నకిలీ ఈ-మెయిల్స్ తో జాగ్రత్త వహించాలంటున్న ఆదాయ పన్ను శాఖ

ఈ-పాన్ కార్డు (e-PAN) డౌన్‌లోడ్ చేసుకోమంటూ వస్తున్న నకిలీ ఈ-మెయిల్స్ పట్ల పౌరులు అప్రమత్తంగా ఉండాలని ఆదాయ పన్ను శాఖ (Income Tax Department) హెచ్చరించింది. ఇలాంటి మోసపూరిత మెయిల్స్‌ను నమ్మవద్దని, వాటికి స్పందించవద్దని స్పష్టం చేసింది. ఈ మేరకు ప్రెస్ ఇన్ఫర్మేషన్ బ్యూరో (PIB) సహకారంతో ఆదివారం ఒక ఫ్యాక్ట్-చెక్ హెచ్చరికను జారీ చేసింది.ఆదాయ పన్ను శాఖ పేరుతో పంపే ఈ-మెయిల్స్‌లో ఎప్పుడూ వ్యక్తిగత వివరాలు, పిన్ నంబర్లు, పాస్‌వర్డ్‌లు లేదా క్రెడిట్ కార్డు, బ్యాంకు ఖాతాల వంటి ఆర్థిక సమాచారాన్ని అడగబోమని ఐటీ శాఖ స్పష్టం చేసింది. ప్రజలను మోసం చేసేందుకు సైబర్ నేరగాళ్లు పంపే "e-PAN కార్డు డౌన్‌లోడ్‌కు దశలవారీ సూచనలు" అనే నమూనా ఈ-మెయిల్ స్క్రీన్‌షాట్‌ను కూడా పీఐబీ విడుదల చేసింది.అనుమానాస్పద ఈ-మెయిల్స్ వస్తే వాటిని తెరవొద్దని, వాటిలోని అటాచ్‌మెంట్లను క్లిక్ చేయవద్దని శాఖ సూచించింది. ఆ అటాచ్‌మెంట్లలో కంప్యూటర్‌ను పాడుచేసే ప్రమాదకరమైన మాల్‌వేర్ ఉండే అవకాశం ఉందని తెలిపింది. ఒకవేళ పొరపాటున లింక్‌పై క్లిక్ చేసినా, ఎలాంటి రహస్య సమాచారాన్ని నమోదు చేయవద్దని హెచ్చరించింది.అలాంటి ఫిషింగ్ ఈ-మెయిల్స్ వస్తే సంబంధిత అధికారులకు ఫిర్యాదు చేయాలని ఐటీ శాఖ పన్ను చెల్లింపుదారులను కోరింది. ఆదాయ పన్ను శాఖ పేరుతో మెయిల్ వస్తే, ఆ వివరాలను webmanager@incometax.gov.in  కు... ఇతర సంస్థల పేరుతో వస్తే incident@cert-in.org.in కు ఫార్వార్డ్ చేయాలని తెలిపింది. ఫిర్యాదు చేసిన తర్వాత ఆ మెయిల్‌ను డిలీట్ చేయాలని సూచించింది. అలాగే, తమ కంప్యూటర్లలో యాంటీ-వైరస్, యాంటీ-స్పైవేర్ సాఫ్ట్‌వేర్‌లను ఎప్పటికప్పుడు అప్‌డేట్‌గా ఉంచుకోవాలని సలహా ఇచ్చింది.