రవాణా శాఖ చెక్ పోస్టులన్నీ మూసివేత.. కీలక నిర్ణయం తీసుకున్న తెలంగాణ ప్రభుత్వం

తెలంగాణ రాష్ట్ర ప్రభుత్వం కీలక నిర్ణయం తీసుకుంది. రాష్ట్రవ్యాప్తంగా ఉన్న రవాణా శాఖ చెక్ పోస్టులను తక్షణమే మూసివేయాలని ప్రకటించింది. ప్రభుత్వ ఆదేశాల మేరకు ఉత్తర్వులు జారీ అయ్యాయి. రాష్ట్ర రవాణా శాఖ కమిషనర్ బుధవారం నాడు తనిఖీ కేంద్రాల మూసివేతకు సంబంధించిన ఉత్తర్వులను జారీ చేశారు. ఉత్తర్వుల ప్రకారం.. డిప్యూటీ రవాణా కమిషనర్లు, జిల్లా రవాణా అధికారులు తక్షణ చర్యలు తీసుకోవాల్సి ఉంది. తనిఖీ కేంద్రాల వద్ద ఉన్న బోర్డులు, బారికేడ్లు, సంకేతాలు వంటి అడ్డంకులను వెంటనే తొలగించాలని ఆదేశించారు.

ఇకపై తనిఖీ కేంద్రాల వద్ద ఎవరూ ఉండరాదని స్పష్టం చేస్తూ, అక్కడ పనిచేస్తున్న సిబ్బందిని ఇతర శాఖలకు తిరిగి నియమించాలని కమిషనర్ ఆదేశించారు. తనిఖీ కేంద్రాల వద్ద వాహనాల రాకపోకలకు ఎలాంటి అంతరాయం కలగకుండా చూడాలని సూచించారు. తనిఖీ కేంద్రాల వద్ద ఉన్న రికార్డులు, గృహోపకరణాలు , పరికరాలను వెంటనే జిల్లా రవాణా కార్యాలయాలకు తరలించాలని ఆదేశాలు ఉన్నాయి. ఆర్థిక, పరిపాలనా రికార్డులను సమన్వయం చేసి, భద్రపరచాలని ఉత్తర్వుల్లో పేర్కొన్నారు.

అనివార్యమైన నిర్ణయం..

తనిఖీ కేంద్రాల మూసివేతపై సమగ్ర నివేదికను ఈ రోజు సాయంత్రం 5 గంటలలోపు సమర్పించాలని అధికారులను ఆదేశించారు. ప్రజలకు అసౌకర్యం కలగకుండా తగిన ప్రకటనలు కూడా ఇవ్వాలని సూచించారు. తెలంగాణ రాష్ట్రవ్యాప్తంగా ఉన్న రవాణా శాఖ తనిఖీ కేంద్రాలపై గత ఆదివారం నాడు అవినీతి నిరోధక శాఖ (ఏసీబీ) మెరుపు దాడులు నిర్వహించిన నేపథ్యంలో ఈ తాజా ఉత్తర్వులు వెలువడటం అత్యంత ఆసక్తికరంగా మారింది.

 సంగారెడ్డి, భద్రాద్రి కొత్తగూడెం, ఉమ్మడి ఆదిలాబాద్, కామారెడ్డి, కొమరం భీం అసిఫాబాద్ జిల్లాల్లోని తనిఖీ కేంద్రాలపై ఏసీబీ అధికారులు దాడులు నిర్వహించి, అక్కడ అక్రమాలు జరుగుతున్నట్లుగా గుర్తించారు. నిరంతర అవినీతి ఆరోపణలు, వాహనదారులకు చెక్ పోస్టుల వద్ద ఎదురవుతున్న ఇబ్బందులను పూర్తిగా తొలగించాలనే లక్ష్యంతో ప్రభుత్వం ఈ సాహసోపేతమైన నిర్ణయం తీసుకున్నట్లుగా స్పష్టమవుతోంది.