21 ఏళ్లు నిండిన మహిళలకు,,,ఉచిత శిక్షణ,,,,ఉద్యోగం

మహిళలు ఆర్థికంగా స్వతంత్రంగా నిలబడేందుకు, స్వయం ఉపాధి సాధించేందుకు హైదరాబాద్‌లో ఓ కీలక కార్యక్రమం జరగనుంది. ఉద్యోగాల కోసం ఎదురుచూస్తున్న మహిళలకు, స్వశక్తితో ఎదగాలనుకునే వారికి ఇది నిజంగా శుభవార్త అనే చెప్పాలి. మహిళలకు భద్రతతో కూడిన ఉద్యోగ అవకాశాలు కల్పించాలనే లక్ష్యంతో హైదరాబాద్‌లో మహిళల కోసం ప్రత్యేక జాబ్ మేళాను నిర్వహించనున్నారు. దీనిని తెలంగాణ మహిళా భద్రతా విభాగం, హైదరాబాద్ పోలీసుల సహకారంతో ఈ మేళాను నిర్వహిస్తున్నట్లు సోషల్ మీడియా వేదికల ద్వారా సీపీ సజ్జనార్ పోస్ట్ చేశారు.

ఈ జాబ్ మేళా ద్వారా మహిళలను బైక్, స్కూటర్ , ఈ-ఆటో ట్యాక్సీ డ్రైవర్లుగా తయారు చేయనున్నారు. ముఖ్యంగా మహిళా ప్రయాణికులకు మాత్రమే సేవలు అందించే విధంగా ఈ ఉద్యోగాలు ఉండటం విశేషం. దీని వల్ల మహిళలకు ఉపాధి లభించడమే కాకుండా.. నగరంలో ప్రయాణించే మహిళలకు మరింత భద్రత కలుగుతుందని నిర్వాహకులు చెబుతున్నారు. ఈ మహిళల జాబ్ మేళా జనవరి 3వ తేదీన హైదరాబాద్‌లోని అంబర్‌పేట్ ప్రాంతంలోని PTC(పోలీస్ ట్రైనింగ్ సెంటర్‌)లో నిర్వహించనున్నారు. ఉదయం 10 గంటల 30 నిమిషాల నుంచి మధ్యాహ్నం 1 గంట వరకు ఈ కార్యక్రమం కొనసాగుతుంది. ఆసక్తి ఉన్న మహిళలు నిర్ణీత సమయంలో వేదికకు చేరుకోవాలని నిర్వాహకులు సూచిస్తున్నారు.

ఈ కార్యక్రమంలో పాల్గొనే మహిళలకు అనేక రకాల సదుపాయాలు కల్పించనున్నారు. బైక్స్, స్కూటర్లు, ఈ-ఆటోలకు సంబంధించిన డ్రైవింగ్ శిక్షణను పూర్తిగా ఉచితంగా అందించనున్నారు. మహిళా ట్రైనర్లతో ప్రత్యేకంగా డ్రైవింగ్ శిక్షణతో పాటు ఉద్యోగ నైపుణ్యాలు, భద్రతపై అవగాహన కల్పించనున్నారు. శిక్షణ పూర్తైన తర్వాత డ్రైవింగ్ లైసెన్స్ పొందేందుకు పూర్తి సహకారం అందిస్తారు. అంతేకాదు.. శిక్షణ అనంతరం మహిళలకు వంద శాతం ఉద్యోగ అవకాశం కల్పిస్తామని నిర్వాహకులు స్పష్టం చేస్తున్నారు. ఉద్యోగంలో స్థిరపడే వరకు మూడు నెలల పాటు మెంటార్షిప్, కౌన్సెలింగ్ సపోర్ట్ కూడా ఇవ్వనున్నారు. అవసరమైన మహిళలకు వాహన అద్దె లేదా రుణ సదుపాయం కూడా అందుబాటులో ఉంచనున్నట్లు తెలిపారు.

ఈ జాబ్ మేళాలో పాల్గొనాలంటే మహిళలు 21 నుంచి 45 ఏళ్ల మధ్య వయస్సు కలిగి ఉండాలి. ఆధార్ కార్డు తప్పనిసరిగా ఉండాలి. డ్రైవింగ్ అనుభవం లేకపోయినా ఈ కార్యక్రమంలో పాల్గొనవచ్చు. ఇప్పటికే డ్రైవింగ్ లైసెన్స్ ఉన్నవారు ఉంటే వాటిని వెంట తీసుకురావాలని సూచిస్తున్నారు. ఈ జాబ్ మేళా ఉద్యోగం కోసం ఎదురుచూస్తున్న మహిళలకు, స్వయం ఉపాధి ప్రారంభించాలనుకునే వారికి, డ్రైవింగ్ నేర్చుకుని స్థిర ఆదాయం పొందాలనుకునే మహిళలకు ఎంతో ఉపయోగకరంగా ఉండనుంది. ఈ కార్యక్రమంలో పాల్గొనాలనుకునే మహిళలు ముందస్తుగా తమ పేరు నమోదు చేసుకోవాలని సూచించారు. ఇందుకు సంబంధించి వివరాల కోసం 8978862299 నంబర్‌ను సంప్రదించవచ్చని తెలిపారు.