ఫ్యాన్సీ నంబర్ల వేలం.. తెలంగాణ రవాణా శాఖకు భారీ ఆదాయం

తెలంగాణ రవాణా శాఖకు ఫ్యాన్సీ నంబర్లు భారీ మొత్తంలో ఆదాయాన్ని తెచ్చిపెడుతున్నాయి. ప్రతిసారీ కొత్త సిరీస్ మొదలైనప్పుడు.. వాహనదారులు తమ వాహనాలకు అదృష్ట సంఖ్యలు, పునరావృత సంఖ్యలు లేదా తమకు ఇష్టమైన సంఖ్యలు దక్కించుకోవడానికి పెద్ద మొత్తంలో వేలంపాటలో పాల్గొంటారు. తాజాగా జరిగిన వేలంపాటలో.. కేవలం ఒక్క రోజులోనే ఖైరతాబాద్ రవాణాశాఖ కార్యాలయానికి అసాధారణ రీతిలో రూ. 65,38,889 ల ఆదాయం వచ్చినట్లు హైదరాబాద్ జాయింట్ ట్రాన్స్‌పోర్ట్ కమిషనర్ రమేష్ తెలిపారు.

రికార్డు స్థాయిలో పలికిన నంబర్లు..

ఈ వేలంపాటలో అత్యధికంగా పలికిన నంబర్ TG 09 H 9999. ఈ నంబర్ కోసం పోటీపడిన హనర్ ప్రైమ్ హౌసింగ్ ఎల్‌ఎల్‌పీ సంస్థ ఏకంగా రూ. 22,72,222 చెల్లించి కైవసం చేసుకుంది. ఇది ఆ ఒక్క రోజులో అత్యంత ఖరీదైన సంఖ్యగా నిలిచింది. దీనికి వ్యతిరేకంగా.. అతి తక్కువగా TG 09 J 0003 నంబరుకు కూడా రూ. 1,15,121 ఆదాయం వచ్చిందంటే.. వాహనదారులకు ఫ్యాన్సీ నంబర్లపై ఉన్న మక్కువ ఎంత ఉందో అర్థం చేసుకోవచ్చు.

వేలంలో కీలక విజేతలు..

ఫ్యాన్సీ నంబర్ల కోసం ప్రముఖ సంస్థలు, వ్యక్తులు పోటీపడ్డారు. ముఖ్యంగా డెవలపర్లు, ఎనర్జీ సంస్థలు, ఎంటర్‌టైన్‌మెంట్ కంపెనీలు తమ వ్యాపార వాహనాలకు, వ్యక్తిగత వాహనాలకు ఈ ప్రత్యేక సంఖ్యలను దక్కించుకోవడానికి వెనుకాడలేదు.

TG 09 J 0009: ఈ సంఖ్యను రూ. 6,80,000 లకు మెస్సర్స్ దండు ఎనర్జీ ప్రైవేట్ లిమిటెడ్ దక్కించుకుంది. TG 09 J 0006.. దీని కోసం సాయి సిల్స్క్‌ కళామందిర్ లిమిటెడ్ యాజమాన్యం రూ. 5,70,666 చెల్లించింది. TG 09 J 0099.. ఈ నంబరును రూ. 3,40,000 లకు మెస్సర్స్ గోదావరి ఫార్చూన్ సంస్థ దక్కించుకుంది. TG 09 J 0001.. సింగిల్ డిజిట్ నంబరు కోసం శ్రీనిధి ఐటీ స్పేస్ ప్రైవేట్ లిమిటెడ్ సంస్థ రూ. 2,60,000 చెల్లించింది. TG 09 J 0005.. దీనిని రూ. 2,40,100 లకు నిహారిక ఎంటర్ టైన్ మెంట్ సంస్థ దక్కించుకుంది.

రవాణా శాఖకు ఈ ఫ్యాన్సీ నంబర్లు ఒక అదనపు ఆదాయ వనరుగా మారాయి. వాహనదారులు ఇంత భారీ మొత్తంలో డబ్బు ఖర్చు చేయడానికి ప్రధానంగా కొన్ని కారణాలు ఉన్నాయి. చాలా మంది సంఖ్యాశాస్త్రం (న్యూమరాలజీ) ప్రకారం తమకు అదృష్టం తెచ్చే సంఖ్యలను, లేదా శుభప్రదమైన '9' వంటి సంఖ్యలను కోరుకుంటారు. నిర్మాణ, రియల్ ఎస్టేట్ సంస్థలు తమ బ్రాండ్ లేదా హోదాను ప్రతిబింబించే సంఖ్యలను లేదా సులభంగా గుర్తుంచుకోగలిగే సంఖ్యలను (ఉదా: 0001, 0009) కొనుగోలు చేస్తాయి.

ఇది వారి మార్కెట్ విలువను, హోదాను సూచిస్తుంది. కొంతమందికి తమ పుట్టిన తేదీ, లేదా ఇష్టమైన సంఖ్యలు ఉండేలా చూసుకుంటారు. ఈ వేలం ప్రక్రియ పూర్తిగా పారదర్శకంగా ఆన్‌లైన్ ద్వారా జరుగుతుంది. వాహనదారుల నుంచి వచ్చే ఈ ఆదాయం ప్రభుత్వ ఖజానాకు చేరి, ప్రజా సంక్షేమ కార్యక్రమాలకు ఉపయోగపడుతుంది. ఈ ఒక్క రోజు ఆదాయమే రవాణా శాఖకు ఫ్యాన్సీ నంబర్లు ఎంత కీలకమో స్పష్టం చేస్తోంది.