గుండెపోటుతో,,,, కన్నుమూసిన అందెశ్రీ

తెలంగాణ రాష్ట్ర గీతం 'జయ జయహే తెలంగాణ జననీ జయ కేతనం' రచయిత, ప్రముఖ కవి, రచయిత అందెశ్రీ ఆకస్మిక మరణం సాహితీ లోకాన్ని, రాజకీయ వర్గాలను తీవ్ర విషాదంలో ముంచెత్తింది. అన్నిటికంటే బాధాకరం ఏంటంటే... ఆయన ఎంతో ఇష్టంతో, ఆశగా నిర్మించుకుంటున్న తన 'కలల సౌధం' పూర్తి కాకముందే ఈ లోకాన్ని విడిచివెళ్లడం. కొన్ని రోజుల్లోనే ఆ కొత్త ఇంట్లోకి అడుగుపెట్టాలనుకున్న ఆయన కోరిక నెరవేరలేదు.

అందెశ్రీ తన జీవిత చరమాంకంలో కొత్త ఇంటి నిర్మాణంపై ప్రత్యేకంగా దృష్టి సారించారు. తెలంగాణ రాష్ట్ర ప్రభుత్వం ఆయన రాసిన 'జయ జయహే తెలంగాణ' గీతాన్ని రాష్ట్ర గీతంగా ప్రకటించిన సందర్భంగా.. ఆయనకు కోటి రూపాయల నజరానాతో పాటు, ఇంటి నిర్మాణానికి అవసరమైన 348 గజాల స్థలాన్ని కూడా బహుకరించింది. ఆయన మేడ్చల్ జిల్లా ఘట్‌కేసర్ మున్సిపాలిటీ ఎన్.ఎఫ్.సి. నగర్ లోని ఆ స్థలంలో G+3 పెంట్ హౌస్ నిర్మిస్తున్నారు. ఈ నిర్మాణ పనులు దాదాపు పూర్తయ్యే దశకు చేరుకున్నాయి. అందెశ్రీకి ఆ ఇంటి నిర్మాణంపై ఎంత మమకారం ఉందంటే.. చనిపోయే ముందు రోజు 2025, నవంబర్ 09వ తేదీ సాయంత్రం వరకు ఆయన అక్కడే గడిపారు. తానే స్వయంగా దగ్గర ఉండి నిర్మాణ పనులను పర్యవేక్షించి వెళ్లినట్లు మేస్త్రీలు, కాంట్రాక్టర్లు , కుటుంబ సభ్యులు తెలిపారు.

నవంబర్ 9వ తేదీ సాయంత్రం కొత్త ఇంటి పనులను పర్యవేక్షించిన అనంతరం.. ఆయన అయోధ్య రెడ్డి ఇంటి దగ్గర జరిగిన అయ్యప్ప పూజ కార్యక్రమానికి హాజరయ్యారు. ఆ తర్వాత హైదరాబాద్ లాలాగూడలోని తన ఇంటికి చేరుకున్నారు. నవంబర్ 10వ తేదీ ఉదయం అర్ధరాత్రి తర్వాత ఆయనకు తీవ్ర గుండెపోటు రావడంతో ఒక్కసారిగా కుప్పకూలిపోయారు. కుటుంబ సభ్యులు హుటాహుటిన ఆయనను గాంధీ ఆస్పత్రికి తరలించగా.. అప్పటికే ఆయన మృతి చెందినట్లు వైద్యులు ప్రకటించారు. వైద్యుల అంచనా ప్రకారం.. ఆయన ఐదు గంటల ముందే చనిపోయి ఉంటారని తెలిసింది.

తెలంగాణ సమాజానికి, సాహిత్యానికి అందెశ్రీ మరణం తీరని లోటు. ఆయన రాసిన 'జయ జయహే తెలంగాణ' గీతం రాష్ట్ర ఉద్యమ సమయంలో కోట్లాది మందికి స్ఫూర్తినిచ్చింది. ఆయన మృతి పట్ల పలువురు సినీ, రాజకీయ ప్రముఖులు సంతాపం తెలిపారు. ముఖ్యంగా.. తాను కట్టుకున్న ఇంటికి కూడా వెళ్లకముందే ఆయన తుదిశ్వాస విడవడంపై కుటుంబ సభ్యులు , అభిమానులు తీవ్ర విచారం వ్యక్తం చేస్తున్నారు.