ఈ పరీక్ష పాస్ అవ్వకుంటే ఇంటికే.. ఉద్యోగం పోయినట్లే

తెలంగాణ రాష్ట్ర ప్రభుత్వం పరిపాలనలో సాంకేతికతను మరింత పెంచడానికి మరియు ప్రభుత్వ కార్యాలయాల పనితీరులో పారదర్శకత, వేగాన్ని తీసుకురావడానికి ఒక కీలక నిర్ణయం తీసుకుంది. ఇకపై ప్రభుత్వ శాఖల్లోని కొన్ని విభాగాల్లో పనిచేస్తున్న ఉద్యోగులు తప్పనిసరిగా కంప్యూటర్ పరీక్షలో ఉత్తీర్ణత సాధించాల్సి ఉంటుంది. ఈ మేరకు ప్రభుత్వం జీఓ నెం. 237ను జారీ చేసింది. ఈ నూతన నిబంధనతో ప్రభుత్వ ఉద్యోగుల్లో డిజిటల్ నైపుణ్యాలు మెరుగుపడతాయి.

కొత్తగా జారీ చేసిన ఈ జీవో ప్రకారం.. ఉద్యోగులు కేవలం కంప్యూటర్ పరీక్షకు హాజరు కావడమే కాకుండా.. అందులో తప్పనిసరిగా ఉత్తీర్ణత సాధించాలి. కంప్యూటర్ పరీక్షలో ఉత్తీర్ణతతో పాటు, ఆఫీసు ఆటోమేషన్ యంత్రాల నిర్వహణలో ప్రావీణ్యం కూడా తప్పనిసరి చేసింది. దీని ఉద్దేశం రోజువారీ కార్యకలాపాల్లో సాంకేతికతను సమర్థవంతంగా ఉపయోగించడమే. ఈ పరీక్షలో ఉత్తీర్ణత సాధించని ఉద్యోగులను జాబ్ నుంచి తొలగించడం లేదా వేరే విభాగాలకు పంపించడం వంటి కఠిన చర్యలను ప్రభుత్వం తీసుకునే అవకాశం ఉందని అధికార వర్గాలు చెబుతున్నాయి.

ఈ కొత్త నిబంధన ప్రధానంగా క్లరికల్, అడ్మినిస్ట్రేటివ్ విభాగాల్లో పనిచేసే ఉద్యోగులకు వర్తిస్తుంది. జూనియర్ అసిస్టెంట్లు, అసిస్టెంట్ కమ్ టైపిస్టులు, సీనియర్ స్టెనోగ్రాఫర్లు, జూనియర్ స్టెనోగ్రాఫర్లు, యు.డి. టైపిస్టులు, టైపిస్టులు, ఎల్.డి. టైపిస్టులు వంటి కేటగిరీల ఉద్యోగులు ఈ డిపార్ట్‌మెంటల్ పరీక్షలో తప్పనిసరిగా ఉత్తీర్ణులు కావాలి. కారుణ్య నియామకాలు వంటి వివిధ కారణాల వల్ల ఉద్యోగాలు పొందిన వారికి కంప్యూటర్ పరిజ్ఞానం తక్కువగా ఉండవచ్చు.

ఈ పరీక్ష ద్వారా ఆయా ఉద్యోగులందరూ కంప్యూటర్ నాలెడ్జ్‌ను తప్పనిసరిగా పెంచుకోవాల్సిన అవసరం ఏర్పడింది. ఇది ప్రభుత్వ కార్యాలయాల్లో ఫైళ్ల నిర్వహణ, డేటా ఎంట్రీ, కమ్యూనికేషన్ వంటి కీలక పనులను మరింత సమర్థవంతంగా.. తక్కువ సమయంలో పూర్తి చేయడానికి వీలు కల్పిస్తుంది. ముఖ్యమంత్రి నేతృత్వంలోని ప్రభుత్వం డిజిటల్ పరిపాలనను పటిష్టం చేయాలని భావిస్తుండటంతో.. ఉద్యోగుల సాంకేతిక సామర్థ్యం పెంచడం ఈ మార్పులో అత్యంత కీలకమైన భాగంగా చెప్పుకోవచ్చు. ఈ కేటగిరీల్లో ఉన్న ప్రభుత్వ ఉద్యోగులు ఇప్పటి నుంచే వీటిపై అవగాహన పెంచుకోవడం మంచిదని నిపుణులు సూచిస్తున్నారు.