వితో సమావేశమైన అనంతరం ఆయన మీడియాతో మాట్లాడారు. బీసీలకు 42 శాతం రిజర్వేషన్లు కల్పిస్తూ రాష్ట్ర ప్రభుత్వం తీసుకున్న చరిత్రాత్మక నిర్ణయాన్ని అమలు చేయాలనే ఉద్దేశంతోనే 40 పేజీలతో ఈ పిటిషన్ వేశామని మహేశ్ కుమార్ గౌడ్ తెలిపారు. ఈ కేసు విచారణ ఎల్లుండి (గురువారం) సుప్రీంకోర్టులో లిస్ట్ అయ్యే అవకాశం ఉందని ఆయన ఆశాభావం వ్యక్తం చేశారు.
తెలంగాణ ప్రభుత్వం బీసీల జీవితాలు మెరుగుపడాలనే చిత్తశుద్ధితో 42 శాతం రిజర్వేషన్లు కల్పిస్తూ జీవో ఇచ్చిందని, అయితే బీజేపీ, బీఆర్‌ఎస్‌లు ఈ నిర్ణయాన్ని అడుగడుగునా వ్యతిరేకిస్తున్నాయని మహేశ్ కుమార్ గౌడ్ ఆరోపించారు. రాష్ట్ర ప్రభుత్వం హైకోర్టులో పూర్తి వివరాలతో వాదించినప్పటికీ, జీవో నెంబర్ తొమ్మిదిపై స్టే విధిస్తూ, పాత రిజర్వేషన్ల విధానంలోనే ఎన్నికలు నిర్వహించాలని హైకోర్టు ఆదేశించడం బాధాకరమని ఆయన పేర్కొన్నారు. బీసీల సంక్షేమం కోసం కాంగ్రెస్ ప్రభుత్వం చేస్తున్న ప్రయత్నాలకు అడ్డుపడుతున్నా వెనక్కి తగ్గకుండా పోరాడుతున్నామని ఆయన స్పష్టం చేశారు.
హైకోర్టు ఇచ్చిన స్టే ఆర్డర్‌ను, తీర్పును సవాల్ చేస్తూ తాము సుప్రీంకోర్టులో ఎస్ఎల్పీ దాఖలు చేశామని టీపీసీసీ చీఫ్ వెల్లడించారు. ఈ మేరకు సుప్రీంకోర్టులో రాష్ట్ర ప్రభుత్వ తరపున వాదించనున్న సీనియర్ అడ్వకేట్ అభిషేక్ మను సింగ్విని ప్రత్యేకంగా కలిసి చర్చించినట్లు తెలిపారు. గురువారం ఎస్ఎల్పీ విచారణకు వస్తుందని తాము ఆశిస్తున్నామని, సుప్రీంకోర్టులో తమకు న్యాయం జరుగుతుందని మహేశ్ కుమార్ గౌడ్ ధీమా వ్యక్తం చేశారు.
అసెంబ్లీలో బీసీ రిజర్వేషన్లకు సంబంధించిన రెండు చట్టాలు చేసినప్పుడు అన్ని పార్టీలు ఏకమై మద్దతు పలికాయని మహేశ్ కుమార్ గౌడ్ గుర్తు చేశారు. కానీ ఇప్పుడు బీజేపీ, బీఆర్‌ఎస్‌లు మాత్రం మాట మార్చి, బీసీ రిజర్వేషన్లకు వ్యతిరేకంగా వ్యవహరిస్తున్నాయని ఆయన తీవ్రంగా ఆరోపించారు. బీసీల రిజర్వేషన్లపై రాష్ట్ర ప్రభుత్వం చిత్తశుద్ధితో ఉందని, న్యాయ పోరాటంలో వెనకడుగు వేసే ప్రసక్తే లేదని ఆయన స్పష్టం చేశారు.