తెలంగాణలో గర్భిణులు, బాలింతలకు ఆర్థిక చేయూత

తెలంగాణ ప్రభుత్వం కీలక నిర్ణయం తీసుకుంది. రాష్ట్రంలో మరో కొత్త పథకం అమలు చేసేందుకు ముందుకు వచ్చింది. దీని ద్వారా మహిళలకు ఆర్థికంగా సాయం అందించనున్నారు. ఇంతకు ఇది ఏ పథకం అంటే కేంద్ర ప్రభుత్వం ఇప్పటికే అమలు చేస్తోన్న ప్రధాన మంత్రి మాతృ వంజన యోజన పథకం. దీన్ని రాష్ట్రంలో కూడా అమలు చేయాలని రేవంత్ సర్కార్ భావిస్తోంది. ఆ వివరాలు..

కేంద్ర ప్రభుత్వం గర్భవతులు, బాలితంతలను ఆర్థికంగా ఆదుకునేందుకు ప్రధాన మంత్రి మాతృ వందన యోజన (పీఎంఎంవీవై) పథకాన్ని అమలు చేస్తుంది. అయితే దీన్ని రాష్ట్రంలో కూడా అమలు చేయాలని రేవంత్ సర్కార్ యోచిస్తోంది. ఈ పథకం ద్వారా కేంద్ర ప్రభుత్వం గర్భిణులు, బాలింతలకు రూ.5 వేలు సాయం చేస్తుంది. తొలి కాన్పుకు ఈ మొత్తం అందజేస్తారు. అలానే రెండో సారి ఆడపిల్ల పుడితే మరో 6 వేల రూపాయలు అందజేయనున్నారు. ఈ పథకం అమలు బాధ్యతలను తెలంగాణ రాష్ట్రంలోని శిశుసంక్షేమ శాఖ పర్యవేక్షించనున్నది.

 ఈ పథకం అమలుకు సంబంధించి ఇటీవలే స్టేట్ విమెన్ అండ్ చైల్డ్ వెల్ఫేర్ డిపార్ట్‌‌‌‌మెంట్ ప్రభుత్వానికి ప్రతిపాదనలు సిద్ధం చేసి పంపింది. ఈ స్కీమ్ ద్వారా తొలిసారి గర్భం దాల్చిన మహిళలకు 3 విడుతల్లో రూ. 5 వేల ఆర్థిక సహాయం అందిస్తారు. దీనికోసం గర్భం దాల్చిన వెంటనే రిజిస్ట్రేషన్ చేయించుకుంటే ముందుగా రూ.1000 ఇస్తారు. ఆ తర్వాత గర్భం దాల్చిన 6 నెలల తర్వాత రెండో విడత కింద రూ. 2వేలు.. బిడ్డ పుట్టిన తర్వాత మొదటి దశ టీకాలు వేయించగానే మూడో విడత కింద రూ. 2 వేలు నేరుగా లబ్ధిదారు బ్యాంకు అకౌంట్‌‌‌‌లో జమ చేస్తారు.

రెండో కాన్పులో ఆడపిల్ల పుడితే... ఆ తల్లికి ఒకేసారి రూ.6 వేలు అందజేస్తారు. దేశంలో ఆడపిల్లల సంఖ్యను పెంచడం, భ్రూణ హత్యలను నివారించడం కోసం కేంద్ర ప్రభుత్వం ఈ పథకాన్ని తీసుకువచ్చింది.. విమెన్ అండ్ చైల్డ్ వెల్ఫేర్ డిపార్ట్‌‌‌‌మెంట్ ఆధ్వర్యంలో.. అంగన్‌వాడీ కార్యకర్తలు అర్హులైన లబ్ధిదారులను గుర్తిస్తారు. వారి పేర్లు నమోదు చేయడం.. విడతల వారీగా వారికి నగదు అందించడం వంటి బాధ్యతలను వీరే నిర్వహిస్తారు.

కేంద్ర ప్రభుత్వం 2017 లో ఈ పీఎంఎంవీవైను తీసుకొచ్చింది. దేశవ్యాప్తంగా చాలా వరకు రాష్ట్రాల్లో ఈ పథకం అమలవుతోంది. కానీ తెలంగాణలో మాత్రం అమలు కావడం లేదు. ఈక్రమంలో ఈ పథకం కింద ప్రతి ఏటా కేంద్రానికి రావాల్సిన నిధులు ఆగిపోయాయి. దీంతో రేవంత్ సర్కార్ రాష్ట్రంలో ఈ పథకాన్ని అమలు చేయాలని నిర్ణయం తీసుకుంది. దీని వల్ల నిరుపేద గర్భిణులు, బాలింతలకు లబ్ధి చేకూరుతుందనే భావిస్తున్నారు.