మార్కెట్లో నకిలీ ఇంజిన్ ఆయిల్... బీ అలర్ట్

హైదరాబాద్ నగరంలో ప్రముఖ బ్రాండ్ల పేరుతో నకిలీ ఇంజిన్ ఆయిల్ విక్రయిస్తున్న ఒక వ్యక్తిని పోలీసులు అరెస్టు చేశారు. ఈ మోసపూరిత కార్యకలాపాన్ని గుర్తించిన అధికారులు.. నిందితుడి నుంచి రూ. 3 లక్షల విలువైన సుమారు 710 లీటర్ల నకిలీ ఇంజిన్ ఆయిల్‌ను స్వాధీనం చేసుకున్నారు. నకిలీ లేబుళ్లను బాటిళ్లపై అంటించి అమ్ముతున్నట్లు పోలీసుల దర్యాప్తులో తేలింది.

హైదరాబాద్‌లో దాదాపు ప్రతి ఇంట్లో ద్విచక్ర వాహనాలు, చాలా మందికి కార్లను కలిగి ఉన్న నేపథ్యంలో.. వాహనాల పనితీరు సమస్యలు లేకుండా ఉండాలంటే నాణ్యమైన ఇంజిన్ ఆయిల్‌ను క్రమం తప్పకుండా మార్చడం అత్యవసరం. అయితే.. అవగాహన లేమితో చాలా మంది తక్కువ ధరకు దొరుకుతున్నాయని నకిలీ ఆయిల్‌ను కొని మోసపోతున్నారు. ఈ ముప్పును ముందుగానే నివారించడానికి ఆటోమొబైల్ నిపుణులు కొన్ని సూచనలు చేస్తున్నారు.

నకిలీ ఆయిల్ బాటిళ్ల ప్యాకేజీ, సీలింగ్‌లో తేడాలు స్పష్టంగా కనిపిస్తాయి. నాణ్యత సరిగాలేని ముద్రణ , అర్థం కాని అక్షరాలతో కూడిన లేబుళ్లు ఉంటాయి. ఒరిజినల్ బ్రాండ్‌ల హోలోగ్రామ్ , సీల్, క్యూఆర్ కోడ్‌లను ప్రత్యేకంగా తనిఖీ చేయాలి. నకిలీ ఇంజిన్ ఆయిల్ తేలికపాటి, పలుచని రంగుతో కనిపిస్తుంది. అసలు ఆయిల్ పెట్రోల్ వాసనతో ఉంటుంది. కానీ ఘాటు రసాయన వాసన వస్తే అది నకిలీదిగా అనుమానించాలి. నకిలీ ఆయిల్ మార్కెట్ ధర కంటే చాలా తక్కువకు విక్రయిస్తారు. తయారీ సంస్థ చిరునామా వంటి ముఖ్యమైన సమాచారం లేకపోయినా అనుమానించాల్సిందే.

నకిలీ ఆయిల్ వాడకంతో ఇంజిన్‌లో ఘర్షణ అధికమై అంతర్గత భాగాలు త్వరగా అరిగిపోతాయి. బేరింగ్‌లలో కూడా సమస్యలు ఉత్పన్నమవుతాయి. తుప్పు నుంచి రక్షణ, పనితీరును మెరుగుపర్చడానికి ఇంజిన్ ఆయిల్ దోహదం చేస్తుంది. నకిలీ ఆయిల్ వాడితే వాహన ఇంజిన్ జీవితకాలం గణనీయంగా తగ్గిపోతుంది. నకిలీ ఆయిల్ వాడకం ద్వారా పెట్రోల్, డీజిల్ ఎక్కువగా కాలుతుంది, మైలేజీ తగ్గుతుంది.

తరచుగా మరమ్మతులు చేయించాల్సి రావడంతో నిర్వహణ ఖర్చులు కూడా పెరుగుతాయి. తక్కువ ధర ఆశ చూపితే మోసపోవద్దని.. నమ్మకస్థులైన, అధికారిక డీలర్ల వద్దనే ఇంజిన్ ఆయిల్‌ను కొనుగోలు చేయాలని.. లేదంటే అగ్ని ప్రమాదాలకు కూడా ఆస్కారం ఉంటుందని ఉప్పల్ ఏరియాకు చెందిన ఆటోమొబైల్ నిపుణుడు నాగరాజు హెచ్చరించారు.