ఉనికి కోసమే కేసీఆర్ ఆరాటం.. దమ్ముంటే అసెంబ్లీకి వచ్చి చర్చించు: మంత్రి పొన్నం ఫైర్

తెలంగాణ మాజీ ముఖ్యమంత్రి కేసీఆర్ తీరుపై రవాణా మరియు బీసీ సంక్షేమ శాఖ మంత్రి పొన్నం ప్రభాకర్ తీవ్ర స్థాయిలో ధ్వజమెత్తారు. గాంధీ భవన్‌లో ఏర్పాటు చేసిన మీడియా సమావేశంలో ఆయన మాట్లాడుతూ, కేవలం తన రాజకీయ ఉనికిని కాపాడుకునేందుకే కేసీఆర్ నోటికొచ్చినట్లు మాట్లాడుతున్నారని మండిపడ్డారు. అధికారం కోల్పోయిన అసహనంతోనే ప్రభుత్వంపై లేనిపోని విమర్శలు చేస్తున్నారని, ప్రజలు అన్నీ గమనిస్తున్నారని, ఇకనైనా బాధ్యతారాహిత్య మాటలు కట్టిపెట్టాలని ఆయన కేసీఆర్ ను హెచ్చరించారు.
గత పదేళ్ల బిఆర్ఎస్ అరాచక పాలనకు స్వస్తి చెప్పి ప్రజలు ఎప్పుడో మీ తోలు తీశారని, అయినా మీకు బుద్ధి రావడం లేదని మంత్రి ఎద్దేవా చేశారు. క్షేత్రస్థాయిలో సర్పంచ్ ఎన్నికల్లో కూడా పార్టీకి ఏమీ లేకుండా చేశారని, ప్రజల తీర్పును ఇంకా కేసీఆర్ జీర్ణించుకోలేకపోతున్నారని విమర్శించారు. తప్పు చేసిన వారి తోలు తీసే బాధ్యతను ప్రజలే స్వయంగా తీసుకుంటారని, ఇంకా అహంకారంతో మాట్లాడితే భవిష్యత్తులో ప్రజలే తగిన బుద్ధి చెబుతారని పొన్నం ప్రభాకర్ ఘాటుగా స్పందించారు.
గత పాలకుల నిర్వాకం వల్ల, అనాలోచిత నిర్ణయాల వల్ల రాష్ట్రం ఎదుర్కొంటున్న అనేక ఇబ్బందులను తమ ప్రభుత్వం ఇప్పుడు సరిచేస్తోందని మంత్రి స్పష్టం చేశారు. పదేళ్లలో జరిగిన విధ్వంసాన్ని సరిదిద్దేందుకు సమయం పడుతుందని, అయినా తాము చిత్తశుద్ధితో, ప్రణాళికాబద్ధంగా ముందుకు వెళ్తున్నామని తెలిపారు. ప్రజలకు ఇచ్చిన హామీలను నెరవేరుస్తూనే, గత ప్రభుత్వం చేసిన అప్పులు మరియు తప్పులను సరిచేసే బాధ్యతను కాంగ్రెస్ ప్రభుత్వం భుజాన వేసుకుందని ఆయన వివరించారు.
ప్రజా సమస్యలపై నిజంగా చిత్తశుద్ధి ఉంటే ప్రతిపక్ష నాయకుడిగా అసెంబ్లీకి వచ్చి చర్చలో పాల్గొనాలని మంత్రి పొన్నం ప్రభాకర్ సవాల్ విసిరారు. బయట ఉండి విమర్శలు చేయడం కాదని, చట్టసభ వేదికగా ప్రభుత్వం అడిగే ప్రశ్నలకు సమాధానం చెప్పాలని, ప్రజాస్వామ్య పద్ధతిలో చర్చ జరగాలని డిమాండ్ చేశారు. అసెంబ్లీ సమావేశాలకు హాజరుకాకుండా, బయట మాత్రం నీతులు చెప్పడం కేసీఆర్ ద్వంద్వ వైఖరికి నిదర్శనమని, దమ్ముంటే సభకు వచ్చి చర్చ చేయాలని ఆయన కోరారు.