హైకోర్టు షాక్.. పంచాయతీ రిజర్వేషన్ల పిటిషన్లపై తక్షణ విచారణ నిరాకరణ!

తెలంగాణలో గ్రామ పంచాయతీ ఎన్నికల రిజర్వేషన్ల కేటాయింపుపై తీవ్ర వివాదం నెలకొన్న నేపథ్యంలో హైకోర్టు కీలక నిర్ణయం తీసుకుంది. రిజర్వేషన్లు అక్రమంగా జరిగాయని ఆరోపిస్తూ దాఖలైన పలు పిటిషన్లను వెంటనే విచారించేందుకు డివిజన్ బెంచ్ స్పష్టంగా నిరాకరించింది. ఈ రోజు మధ్యాహ్నం అన్ని పిటిషన్లను సమగ్రంగా పరిశీలించిన తర్వాతే తదుపరి విచారణ తేదీని ప్రకటిస్తామని బెంచ్ తేల్చి చెప్పింది. దీంతో ఎన్నికల షెడ్యూల్‌పై ఏ విధమైన అనిశ్చితి రాకుండా ప్రభుత్వానికి పరోక్ష ఉపశమనం లభించినట్లయింది.
రిజర్వేషన్ల కేటాయింపు ప్రక్రియ సక్రమంగా జరగలేదని, రాజకీయ ప్రయోజనాల కోసం అధికార పార్టీ దుర్వినియోగం చేసిందని పలువురు ప్రతిపక్ష నేతలు, సామాజిక కార్యకర్తలు ఆరోపిస్తూ ఇప్పటికే హైకోర్టులో పిటిషన్లు దాఖలు చేశారు. ఈ కేసులను వేగంగా పరిష్కరించాలని, ఎన్నికల నోటిఫికేషన్‌కు ముందే స్టే ఇవ్వాలని పిటిషనర్లు డివిజన్ బెంచ్‌ను కోరారు. కానీ న్యాయస్థానం అలాంటి అత్యవసర విచారణ అవసరం లేదని స్పష్టం చేసింది.
ఇంతకుముందు సింగిల్ జడ్జి బెంచ్ కూడా ఇదే విషయంలో పిటిషన్లపై స్టే ఇవ్వడానికి నిరాకరించిన విషయం గమనార్హం. రిజర్వేషన్ల కేటాయింపు ప్రక్రియలో ఎటువంటి గందరగోళం లేదని, చట్టబద్ధంగానే జరిగిందని సింగిల్ బెంచ్ అభిప్రాయపడిన సంగతి తెలిసిందే. దీంతో డివిజన్ బెంచ్ కూడా అదే దిశగా అడుగులు వేస్తున్నట్లు స్పష్టమవుతోంది.
పంచాయతీ ఎన్నికలు సమయానికి జరిగే అవకాశం ఇప్పుడు మరింత బలపడినట్లు కనిపిస్తోంది. అయితే పిటిషనర్లు మాత్రం నిరాశతో ఉన్నారు. రాష్ట్రంలో గ్రామీణ రాజకీయాలను తీవ్రంగా ప్రభావితం చేసే ఈ రిజర్వేషన్ వివాదం ఇక కొన్ని రోజుల పాటు కోర్టు పీఠాలపైనే కొనసాగనుంది.